Obiradzi 3 yɛ da bi a ɔda abakɔsɛm yayaayaw bi edzi wɔ Ghana n’abakɔsɛm mbuukuu mu. Da no yɛ da a Ghanaman no na Ebibiman dze kaakaa atoyerɛnkyɛm kɛse bi a nsuyirii bi dze bae wɔ Nkran no. Dɛm da no wɔ afe 2015 mu no, nsu kɛse bi tɔree ma oyirii na ɔnam do ma atoyerɛnkyɛm bi a ɔdze bae no, sɛbew, hɔn a wɔtɔree hɔn adɔfo nkɔ do ara nhyɛ dzen. Da yi yɛ awerɛhow da a Ghanaman no dze kaa kaa hɔn a wɔtɔree no nyinara. Mfe pɔr pɔr awɔtwe nye yi.
Obiradzi 3 Nkran nsuyirii na gyahyehyew atoyerɛnkyɛm no yɛ atoyɛrɛnkyɛm bi a ɔnam nsu bi a oyiir Nkran Kurowpɔn no no nsuka akɛse na nkakramba nyinara do na ɔbae. Mbrɛ nna nsu no n’anoɔdzen tse no maa oyirii faa Nkran Kurowpɔn no no nkurow dodowara, nkankan Kwame Nkrumah ‘Circle’ a ɔwɔ Nkran na no nkwaado.
Nsutɔree no hyɛɛ ase Obiradzi 1, 2015 dze kesi Obiradzi 3, 2015 a atoyerɛnkyɛm no sii no. Ndzɛmba bi a ɔdze dɛm atoyerɛnkyɛm yi bae kor nye adan na egyapadze ahorow a nkorɔfo esisi no nsu akwan mu no. Nsuka a nna nwura ahyɛ mu ma ma ma no mu akyer kyɔkɔɔ no so ka ho. Annyɛ koraa no, nkorɔfo duenum (25) na wowuwui wɔ nsutɔree no nko mu. Nsuyirii no ntsi, nna ahɛn nnkɔ ma bi aba. Nna nyimpa nnya beebi mpo nngyina. Ɔnam do ma nyimpa dodowara kɛpɛɛ guankɔbea wɔ GOIL fangoobubea hɔ. Nna nsu no eyir hɔ nyinara so. Mpofrimu ara, gya bi a bɛpem ndɛ obi nnyim bea a ofi sɔɔ womu! Dɛm gya no, ɔnam dɛ nna fangoo no afora nsu no na nsu no so eyir hɔ nyinara ntsi no, gyafadum no tserɛwee kɔr mbeambea a nna nsu no wɔ nyinara kunkum nyimpa a nna hɔn dodow bor ahaebien, hyehyeew egyapadze, guamu na sikasesabea so.
Ɔyɛ atoyerɛnkyɛm bi a ɔyɛ Ghanaman no ne ntankɛse. Ber a ndzɛmba na egyapadze ahorow hyehyewee no, hɔn a nna hɔn fiefi wɔ bea a atoyerɛnkyɛm no sii no so hweer hɔn adan. Ɔnam do ma aban no pɛɛ bea maa hɔn ma wɔtsenae. Atoyerɛnkyɛm yi kyerɛ mbrɛ nkurow akɛse tse dɛ Nkran n’atoyerɛnkyɛm bambɔ nsɛnsɛm tse na hia a ohia dɛ aban no dze ne nan si famu dze nhyehyɛɛ pa gu akwan mu toto ndzɛmba yie amma dza ɔtse dɛm no eennsi bio.
Atoyerɛnkyɛm yi yɛ nkaadze ma aban no, mansin mpanyimfo na ankorankor. Ɔyɛ adze a ɔkyerɛ dɛ dza otwar dɛ wɔyɛ siw atoyɛrɛnkyɛm no ne nsii bio ano no, wɔyɛ. Otwar dɛ amamfo hwɛ hɔnho yie so nkankan ber a nsu rototɔ. Nsu rototɔ a, fangoobubea na mbeambea ahorow a ɔkeka ho no, onnyi dɛ amamfo dze hɔ yɛ hɔn guankɔbea. Otwar dɛ aban no bɔ dawur fa nsunsuando bɔn a nsuyirii dze ba no ho kyerɛ ne mamfoe amma woeennsisi hɔn adan na hɔn egyapadze wɔ nsu akwan mu.
Dɛ mbrɛ yɛrekaakaa mfe awɔtwe a atoyerɛnkyɛm yi sii yi, otwar dɛ yɛkɔ do ara ma hɔn a wɔhweer hɔn nkwa no nyinara da yie na hɔn ebusua na adɔfo nyinara so no, yɛhyɛ hɔn dzen. Da no dze, Ghanaman no dzii emia ankasa. Dɛ mbrɛ nsu gu do ara rototɔ no, Nyame nhu Ghanaman no mbɔbɔr.
