Nnipa baasa binom ahwere wɔn nkwa wɔ lɔre akwanhyia bi a ɛsii Sunyani rekɔ Techiman kwantempɔn no so.
Wɔkyerɛ mu a, asiane yi farebae ara ne sɛ, Daewoo Matiz Taxi bi a ne nɔma yɛ BA 1163 -19 a na n’ani kyerɛ Sunyani no de kɔhyiaa Hyundai kaa bi a ne nɔma hyɛ GT 2438 -19 a na ɛno nso ani kyerɛ Techiman.
Ɛdii simma num ansa na Ghana Odumgya Adwumayɛkuo no ne Techiman Odumgya adwumayɛfoɔ no rebɛduru faako a akwanhyia no asi no ayɛ nnipa a na wɔn ho aka mu no mmoa. Adomfoɔ frɛɛ saa adwumayɛfoɔ yi berɛ a na abɔ awia 12: 01.
Nkyerɛkyerɛmu a Ghana Odumgya Adwumayɛkuo no de too dwa ne sɛ, deɛ ɛkɔfaa saa akwanhyia yi nyinaa baeɛ ne sɛ, na ahyɛnkafoɔ mmienu yi retwa afa amena a ɛdeda kwan no mu no ho, na ɛno na ɛnam so maa ɛde saa akwanhyia yi baeɛ.
Ɛsiane sɛ nnipa a na wɔtete ahyɛn mmienu no nyinaa mu pirapiraa yie nti, aprosifoɔ de wɔn duruu ayaresabea no, adɔkotafoɔ no kaa sɛ nnipa baasa a wɔtete taxi no mu ahwere wɔn nkwa dada.
Ɔhyɛnkani a na ɔretwi Matiz Taxi no ne nnipa baanu binom a na wɔtete Hyundai kaa no mu deɛ, ɛwom sɛ na wɔn pira no mu yɛ den deɛ, nanso wɔtumi yii wɔn firii kaa no mu de wɔn kɔɔ ayaresabea a wɔgu so ara regye ayaresa.
