Ber a yesuar no, nna eduaba bi wɔ hɔ. No dua ho yɛ nsɔɛnsɔɛ nko na otum nyin yɛ kɛse dɛ onyina. Eduaba yi tum fifir wɔ hɛn efiefi na otum fifir so wɔ nwuramu.
Obi innyim ber pɔkyee a eduaba yi fa do sow na mbom dza nna yehu araa nye dɛ asow ma bi ayɛ ebunebun tse dɛ borɛdze bun na bi so aber gyakagyaka apaapaa a nnoma na mbowa horow gu do ridzi bi. Ɔyɛ eduaba bi a nna yɛbɔ adwe dze dzi. Modɔ woara, edze adwe rowe eduaba yi a, bɛka dɛ edze merekye nkotsee dze afɔw gare na esikyire; dɛdɛɛdɛw sokosoko dɛmara. Wo yamu mpo a nkyɛ innkedzi etu ase. Ekaa Ghana ndwontonyi Castro no ndwom no a no mu nsensanee no bi nye ,“Aduaba bɛn koraa a o aduaba bɛn? Madi adi a ɛnsa da ooo dɛdɛɛdɛ”. Nkyɛ akaa? Ɔyɛ me dɛ eduaba a mereka ho asɛm yi na aberantsɛ yi hwɛɛ do bɔɔ no ndwom yi.
Nokwar, “Obisafo nnyew kwan”. Megye dzi dɛ ehu eduaba a mereka ho asɛm yi na mbom asɛmbisa no nye dɛ, ana inyim ne dzin? Dɛ ɔyɛ no Borɔfo dzin anaa ne Mfantse dzin no, inyim? Medze m’enyi faa mframa mu no, binom dɛ wɔfrɛ no ‘prison gourd’ ɔnam nsɔɛnsɔɛ a ɔwɔ no dua no ho no ntsi. Binom so se wɔfrɛ no ‘please and god, pleasing God, adwe n’akonta, akokɔ dɔkon, peace and God, pris and gord, prisan gord’ na dzin ahorow a ɔkeka ho. Obi so kyerɛɛ n’adwen dɛ, eduaba yi yɛ eduaba bi a woduaa no ber a Ngyiresi Wales ɔhenba dzii kan baa ɔman Ghana no ntsi dzin a amamfo dze frɛɛ no araa nye ‘Prince of Wales’ na Mfantsefo etwuw afa do araa ma ndɛ abɛdan edzin ahorow a yenyim yi.
Nhwehwɛmu kakra a akannews.com yɛe faa ho no kowiei dɛ, eduaba yi fi edua ebusuakuw ‘Fabaceae’ mu na dodowara frɛ no Borɔfo kasa mu dɛ Manila Tamarind, Samania saman, Madras thorn, Monkeypod tree anaa Camachile, na edzin ahorow a ɔkeka ho.
Asɛmbisa a akannews.com ribisa n’akenkanfo nye dɛ, ana inyim eduaba yi ne Mfantse anaa ne Ghana kasahorow biara dzin? Inyim a, kyerɛ w’adwen wɔ adwenkyerɛ adaka a ɔwɔ ase hɔ no mu ma yɛnhwɛ dɛ nokwar, inyim eduaba yi ampaara a.
