Onimuonyamfoɔ Stephen Dapaah yɛ daanodini dada ma ekuo a Wɔhwɛ Ghana Aban Sikasɛm So wɔ Asante Mantam mu.
Awerɛhosɛm a abɛtɔ dwa ne sɛ, ɛnnɛ Memeneda, Ɛbɔ 10, 2022 bɛyɛ anadwo dɔnko na ogya bi a obi nnim deɛ ɛfiri tɔɔ owura yi fie wɔ Aburaso a ɛwɔ Asante mantam mu.
Yei nam so ama nnipa num apirapira pira a ɛmu yɛ den pa ara, nanso Onimuonyamfoɔ Stephen Dapaah deɛ, Ɔsoro anni ne ho afofie maa ogya no hyee no dwerebɛɛ nti ɔhweree ne nkwa amonom hɔ ara. Amanebɔ no kyerɛ sɛ, efie no yɛ ɛdan a ɛkura adankora num.
Onimuonyamfoɔ Stephen Dapaah dii mfeɛ aduoson-nan ansa na ɔrehwere ne nkwa wɔ saa akwanhyia yi mu.
Nnnipa num a wɔpirapiraeɛ no, ɛwom sɛ wɔn tebea no ani yɛ nyan deɛ, nanso wɔde wɔn akɔ Komfo Anokye Ayaresabea a ɛwɔ Kumase no mu ama wɔregye ayaresa. Ayaresabea korɔ yi ara nso na wɔde Onimuonyamfoɔ Stephen Dapaah amu no akɔto.
Nkyerɛkyerɛmu a yɛanya ne sɛ, Ghana Odumgyakuo no reyɛ nhwehwɛmu apɛ saa ogyahyehyeɛ yi farebae.
