Aban ayɛ krado sɛ ↄde ɛboↄ foforↄ a wↄde rebɛtoto kookoo so no bɛto dwa wↄ nnawↄtwe a yɛbɛsi mu no ahyɛseɛ wↄ ɛda a wↄde rebue kookoo mmaeɛ mmerɛ no ano no. Apamfo a wↄrehwɛ ɛboↄ mono yi ho nsɛm so no nso gu wↄn dwumadie so a afei na wↄrebɛsi gyinaeɛ a ɛtwa toↄ.
Wↄfiri tete ahyɛ kookoo akuafoↄ a wↄwↄ ↄman yi mu nkuran de ato wↄn anim sɛ wↄnyae sɛ wↄtↄn wↄn nsase de ma fam agudetufoↄ a mmara mma wↄn dwumadie no ho kwan no, sɛdeɛ ɛbɛyɛ a wↄbɛboa aban no ama wako atia saa nkurↄfoↄ yi a dodoↄ no ara nim wↄn sɛ galamsey foↄ no dwumadie no.
Adwumakuo yi mu mpanimfoↄ a wↄhwɛ saa fa yi so no kyerɛ mu a, sɛ yɛanhwɛ saa nneyɛɛ yi yie a, ɛbɛyi mfasoↄ a yɛnya firi kookoo mu no nyinaa afiri hↄ.
Aban no kaa nsɛm pii, ne ha a ɛha no sɛ wↄgu so ara tontↄn mfusase, ne titire ne mfusase a kookoo wↄ soↄ no de ma galamsey foↄ.
Akyinyegyeɛ biara nni ho sɛ akuafoↄ a wↄwↄ mmeaeɛ a wↄdua kookoo no mu dodoↄ a wↄwↄ ↄman yi mu no retontↄn wↄn kookoo mfuo de ma galamsey foↄ, ɛnna wↄn nso gu so ara resɛ nsase ne nsuo.
Seth Kwame Acheampong a ↄyɛ Mantam Soafoↄ de ma Apueeɛ Mantam rekasa wↄ nna nnan a wↄtu sii hↄ de bↄↄ kookoo ho dwa no mu, ɛda a ɛtwa toↄ a na wↄde rewie dwumadie no ase wↄ Suhum no, ↄhunuu no sɛ “sɛ yɛanhwɛ kookoo nsase a wↄtontↄn ma galamsey foↄ no yie a, ɛbɛma kookoo ho dwumadie no agu.”
Alhaji Abubakari Alhassan de adesrɛdeɛ too aban no anim sɛ ↄnyere ne tam mu wↄ ↄsa a ↄretu atia galamsey no mu sɛdeɛ ɛbɛyɛ a wↄbɛtumi agye kookoo ho dwumadie ne ɛho nsɛnsɛm no asi hↄ. Ↄde saa nsɛm yi too dwa berɛ a na ↄregyina ↄpanin a ↄda Kookoo ne Kↄfe Akuafoↄ ano no anan mu de n’anodisɛm ato dwa no.
Ↄpanim pa a ↄda COCOBOD fipamfoↄ ano, Owura Peter Mark Manu de n’anodisɛm reto dwa no, ↄdaa no adi sɛ kookoo akuafoↄ ahomegyeɛ sikasɛm ho nhyehyɛeɛ a wↄde reba no bɛhyɛ aseɛ wↄ bosome wei mu.
Ↄnam saa akwanya yi so see kookoo akuafoↄ sɛ, “montwe mo ho mfiri kookoo mfuo a motontↄn ma galamsey foↄ ne mmↄfra a mode wↄn adane apaafoↄ wↄ mu mfuo mu no ho.
Ↄkyehene Amoatia Ofori Panyin a ↄyɛ Akyem Abuakwa hene a na ↄyɛ otitenani de ma dwumadie yi a ɛne COCOBOD mfenhyiadadie a ɛtↄ so 75 hyiaeɛ no de too dwa sɛ, wↄmma anigyeɛ a Ghana wↄ wↄ kookoo nsɛnsɛm ho no nsane nsi ne dadaa mu, wↄ berɛ a wↄrema wↄn ani aku kookoo kuani no anigyeɛ ho yie.
Ↄsoafoↄ abɛdiakyire a ↄhwɛ aduane ne kuayɛ nsɛm so no gyinaa ne panin, Dr. Afriyie Akoto anan mu kasaeɛ no, ↄka kyerɛɛ kookoo akuafoↄ no sɛ wↄnya ↄtwɛn honhom berɛ a aban no reyɛ ntotoeɛ de kookoo boↄ foforↄ no ato dwa nnwawↄtwe a yɛbɛsi mu no mu no.
Ɛwↄ mu yie pa ara sɛ ↄman yi mu ayɛ hye deɛ, nanso ɛsɛ sɛ yɛdwene hwɛ kan. Sɛ yɛdi ahokyerɛ a yɛrekↄ mu seesei no akyi a, yɛbɛtↄn yɛn nnepa ama yɛn ho akyere yɛn daakye. Yɛbɛsrɛ akuafoↄ sɛ wↄbɛnya abadaeɛ na wↄadwene wↄn mma ne wↄn nananom ho, na wↄagyae wↄn kookoo mfuo no tontↄn. Afei, mesusu sɛ, sɛ aban di wↄn ni, na ↄma wↄn deɛ wↄn akoma pɛ ma wↄn ahokyerɛ no so te a, wↄn ani bɛba fam ama wↄagyae nsase no tontↄn, ɛfiri sɛ, mpanin se: “Wↄnsↄ mu wↄnsↄ mu, ɛno ara ne nnipa.” Adepa nso wↄ fie a ɛyɛ.
