Asaasewosow yɛ nkekaho bi a ɔkɔ do wɔ asaase yi a yɛnam do yi n’ase awerɛfirmu. Mfomdo anaa nkekae bi kɔ do ma dɛm ntsi, ɔdze asaasetsirmu ndzɛmba bi a nkyɛ obiara nam no kwan do no bobɔ mu. Ɔtɔfabi so a, ɔnam hyew a ɔwɔ asaasetsirmu no ntsi, mbobaa bi tum nan, nantsew asaase no mu, na awerɛfirmu ara, ɔma no mu do punkum fi asaasetsirmu ba. Ɔba no dɛm a, asaase enyi a hɛn yɛtse do yi wosow. Sɛ dɛm nwosowee yi ba a, otum bubu adan na ɔsɛɛ ndzɛmba pii so.
Sɛ yɛhwɛ mbrɛ Ghana ha tse na yɛdze toto aman bi ho wɔ asaasewosow ho a, nna hɛn ha yie koraa. Mantɔw a asaasewosow ne ka wɔ mu wɔ Ghana ha nye Nkran Kurowpɔn Mantɔw mu. Mpɛn pii no asaasewosow a n’ano nnyɛ dzen taa sisi Nkran na no nkwaado.
Asaasewosow a n’ano yɛ dzen kɛse nye dza osii Nkran wɔ Obiradzi 22, 1939 no. Nna wɔabɔ anafua ndɔnsuon mpaamu. Odzii bɛyɛ par eduasa. Beebi a no mu yɛɛ dzen papaapa nye Nkran Kurom, Weija, Fɛtɛ, Nyanyano, Pokuase na Sakumɔno baka no mu.
Adzesɛɛ kɛse a osii wɔ Nkran nye dɛ nyimpa duesia wuwui, na nyimpa ɔha eduasa so pirapirae. Adan pii so bubui na bi so kyeakyeae. Oblogo so nyimpa kor wui na kakra so pirapirae. Nkurow pii wɔ hɔ a, no mu nkorɔfo kakra pirapirae. Nyanyano adan nyinara bubui.
Mpɛn pii no, yɛtse dɛ asaasewosow sisi amanaman bi mu. Sɛ yɛdze toto dza osii wɔ Nkran ha yi ho a, nna hɛn dze yi suar koraa.
Asaasewosow tum ma po mu nsu ma no mu do kɔ sor anaa ɔba ase. Dɛm adze yi bi sii wɔ Japan wɔ afe 1923 mu. Ndaansa yi ara so, Mumu 26, 2004 mu no, dɛm adze yi bi sii wɔ Indonesia na supruw ahorow a ɔwowɔ hɔ nyinara mu. Ɔkɔree araa kɛpeem India. Wɔfrɛ no Tsunami. Sɛ etse mpoano na awerɛfir mu ara ihu d3 po no ama no mu do kɔ ekyirekyir a, guan kɔ w’enyim ekyirekyir. Bi a na Tsunami nam kwan do reba.
