Batatu yɛ adze a yɛyɛ ebibifo, tsitsir Ghanafo yi, ɔda dodowara akoma do. Dɛ Ghananyi ntu bata nkɔ aborokyir nkɔbɔ bra dze, sɛ edze ɔha si hɔ a, no mu nkyɛmu bɛyɛ eduakron (90%) bɛper dɛ wobotu bata akɔbɔ hɔn bra wɔ aborɔkyir. Tsitsir nye mbabun; minngye nndzi dɛ Ghana ɔbabun bi benya akwanya dɛ ɔnkɔ aborɔkyir a ɔbɔpopow ne tsir dɛ ɔnnkɔkɔ.
Nkorɔfo dze batatu si hɔn enyi do hɔn nkwanda nyinara a ɔmmfa ho kwan a wɔbɛfa do akɔ; dɛ ɔyɛ ‘slow way’ o, dɛ ɔbɛfa nsuhɛn anaa wimuhɛn akɔ o, ɔmmfa hɔnho. Binom mpo per per per araa kehyia hɔn wu ɔnam batatu a osi hɔn enyi do no ntsi. Sɛ yɛka ‘slow way’ a, ɔyɛ Borɔfo kasa ‘stowaway’ na Mfantsefo etwuw afa do araa ma abɛdan ‘slow way’ no. N’asekyerɛ nye obi a osuma noho wɔ nsuhɛn mu, keteke mu, wimuhɛn anaa mpo kaar mu guan kɔ beebi a onntua ho hwee. Ndɛ mber yi mpo no, binom tum nantsew Sahara anhweatow a ɔwɔ Lybia no do fa Mediterranean Bosompo kɛse no do guan kɔ borɔ ekyir kɔbɔ bra a osi hɔn enyi do no. Ansaana obi bodu Lybia afa anhweatow no do ekopue Mediterranean Bosompo no do no, atseetsee a onyia no fa mu no, kaansa ɔtsena no kurom bɔ bra mpo a, nkyɛ oye. Nsɛm bɔn a ɔkɔ do wɔ hɔ no dze, mber pa mu no, medze bɔto gua. Yɛnhwɛ aborɔkyir ndzɛmba a wɔdze ba hɛn man yi mu no ho asɛm ansa.
Ber a Ghananyi anaa bibinyi bi fa kwan pa anaa kwan bɔn do kodu aborokyir no, ɔbɔ ne bra araa yie hwehwɛ sika nya no ho pɔgɔɔ dze bi mona ebusuafo na adɔfo. Akwantunyi yɛ mbɔbɔr dze; amandzehu a wɔfa mu ansaana woenya hɔnho no, obi nnyim. Wonya hɔnho wie a, wɔbɔ mbɔdzen totɔ aborɔkyir ndzɛmba a ɔnnsɛɛe naaso wɔmmfa nndzi dwuma bio no mona fa nsuhɛn anaa wimuhɛn do bodu Ghana. Dɛm ndzɛmba ahorow yinom bi nye freegye, bɔmframa, hɛn, adzeto daadze, kɔmpiwta, kandzea, emonoa efir na abaɛfor mfir ahorow a ɔkeka ho. Wonya ber bɔ nkorɔfo paa wɔ aborɔkyir hɔ tɔ daadze ndaka akakraka ahorow hyehyɛ ndzɛmba yinom wɔ mu dzendzenndzen dɛ kyɛnse mu nam na wɔdze fa nsu anaa wimu bodu Ghana.
Wɔdze ndzɛmba no ba dɛm a, wɔma onyia wɔdze besi no do wɔ Ghana no keyi wɔ nsuhɛn anaa wimuhɛn gyinabea. Woyi ba fie dɛm a, binom tum bue hɔn daadze ndaka no fiadze na wɔtɔn ndzɛmba no ma nkorɔfo. Binom mpo dze, wɔma atikuleta, trela, KIA anaa tipa kaar kɔtwe ndzɛmba no na wɔtɔn daadze ndaka no wɔ wimuhɛn anaa nsuhɛn gyinabea hɔ. Ɔwo a ennya sika annkɛfa wo ndzɛmba no, pɔɔto mpanyimfo bɔ no donkomi ma nkorɔfo bɔtɔ no adofode. Binom so tum bue fiadze dze ma aborɔkyir ndzɛmba no na wɔtɔn ndzɛmba no ma nkorɔfo. Ɔnam dɛ ndzɛmba no yɛ ndzɛmba a wɔdze edzi dwuma pɛn na mbom ɔnnsɛɛe no ntsi, mpɛn pii no, bo no wɔ famu kyɛn ndzɛmba a ɔyɛ amon koraa no. Nkorɔfo wɔ gyedzi bi wɔ ho dɛ, ndzɛmba a wɔtse dɛm no kyɛr osiandɛ ofi aborɔkyir mbeambea a wɔyɛ ndzɛmba apapa. Dzin a nkorɔfo taa dze frɛ ndzɛmba yinom nye ‘Home Use’, ‘As it is’, ‘Bɔla Goods’ na dza ɔkeka ho.
Ndzɛmba a wɔtse dɛm yi, ɔnam dɛ wɔdze edzi dwuma pɛn no ntsi, enyinam ahoɔdzen a ɔtwe ber a wɔdze ridzi dwuma no wɔ sor papaapa. Edze ɔno to nkyɛn a, ɔsan so wɔ nsunsuando wɔ hɛn wimu mframa n’atsenae no do. Dɛm ntsi, Ghana aban mmpɛ dɛ ne mamfoe dze bedzi dwuma wɔ ne man mu. Iyi ama aban dze mbra aba dɛ mma amamfo nnkra bi mmba hɛn man yi mu bio. Afe 2013 mu no, aban dze ne nsa too freegye na mfir a wɔdze moto dzi dwuma a ɔmamfo kra ba Ghana no do. Annso hɔ ara, Sanda 31, 2023 mu no, Ghana Asoɛe a wɔhwɛ Enyinam Ahoɔdzen Nsɛnsɛm do dze abɔto gua dɛ, ɔdze mbra ato ndzɛmba a wɔdze edzi dwuma pɛn a wɔkra fi aborɔkyir ba ɔman Ghana mu no do. Dɛm ndzɛmba yinom bi na wɔka do yi:
1. Bɔmframa ahorow
2. Kɔmpiwta ahorow
3. Transfɔma
4. Adzeto daadze
5. Nsuhyew kɔɔpow
6. Kandzea ahorow
7. Efir a wɔdze ka edziban hyew
9. Emonoa efir
10. Tɛlɛbihyɛn
11. Adzehor efir
Asɛm yi bae no, nkorɔfo pii na wɔakasa estia. Tsitsir a ɔwɔ mu nye Yapei-Kusawgu hɔn Mbrahyɛbaguanyi a wɔfrɛ no John Abdulai Jinapor. Ɔkyerɛ mu a, nhyehyɛɛ a ɔtse dɛm no bɛma hɔn a wodzi gua a ɔtse dɛm no hɔn edwuma asɛɛ na afei so, ɔbɛma ndzɛmba mu ayɛ dzen wɔ hɛn man yi mu. Dza ɔdze sɔɔw do no bi nye yi:
“Aban ne nhyehyɛɛ a ɔdze faa Asoɛe a Wɔhwɛ Enyinam Ahoɔdzen Nsɛnsɛm do dɛ ɔdze ne nsa ato ndzɛmba a wɔdze edzi dwuma pɛn a wɔkra ba hɛn man mu no yɛ dzen na otwar dɛ aban san hwɛ mu bio. Dza ɔhaw adwen wɔ ho kɛse kɛse no nye ber a wɔammfa amma hɔn ansaana ɔdze mbra yi rebɛyɛ edwuma no. Mbra a ɔtse dɛm a no ho nsunsuando yɛ kɛse no, obeye dɛ aban bɛma eguadzifo mber kakra ma hɔnho agye mbra no mu ansa, nkankan ber a ndzɛmba mu ayɛ dzen no”.
Obiara rekyerɛ n’adwen wɔ asɛm yi ho. Ana otwar dɛ aban kɔ do ara dze mbra yi dzi dwuma? Kyerɛ w’adwen wɔ hɛn sohyial midia prama ahorow no do.
