Wɔwoo Ama Ata Aidoo Ebɔw 23, 1942 wɔ Abeadze Kyiakor a ɔbɛn Akyemfo wɔ ndɛ Ghana, nkan no “Gold Coast” anaa Sika Mpoano. Ɔyɛ Ghananyi kodzikyerɛwfo na kasadwin mu kunyin a ɔnam n’akyerɛw do abɔsom Ghanaman, Ebibiman na wiadze n’afɛndzanan nyinara. Ɔyɛ Mfantsenyi na Finimfin Mantɔw mu dehye mapa a wɔtseetsee no wɔ Mfantse amambra mu. Ɔyɛ obi a ɔnam n’akyerɛw do enya nsunsuando wɔ dodowara hɔn abrabɔ do.
Ne kasadwin akwantu mu no, ɔdze akokodur kyerɛwee faa nsɛntsitsir a ɔfa mbaa ho, amambra na Aborɔfo hɔn nhyɛ aban no ho. Ɔkyerɛɛw akyerɛwtsen bi a ɔgyee dzin na ogu do ara gye dzin. Iyi nye n’akyerɛwtsen a odzi kan. Dɛm akyerɛwtsen no ne dzin nye “Our Sister Killjoy” a ɔkyerɛɛw no afe 1977 mu. Kasadwin yi kasa Aborɔfo amambra, tsitsir mbaa na mbaa, mbanyin na mbanyin na nyimpa na abɔdze nkaa hɔn awar ho na nsunsuando bɔn a onya wɔ Ebibirman do. N’akyerɛw mu no, ɔdze Ebibir mu kusum akyerɛw kɛkyɛ ahorow no dze foraa ndɛmbadze. Iyi ma n’akyerɛw biara yɛ soronko fi afofor dze ho korakoraa.
Sɛ edze n’akyerɛwtsen a nna ɔpɛ no kyerɛw papaapa no to nkyɛn a, Ɔbemfo Ama n’ahwɛgor ahorow nyinara no yɛ adze a ɔkyee bɔhwɛadzefo ankasa. Mfatoho nye n’ahwɛgor “Anowa” a ɔkyerɛɛw no afe 1970 mu no. Ahwɛgor no fa obi n’apɛdze ho na dza n’apaamufo anaa ne mamfoe rohwehwɛ dɛ ɔnyɛ ho. Kor so nye “The Dilemma of a Ghost” a ɔkyerɛɛw no afe 1964 mu no. Ahwɛgor no so kasa fa suahu a Ebibiman esuafo a wɔkɔ aborɔkyir kosua adze no nya ber a wɔdze hɔn adzesua ba ewiei na wɔba fie no ho. Asɛntsitsir a ɔwɔ mu nye amambra, tsitsir nye mbrɛ nkorɔfo fa do da hɔn amambra edzi na mbrɛ nkorɔfo hɔn amambra do huan ɔnam amambra fofor a ɔnye no nya nkitaho no ntsi.
Ɔyɛ obi a nna onndzi mbaa na mbanyin pɛrpɛryɛ ho nsɛnsɛm ho agor. Dɛm ntsi n’akyerɛw dodowara no, nna ɔkyerɛw fa atseetsee na yaw a mbaa fa mu ho. Nna ɔsan so kyerɛw fa mbaa hɔn enyidoadzehu na hɔn yieyɛ so ho. N’akyerɛwtsen “Changes: A Love Story” a ɔkyerɛɛw no afe 1992 mu no, ɔdze gyee ‘Commonwealth Writers’ abawdobɔdze a wɔdze bɔ akyerɛwfo a hɔn akyerɛw bi sɔ enyi ankasaankasa afe pɔkyee bi mu no. Iyi kyerɛɛ no mbɔdzembɔ wɔ Ebibir mu kasadwin mu.
Ne kasadwin mu konyim nyinara no, Ɔbemfo Ama yɛ obi a nna okitsa abɔdzin ahorow wɔ nwomasua mu. Nna okitsa nwomasua abɔdzin ahorow na nwomasua mu dzibew ahorow so. Afe 1982 mu no, ber a nna mampanyin dadaw J.J. Rawlings ridzi adze wɔ PNDC aban aber do no, nna ɔno nye Ghana Nwomasua mu Kyerɛkyerɛwfo. Ɔyɛ obi a ɔayɛ bi papaapa ama Ebibir kasadwin na nwomasua. Bɛpem ndɛ, ne kasadwin akwantu da ho ara hyɛ nnyɛ Ghanafo na Ebibifo nko, mbom wiadze n’afɛndzanan mu kasadwinfo nyinara nkuran. Iyi ama Ebibir mu na wiadze n’afɛndzanan abawdobɔdze ahorow nyinara no, ɔagye bi da ma ne dzin atahye wiadze n’afɛndzeanan nyinara mu.
Ber a nananom ato nsa afrɛ Ɔbemfo Ama Ata Aidoo no, Ghanafo, Ebibifo na wiadze n’afɛndzeanan nyinara mu nkorɔfo nson gu gya mu. Ɔbemfo Ama dɛ, “Dɛw biara nnyi wiadze yi mu ha” ntsi oedzi kan. Nyame mfa ne kra nsie yie.
