Mbrahyɛbaguafo dze dapɛn kor dzii anokɔnkɔ wɔ afe 2023 Sikasɛm Nhyehyɛɛ no ho yɛɛ mu mpɛnsampɛnsamu wiei no, wɔagye ato mu dɛ Asoɛe a ɔhwɛ Sikasɛm do no mfa no mu nhyehyɛɛ no ndzi dwuma wɔ afe 2023 a ɔreba no mu. Anokɔnkɔ no hyɛɛ ase ber a Soɛfo a ɔhwɛ Sikasɛm do, Onyimnyamfo Ken Ofori-Atta, dze Sikasɛm Nhyehyɛɛ no bɔtoo mbrahyɛbaguafo no enyim dɛ mbrɛ mbra kyerɛ no wɔ mbrahyɛbaguafie, ma n’ekyir no, wɔkɔr ho dwumadzi adzesua wɔ Firaw Mantɔw mu bae no.
Ɔwɔ mu dɛ da a Onyimnyamfo Ken Ofori-Atta dze Sikasɛm Nhyehyɛɛ no robɔto mbrahyɛbaguafo no enyim no abaguafo kɔr fie hɔ wɔ hɔn dodow mu dze, woketsiee no kommyɛ mu a dedeyɛ kɛse biara annkɔ do dɛ mbrɛ ɔtɔ kɔ do wɔ fie hɔ mfe a etwa mu no. Wɔhyɛɛ anokɔnkɔ no ase no, fie hɔ daa mpan wɔ dwumadzi no mu mpɛn dodowara. Ɔnam iyi do ma dɔmkumaa no dzii ho abooboo kyerɛɛ fie hɔ guamutsenanyi na Ɔkasafo no.
Iyinom nyinara ekyir no, da odzi ewiei wɔ anokɔnkɔ na mpɛnsampɛnsamu no mu no, nyia owiee anokɔnkɔ no nye Soɛfo a ɔhwɛ Mbrahyɛbaguafie Dwumadzi do, Onyimnyamfo Osei Kyei-Mensah-Bonsu. Nyia ɔdze ne nsɛm too gua ana ɔno rubowie nye Dɔmkumaa no hɔn baanodzinyi, Onyimnyamfo Garuba Iddrisu.
Abaanodzifo beenu no dze hɔn kasaa gui no, Ɔkasafo na Guamutsenanyi ma mbrahyɛbaguafie no, Onyimnyamfo Pa Alban Kingsford Sulemana Bagbin, dze ne nkasaho too gua, na dɛ mbrɛ mbra kyerɛ no, ɔmaa ho kwan dɛ wɔntow do amba dɛ wɔgye to mu anaa wɔnngye nnto mu.
Ambatow no wiei no, dɔmkɛse no gyee too mu dɛ wɔmfa nhyehyɛɛ no nyɛ edwuma. Ɔwɔ mu dɛ dɔmkumaa kyerɛ dɛ nhyehyɛɛ no nnyɛ dza ɔdwen Ghanafo a wɔwɔ ahokyer mu seseiara ho dze, ambatow no nsunsuando no kyerɛ dɛ wotum dze nhyehyɛɛ no yɛ edwuma.
Dza aka ekyir nye dɛ ekuwekuw ahorow na Asoɛe ahorow hɔn kyɛfa wowɔ nhyehyɛɛ no mu no bedzi ehyia adwendwen mbrɛ hɔn so wɔdze nhyehyɛɛ no bedzi dwuma.
