Ɔtɛmmuafoɔ Olalekan Olatawura a ɔwɔ Asɛnnibea Kɛseɛ a ɛwɔ Ado-Ekiti wɔ Alataman mu ahyɛ sɛ aberanteɛ a ne din de Ojo Adebayo nkɔda afiase ne nkwa nna nyinaa. Asɛm yi sii Wukuada, Ɛbɔ 14, 2022.
Berɛ a Alata Kaseɛbɔ Adwumayɛkuo, News Agency of Nigeria (NAN) de nsɛm yi mu nkyerɛmu reto dwa no, wɔkaa sɛ bosome Ɔbɛnem no mu wɔ mfeɛ mpenu ne aduonu mmienu yi ara mu na wɔde soboɔ yi bɔɔ aberanteɛ no sɛ wafeefee abotofowa bi a wadi mfe nkron.
Ɛfiri saa berɛ no, wadi asɛm yi ho akɔneaba wɔ asɛnnibea hɔ ara kɔpem sɛ Wukuada no, aberewa yii poma kwan mu maa wɔde yie too deɛ ɛda.
Ɔtɛmmuafoɔ Olatawura redi asɛm no, ɔkaa sɛ, sɛ ɔde n’ani bu nsɛm wɔreka ne nkyerɛkyerɛmu a abotafowa no kasamafoɔ no de reto dwa no a, ne nyinaa da no adi pefee sɛ ɛyɛ ɔbarima a wɔde kwaadu abɔ no no ara na ɔtoo abɔfra no mmonaaa.
Ɔkaa no sɛ, “nsɛm yi nyinaa mu no, manya adanse biara a ɛkyerɛ sɛ, ɛnyɛ obiara sɛ saa ɔbarima yi ara na ɔfeefee abɔfra no.
“Ne saa nti, ɔbarima yi di fɔ wɔ asɛm yi mu.
“Yei nti, mehyɛ, sɛdeɛ mmara kyerɛ no, sɛ ɔnkɔda afiase ne nkwa nna nyinaa. ”
Alata Kaseɛbɔ Adwumayɛkuo, News Agency of Nigeria (NAN) na wɔde nsɛm yi nyinaa too dwa.
Amanebɔ kyerɛ sɛ, Adebayo dii saa animmɔnhosɛm yi Ahinime 8, 2021 wɔ Ilogbo Ekiti, a ɛwɔ Ido/Osi LGA wɔ Ekiti. Krataa a wɔde bɔɔ no soboɔ no kyerɛ mu a, ɔbarima yi nneyɛɛ no tia Ekitifoɔ Mmɔfra Faahodie Mmara a wɔyɛɛ no 2012 mu no fa a ɛtɔ so 32 no nkyekyɛmu 2.
Abɔfra no anomsɛm a ɔde too dwa ne sɛ, “Meyɛ abɔfra a mekɔ sukuu a megyina gyinapɛn mmiɛnsa, mete me nanabaa nkyɛn. Owura I.D Idowu a ɔyɛ me danseni no yɛ me nuabaa panin fipamni.”
“Saa da no, na meresa nsuo na ɔfrɛɛ me sɛ menkɔfa biribi mma me nanabaa.
“Meduruu hɔ no, megyinaa ɛkwan no ano, ɛnna ɔkaa sɛ menwura ɛdan no mu nanso mampene. Ɛhɔ ara na ɔyeree me de ne nsa kataa m’ano twee me wuraa ne dan mu.”
Ɔfeefee abɔfra no wiee saa no, ɔbɔɔ no kɔkɔ dendenden sɛ ɔnhwɛ na wammɔ asɛm no so ankyerɛ obiara.
Abɔfra no nanabaa rekyerɛkyerɛ nsɛm yi mu no, ɔkaa sɛ, “Metɔɔ nnuro bi maa no na mehunahunaa no sɛ, sɛ wanka deɛ ayɛ no ankyerɛ me a mɛboro no. Ɛhɔ ara na ɔkaa deɛ ɔbarima yi de yɛɛ no nyinaa kyerɛɛ me.
Owura Julius Ajibare a ɔde asɛm yi kɔɔ asɛnnibea hɔ no de adansefoɔ num ne krataa a dɔkota twerɛ maa no berɛ a wɔyɛɛ abɔfra no mu nhwehwɛmu no na ɛkaa ne ho kɔɔ asɛnnibea hɔ de kɔfoaa abɔfra no nsɛm no so.
