Nna mu nkitahodie ho hia papaapa wɔ awadeɛ mu. Susu ho wɔ wo tirim sɛ wo ne wo dɔfo bi aka mo ho abɔ mu sɛ awarefoɔ awie na afei woahunu sɛ ɔwɔ nna mu yadeɛ bi, so w’ani bɛgye anaa? Megye di sɛ anka ɛbɛha wo kakra, ɛsiane sɛ saa yadeɛ no mma wo kwan sɛ wo ne no bɛhyiam wɔ nna fa mu. Wei nti na ɛho hia yie sɛ ɔbaa ne ɔbarima biara a wɔayɛ wɔn adwene sɛ wɔware no yɛ nna mu yadeɛ ahodoɔ mu nhwehwɛmu ansa na wɔakɔ awadeɛ akwantuo no. Momma yɛnkɔ adesua no so ɛ!
Nna mu yadeɛ yɛ yadeɛ a obi bɛtumi anya afiri ne titire pa ara nna mu nkitahodie mu. Wei kyerɛ sɛ akwan ahodoɔ binom wɔ hɔ a obi bɛtumi afa so anya saa yadeɛ korɔ yi ara bi. Ɔkwan foforɔ a obi bɛtumi afa so anya yadeɛ yi bi ne sɛ ɔde biribi a ano yɛ nam a atwa obi a ɔwɔ saa yadeɛ yi mu bi pɛn adi dwuma ama no atwa ɔno nso. Ɛyɛ mogya asɛm, ɛba no saa a saa yadeɛ mmoa a ɛfiri saa nipa no mogya mu kaa adeɛ no soɔ no kɔ ɔno nso mogya mu bi. Mmom ɛnam sɛ yɛresua nna mu yadeɛ ho adeɛ nti, deɛ ɛfa nna mu ba no na yɛbɛhwɛ no kɛse.
Nna mu yadeɛ a yɛreka ho asɛm yi bi ne babaso, nkekaeɛ, kelaemidia, brɛboɔ mu haw a yadeɛ mmoa de ba (Hepatitis B & C), HIV/AIDS.
Ɔhaw ahodoɔ bebree na saa yadeɛ ahodoɔ yi tumi de ba ɔbaa anaa ɔbarima apɔmuden so. Sɛ ɛkɔba sɛ yadeɛ mmoa yi bi da adi wɔ obi mu wɔ berɛ a ɔnnim, na ɛno nti wantumi ansɔ ano a, ɛbɛtumi asi n’awoɔ ho kwan, sɛ ɔyɛ ɔbaa anaa ɔbarima.
Deɛ ɛteɛ ne sɛ, ɔbarima a saa yadeɛ yi bi wɔ ne so anhunu no ntɛm ansɔ ano ano a, yadeɛ mmoa no tumi ko tia n’ahobaa nsuo nkwammoa no ma ɔrentumi nnyinsɛn ɔbaa. Saa ara na ɔbaa bi nso anhunu sɛ ɔwɔ yadeɛ yi bi ntɛm so ansɔ ano a, mmoa no tumi didi kɔ faako a ɔbaa ne ɔbarima ho nsuo hyia ma ɛdane bɛyɛ abɔfra no hɔ sɛe saa beaeɛ hɔ. Ɛba no saa ara a, ɛbɛyɛ den ama ɔbaa no sɛ ɔbɛfa afuro, mpo ɔnyinsɛn a, ɛtumi sɛe anaa ɔpɔn.
Ɔhaw foforɔ nso ne sɛ, ɔbaa bi anhunu yadeɛ yi mu biara ntɛm ansɔ ano na ɔde nyinsɛn a, ɛbɛtumi anya nsunsuansoɔ wɔ abɔfra a ɔnyem noɔ no so ma mpo ɛtumi bɔ akɔkoa no anifira berɛ wawo noɔ no.
Ɔhaw ahodoɔ a ɛbɛtumi afiri yadeɛ yinom ho nhwehwɛmu a ɔbaa ne ɔbarima bi anyɛ mu no na yɛabobɔ binom so no. Nanso anigyesɛm a ɛwɔ hɔ ne sɛ, adɔkotafoɔ hunu yadeɛ yi ntɛm a, wɔtumi boa ɔbaa ne ɔbarima korɔ no ma wɔsi ɔhaw a anka ɛbɛba akyire wɔ wɔn awadeɛ mu nyinaa no ano kwan. Wei nti na ɛho hia yie sɛ ɔbaa anaa ɔbarima bi yɛ nna mu yadeɛ nhwehwɛmu ansa na wɔaka wɔn ho abɔ mu no.
Me dɔfo, worehunu wo haw seesei asɔ ano no yɛ pii sene sɛ wobɛbu w’ani agu ɛho nhwehwɛmu so na woakɔfa ɔhaw kɛseɛ mu daakye. Pere w’apɔmuden, na pere wo nkwa ho.
Mma wo werɛ mfiri sɛ wobɛkyɛ ama wo nua ne wo yɔnko no nso anya saa nimdeɛ yi. Wobɛtumi aka ho asɛm anaa akyerɛ w’adwene nso.
