Krachi Epuei Mansin Krakye Panyin, Owura Francis Kofi Okesu a ɔkaa nkyen gui ndaansa yi, n’ebusuafo kyerɛ mu dɛ dawurbɔ ndwumakuw binom reda nsɛm bi edzi fa hɔn dehyee no wu no ho a ɔmmfa kwan mu. Wɔkyerɛ mu dɛ nsɛm pii na dɛn dawurbɔ prama ahorow yi reda no edzi a ɔyɛ atseka nsɛm gyangyan bi a ngyinado biara nnyi ho. Iyinom na ebusua reka dɛ ɔnnyɛ adze a hɔn enyi gye ho koraa, ɔnam dɛ ɔmmfa kwan mu na onntwa yie so. Ɔnam nsɛm yinom do ma ebusua no dze krataa abɔto gua dɛ mma amansuon no nntaataa dza dawurbɔ ndwumakuw yinom rekeka yi do. Owura John Yaw Benyanasen nye ebusuanyi a ɔkasa ma Owura Okesu n’ebusua a asɛnyaw a ɔtse dɛm yi ato hɔn no. Oti Mantɔw Soafo nankasa ne Kasamafo, Owura Isaac Boamey, ka hɔn a hɔn nsa hyɛ krataa no ase no ho.
Ɔnam iyi do ma Kweku Nhyira Addo a odzi kyeame wɔ Asaase Radio hɔn ABS dwumadzi do no frɛɛ Owura Benyanase nye no twetwee nkɔmbɔ wɔ asɛm no ho. Nkɔmbɔtwetwe no mu na Owura Benyanasen reka dɛ asɛm no wɔ aporisifo nsamu a wɔreyɛ ho nhwehwɛmu. Na ebusuafo binom a wɔkɔr Kɔmfo Anɔkye Ayarsabea wɔ Kumase no abɔ hɔn amandzɛɛ dɛ adatser no apaapaa fun no ayɛ mu edwuma ewie na wɔrotweɔn wɔdze no ho nsunsuando no bɔto aporisifo enyim ma wɔdze aka ho ayɛ hɔn nhwehwɛmu. Ɔnam dɛm ntsi, wɔrohwɛ enyim dɛ aporisifo no dze hɔn nhwehwɛmu no ho nsunsuando bɔto gua, na ɔno mu na wobohu nokwar a ɔtaa hɔn dehyee no no wu no ekyir.
Owura Benyanasen kyerɛ dɛ no nua, Onyimnyamfo Okesu, nnyɛ basabasayɛnyi a ɔwɔ dɛ nkorɔfo dze dza wosusu wɔ hɔn adwenmu no susu no. Ɔkyerɛ mu dɛ Owura F.K. Okesu yɛ obi a n’enyi ku n’edwuma ho na ɔboa n’apaamufo so. Owura J.Y. Benyanase kyerɛ dɛ, “Nnyɛ ebusua no nko na wɔahwer adze, na no kurow ɔnye Krachi Epuei Mansin no nyinara na wɔahwer adze tsitsir.”.
