Ghana manpanyin Nana Addo Dankwa Akuffo Addo ahyɛ nda ebein aprɔwbɔ ase wɔ Fraw Mantɔw mu. Aprɔwbɔ yi hyɛ ase ndɛ, Dwowda, Fankwa 12, 2022 dze kesi Benada, Fankwa 13, 2022. Aprɔwbɔ yi mu no, Ɔmanpanyin bɔkɔ mbeambea a dwumadzi ahorow rokɔ do na afei ɔapa dza a wɔayɛ ewiei no ho tam.
Dwowda, Fankwa ne da a ɔtɔ do du-ebiasa no, Ɔmanpanyin Nana Addo Dankwa Akuffo Addo bedzikan akobue dwumadzi bi a Ghana mbranyimfo kuw reyɛ ano wɔ Ho, Fraw Mantɔw mu. Ɔmanpanyin wiei no dɛm a, ɔbɔkɔ akopue mu wɔ Stone City Kasafir do nye hɔn akɔtwetwe nkɔmbɔ.
Ɔnnso hɔ ara, Ɔmanpanyin bɛsɛn atoa n’aprɔwbɔ do akɔ Kpeve akɔhwɛ Epue Mantɔw mu akwan a wogudo reyɛ a wɔato ne dzin ‘Eastern Corridor Road’’ na ɔnye ‘Agenda 111’’ asopitsi dwumadzi a no so wogudo reyɛ wɔ South Dayi abatow mpesua no do. Ɔmanpanyin nye Ahemfo a wɔwɔ Kpini na ne nkado bedzi ehyia akɔhwɛ ‘’Steel bridge’’ a wogudo reyɛ no. Iyi ekyir no Ɔmanpanyin Nana Addo Dankwa Akuffo Addo dze ne Dwowda aprɔwbɔ no bɛba ewiei.
Aprɔwbɔ no ne da a ɔtɔ do ebein no, Ɔmanpanyin bedzi kan akɔhwɛ Ghana Secondary Cities Support dwumadzi no wɔ Ho na ɔakɔ nserahwɛ wɔ Artillery Regiment Millitary Barracks a no so wɔ Ho hɔ ara. Ɔmanpanyin Nana Addo bɔtoa do akɔ Tongu abatow mpesua do akɛpa Tongu asɛndziibea a woesi no fofor wɔ Tongu Mansin no mu no no ho tam. Iyi ekyir no Ɔmanpanyin nye Ahemfo mpanyimfo a wɔwɔ Battor na ne nkado bedzi ehyia nye hɔn enya nkitsahodzi na afei ɔdze n’aprɔwbɔ no aba ewiei.
