Wii, ahataw a dodowara frɛ no ahaban tetekuaamoa, ahataw, ahaban, ntampe na edzin ahorow a ɔkeka ho yɛ dzin bi a ano bɔ do pɛr, nna adwen bi abataa ekyir. Hɔn a wɔdwen dɛm fa ahataw a ɔka ahataw a bɔadze abɔ dɛ yendzi bi na yɛmfa bi nsa yar no ho no, ehwehwɛmu kɔfee a, wɔwɔ hɔn siantsir. Dɛm siantsir no bi nye dɛ, Ghanaman na Ebibiman nkaa mu mbabun hyew ahataw yi no mbordo mu a, wɔdze yɛ dza ɔnnsɛ. Hɔn a wɔnndwen bɔn mmfa ahataw no ho no dze, wohu dɛ, ɔyɛ ahataw bi a ahoɔdzen, enyigye mbordo na dɛw ahyɛ mu. Dɛ Ghana mbrahyɛbagua ngye ahataw no nto mu anaa mma ɔnngye nnto mu yɛ anokɔnkɔ a atsena ɔman no kɔn do akyɛr yie papaapa.
Ayɛwoho, 2023 na Ghana mbrahyɛbagua gyee wii no nduae, no ntɔnee na n’apɔwmudzin na ndwumakuw ahorow dwumadzi too mu. Egyinae a Ghana mbrahyɛbagua esi yi kyerɛ mbrɛ Ghanaman no atwe mbra a nna ɔwɔ wii ho no asan. Mbrɛ ɔman no ne sikasɛm ntotoe ayɛ ma ndzɛmba ayɛ dzen no, aban ehu dɛ mfasodze a ɔwɔ ahataw no ho no, sɛ ɔdze enyi to do a, ɔbɔboa ɔman no. Seseiara dze, Ghana abɛka amanaman ahorow a wɔagye wii ato mu dɛ wɔmfa ndzi dwuma ahorow, tsitsir n’apɔwmdzen na no ndwumakuw dwumadzi no.
Ghana mbrahyɛbagua emmpetuw ara anngye ahaban no ne mbra no annto mu. Ɔnam nhwehwɛmu do, ebisaa na ngyinadodze bi a ɔda apɔwmudzen ho mfaso a ɔwɔ ahaban no do sii egyinae a ɔtse dɛm. Apɔwmudzen edwumayɛfo, nhwehwɛmuyɛfo na ndwumakuw ahorow a wɔnnhyɛ aban ase dze hɔnho gyee egyinaesi no mu bi. Apɔwmudzen edwumayɛfo tsitsir maa aban tsee ase dɛ, wotum dze ahataw no sa yarba ahorow bi tse dɛ kɔannkɔ etsipaa, ahohim, abofon a ano yɛ dzen na dza ɔkeka ho. Iyi yɛ asɛndɛw ma tsitsir ayarfo a wɔyar yarba ahorow a ɔtse dɛm no.
Mbra no ne dzin nye “Narcotics Control Commission Amendment Bill 2023”. Mbra no bɛma kwan ma Soɛfo a ɔhwɛ ɔman no mu nsɛnsɛm do kwan ma ɔaama amamfo tum nkrataa ma wɔdze edua ahaban no. Iyi bɔboa ma edwuma ahorow aba ɔman no mu ma ɔman ne sikasɛm etu mpon. Asaase Efuwa a Nyame dze akyɛ Ama Ghana no bɔboa ahataw no no nduae. Ahaban no bɛsan atwetwe aborɔkyir aman ahorow aba ɔman no mu ma wɔnye no ebedzi gua. Iyi bɛma hɔn sika a wɔdze bedzi gua no aka ɔman no mu na aaboa etu ɔman no ne sikasɛm mpon.
Wii mbra a Ghana mbrahyɛbagua agye ato mu no nnkyerɛ dɛ hɔn a wɔnom enya kwan dɛ wɔnnom no gyangyan dɛ mbrɛ wɔpɛ na bea a wɔpɛ. Aban no agye ato mu ama Apɔwmudzen asoɛe na ndwumakuw ahorow na hɔn a ɔbɛma hɔn ho tum nkrataa dɛ wondua no nko. Onnyi dɛ amamfo fa ho we nkokɔ dze yɛ dza ɔnnsɛ. Ghana aporisifo ayɛ krado dɛ wɔnye hɔn a wɔhyew ahataw no wɔ mbeambea a ɔnnsɛ no bedzi. Kaansa asɛm pa aba mpo a, otwar dɛ etse ase yie amma aammfa woho annkɔto ɔhaw mu. Aso ahaban tetekuaamoa a Ghana mbrahyɛbagua agye ato mu no, oye anaadɛ ɔnnyɛ? Kyerɛ w’adwen wɔ hɛn prama ahorow a ɔwɔ Sohyial midia no do.
