Ghana Odumgya Adwumayɛkuo no de awerɛhosɛm yi ho amanebɔ too dwa wɔ wɔn Facebook dwumadibea hɔ Efiada, Ɛbɔ 9, 2022.
Adwumayɛkuo yi kyerɛ mu a, na abɔfra kumaa yi ne ne nuanom redi agorɔ ɛnna ɔkɔtɔɔ amena kɛeseɛ bi a watu wɔ hɔ a nsuo gu mu mu. Asɛm yi sii wɔ Ashaiman Lebanon Zone 2A wɔ Nkran mantam mu.
Odumgya Adwumayɛfoɔ a wɔgyee ɔmanfoɔ frɛ no so berɛ a wɔbɔɔ wɔn amaneɛ sɛ asɛm yi asi no kyerɛ mu a, wɔkɔduruu hɔ no, wɔhunuu sɛ na abɔfra no mpaboa ne abaduaba a na ɔne ne naunom nketewa de redi agorɔ no gu agyananbea bi ano. Ɛno nti, wɔgye dii sɛ ebia na abɔfra no nso da amena a nsuo taa mu wɔ hɔ no mu.
Adomfoɔ a wɔtete hɔ no yɛɛ mmoa firii aseɛ bubuu amena no sɛdeɛ wɔbɛtumi awura mu akɔyɛ abɔfra no mmoa. Ɛmu ara na wɔfrɛɛ Odumgya Adwumayɛkuo no. Bɛyɛ simma aduonu-nsia akyi no, mmarima no de atwedeɛ sii amena no mu kɔyii abɔfra no.
Afei, wɔyɛɛ ntɛm de no kɔɔ Trinity Ayaresabea a ɛwɔ Ashaiman no mu. Nanso berɛ a Odumgya Adwumayɛfoɔ no dii akyire kɔɔ ayaresabea hɔ no, dɔkota panin a ɔwɔ hɔ no ka kyerɛɛ wɔn sɛ wɔde abɔfra no baeɛ no, na wahwere ne nkwa dada.
Nhwehwɛmu a wɔyɛeɛ daa no adi sɛ, abarimaa a wadi mfeɛ mmiɛnsa yi tɔɔ amena no mu berɛ a na ɔne ne nuanom redi agorɔ, na ɛno nam so maa ɔhweree ne nkwa.
Afotuo a Odumgya Adwumayɛkuo no de maa ɔmanfoɔ ne sɛ, “Yɛtu awofoɔ nyinaa fo sɛ, sɛ wɔn mma redi agorɔ a wɔmma wɔn ani nkɔ wɔn so pa ara. Bio nso, ɛsɛ sɛ wɔkata amena biara a watu wɔ afie ahodoɔ anim no nyinaa so sɛdeɛ ɛbɛyɛ a ɛnkɔfa atorɛnkyɛm a ɛtete sei biara mma bio.
Yɛma abusua a wɔn dehyeɛ afiri mu no nso hyɛden.”
Awerɛhosɛm yi ama abɔfra no abusua ne ɔmanfoɔ a wɔwɔ mpɔtam hɔ nyinaa aboto pa ara.
