Ghana yɛ ɔman a ɔwɔ Ebibir Atɔree afamu. Ɔyɛ ɔman bi a ɔnye amanaman ahorow bɔ hye. Atɔree afamu no, Ghana nye ɔman Cote D’Ivoire na wɔbɔ hye. Boka afamu no, Ghana man no nye Togoman no na wɔbɔ hye. Sɛ ɔba no Etsifi afamu so a, ɔman Ghana nye Burkina Faso na wɔbɔ hye. Bea a Ghana da wɔ wiadze amanaman pon kɛse do no ntsi, Anaafo afamu no, Ghana nye Bosompo Guinea na wɔbɔ hye. Iyi ntsi, Ghana nye amanaman ebiasa pɛr na wɔbɔ hye.
Afe 1957 mu no na ɔman Ghana gyee ne fahodzi fii Ngyiresi Aborɔfo nsamu. Ghana sidi na mpɛsewa sika a yedzi no ndɛ yi wɔ abakɔsɛm bi. Ana ber bɛn na ebɛnadze ntsi na ɔman Ghana hyɛɛ sidi sika na mpɛsewa sika no ne ndzii ase na sika bɛn na nna ɔman no dzi ansaana sidi na mpɛsewa ne ndzii no hyɛɛ ase? Nkan no, afe 1950 dze reba no, nna amanaman biara a Ngyiresi Aborɔfo dzii hɔn do no nye hɔn dzi sika kor, mekyerɛ pɔno sika no. Ghana Sikakorabea Baatan no kyerɛ a, ber no, Ebibir Atɔree Sikakorabea Baatan no na nna ɔhwɛ yɛ sika ma Ebibiman ahorow a wɔhyɛ Ngyiresi Aborɔfo ase no. Dɛm sika no bi nye Pɔno, Hyelen na Pɛnse.
Afe 1958 mu no, afe kor ekyir pɛpɛɛpɛr a Ɔsaagyefo Kwame Nkrumah nye okunyin binom gyee fahodzi maa Ghana no na Ghanaman no hyɛɛ ase dɛ oridzi nankasa no Pɔno, Hyelen na Pɛnse dze; Ghana Pɔno, Ghana Hyelen na Ghana Pɛnse. Nna sika no yɛ krataa na bobaa dze. Sika krataa dze no, nna ɔyɛ 10/-, £1 na £5. Afe 1968 mu ma Ghanaman no yɛɛ £1 na £5 sika no ber a nna sika no no ho rokɔ atwee no. 10/- sika krataa no dze, afe 1963 mu na Ghana aban no hyɛɛ ase yɛe. Sika bobaa no, wɔdze brɔɔnso daadze na wɔdze yɛe na wodzii foraa sika nkrataa no. Iyinom nye ½d, 1d na nikɛle daadze sika 3d, 6d, 1/- na 2/-.
Afe 1965 mu no, mfe awɔtwe ekyir no, Ghana Pɔno sika no twaa mu ma Ghana Sidi na Mpɛsewa no hyɛɛ n’ahendzi no ase. Ber no Ghana mampanyin Ɔsaagyefo Kwame Nkrumah sii n’adwen pi dɛ ɔbɛma ɔman no egyaa Ngyiresi Aborɔfo hɔn Pɔno sika no ne ndzii edzi sika a ber no, nna wiadze n’afɛndzeanan nyinara agye ne ndzii ato mu no. Dɛm ntsi, Fankwa 1966 mu nyinara no, nna Ghanaman no dzi Ghana Sidi na Ghana Pɔno sika no fora kɛpem dɛ Ɔsaagyefo Kwame Nkrumah siiw Pɔno sika no ne ndzii kwan wɔ Ghana korakoraa.
Dzin ‘Sidi’ n’abɔse fi Akan (Asante Twi) kasafua ‘sedeɛ’ mu. Ɔno na Mfantsefo frɛ no ‘serba’ na aborɔfo so frɛ no ‘cowry’ no. Ayɛwoho 19, 1965 mu na sidi sika no bɔbɔɔ adze. Mpɛsewa sika no so n’abɔse fi Ngyiresi Aborɔfo hɔn sika Pɛnse mu. Afei dze, Ghana Sidi na Mpɛsewa sika no bɛhyɛɛ Ghana Pɔno, Hyelen na Pɛnse sika no ananmu. Mpɛsewa sika no nye sika a osuar wɔ Ghana sika no mu na ogyina hɔ ma sikamfutuw sika a osuar ne ndzii mber no.
