Akenkan do wɔ mfaso pii. Akenkan ma adwen mu bue. Akenkan tum ma awerɛhow tu yew. Sɛ itum kenkan yie a, ɔma itum sua adze kɔ ekyir, na ɔma itum so kyerɛ wo mfɛfo adze. Nyimpa binom wɔ hɔ a ɔbra mu abɛbrɛsɛ na kɛdaannda ntsi, wɔkɔ hɔn kɛtɛ mpa do mpo a, wonntum nnda. Sɛ obi a ɔwɔ dɛm ɔhaw yi nya buukuu bi kenkan a, otum da fɔɔm dɛ ma onnyi ɔhaw biara.
Sɛ obi mpo nya biribi ho suro anaa ayamuhyehye mpo ma ɔpɛ dɛ ɔyɛ no ho bɔn a, akenkan tum gye dɛm nyimpa no fi no suro mu na ɔdze enyigye brɛ dɛm nyimpa yi.
Bio, ɔboa ɔkenkamfo no ma onya nkasafua afofor so pii. Iyi boa no ma n’ano tsew yie wɔ kasa no ho, na ɔsan so nya tum wɔ kasa no do.
Ɔkenkamfo no tum nya adwenmubue fa abɔdze nkaa a etwa hɛn ho ehyia no ho. Abɔdze binom tsedɛ nsu, mbowa, ndua, ewia, nworaba na dza ɔkeka ho.
Sɛ ɔbaa bi fa yafun na ne nyinsen mu mpo no ɔtaa kenkan pii a, dɛm ba no taa yɛ soronko. Dɛm abofra no taa yɛ abofra bi a otum hu adze wɔ Skuul papaapa na ɔda nsew koraa; ntsi mo nuanom mbasiafo, ɔyɛ a, hom mma yɛnkenkan pii wɔ ber a yɛafa yafun.
Ibenya dɛ itum kenkan yie ma no mu da hɔ dɛ mbrɛ ɔbɛma atse ma erekenkan no ase?
Akenkan ma enyigye. Otum so ma mpuntu. Bɔ mbɔdzen sua akenkan yie.
Sɛ ɔba no dɛ inntum nnkenkan yie a, ɔma akenkan yɛ enyihaw. Tse dɛ ‘wɔnnkɔ’ na aka no “wɔnkɔ”. Ɔba no dɛm a, ɔmma ɔwo na etsiefo no ntsease wɔ akenkansɛm no mu.
Sɛ epɛ dɛ ihu akenkan yie a, fa akenkan yɛ wo dua a ebɔwe no dabiara. Nyimpa pii ano nntum Mfantse akenkan. Hɔn a wonntum nnkenkan Mfantse yie taa ka dɛ Mfantse akenkan yɛ dzen. Mususu dɛ, ɔyɛ sua mbom na yɛnntaa nnsua Mfantse akenkan. Obi a ɔnnkɔr skuul da tum kenkan Mfantse papaapa ara yie. Iyi kyerɛ dɛ Mfantse akenkan nnyɛ dzen. Mfantse akenkan yɛ dɛw.
Mfantse akenkan do wɔ mfaso pii araa yie. Ndɛ, nwoma beberee na woetsintsim no Mfantse kasa mu. Ɔwɔ dɛ ihu Mfantse akenkan yie na akenkan wɔ hɔ yi, obue adwen mu.
