TV3 Ghana Guadzi nsɛnkyerɛw panyin Paa Kwesi Asare agye afe 2023 Komla Dumor abawdobɔdze a BBCfo dze bɔ Ebibir mu nsɛnkyerɛwnyi a ɔbɔ noho mbɔdzen afe pɔkyee bi mu no. Abawdobɔdze no yɛ nsɛnkyerɛw mu abawdobɔdze a ɔsom bo no mu kor, na ɔyɛ abawdobɔdze bi a BBCfo ahyehyɛ a wɔdze bɔ Ebibir nsɛnkyerɛwnyi a no mbɔdzen sɔ enyi no abaw do afe biara. Dɛ mbrɛ abawdobɔdze no ne dzin tse no, wɔdze hyɛ Ghana nsɛnkyerɛwnyi kɛse a nna ɔnye BBC yɛ edwuma a oenya ne beebi kɔ a wɔfrɛ no Komla Dumor no enyinmyam.
Abawdobɔdze no nnyɛ abawdobɔdze biara kwa; ɔsom bo ara yie. Nkyɛ Ghana hɛn enyigye a ɔwɔ ho no nye dɛn? Ɔwɔ mu dɛ Ghananyi na ne dzin da do dze, eso fitsi ber a BBCfo dze bɔbɔɔ adze no, ne mpɛn awɔtwe nye iyi, afei na Ghananyi bi etum agye bi. Afe 2015 dze no a odzi kan no, Nancy Kacungira a ofi Uganda na ɔgyee. 2016 dze no, Didi Akinyelure a ofi Nigeria na ɔgyee. 2017 dze no kɔree maa Amina Yuguda a ofi Nigeria. 2018 dze no so kɔree maa Waihiga Mwaura a ofi Kenya. Ugandanyi a wɔfrɛ no Solomon Serwanjja so gyee afe 2019 dze no. Victoria Rubadiri a ɔno so fi Kenya gyee afe 2020 dze no. Afe 2021 dze, ɔnam COVID-19 ntsi, abawdobɔdze no annkɔ amma obiara. Afe 2022 na Dingindaba Jonah Buyoya ɔno so fi Zambia gyee sii ne nan do.
Sɛ eresese hɔn a woetum agye abawdobɔdze no bi no a, Kenyaman no agye ebien; Nigeria ebien; Uganda ebien, Zambia kor. Paa Kwesi Asare na oedzi kan agye abawdobɔdze no bi ama ɔman Ghana. Iyi ama enyigye na ahosɛpɛw ahyɛ Ghana nsɛnkyerɛwfo ma. Nyɛ Ghanafo nko, Ebibiman na wiadze nsɛnkyerɛwfo nyinara enyi agye ama Paa Kwesi Asare.
Abawdobɔdze a akɔ ama Paa Kwesi no kyerɛ no mbɔdzembɔ wɔ nsɛnkyerɛw edwuma no mu. Mfe esuon nye iyi a Paa Kwesi Asare a oedzi mfe eduasa esia (36) hyɛɛ n’edwuma ase wɔ TV3 Ghana a wɔhyɛ ‘Media General’ ase no, ɔabɔ noho mbɔdzen asom yie. Ɔnam do ma mprempren yi dze, ɔno na ɔda TV3 Ghanafo hɔn guadzi kaseebɔ no ano a ɔhwɛ ma biribiara kɔ yie. Ɔhwɛ nsɛm mu fekɔfekɔ dɔ mu esukɔ hu mo nokwar ansaana ɔdze ato gua. Afei, onndzi n’edwuma ho agor koraa. Ɔnam do ma BBC mpanyimfo ahyɛ no enyimnyam a ɔtse dɛm no.
Ber a wɔbɔɔ ne dzi dɛ ɔno na abawdobɔdze no kɔ ma no no, nsɛm a ɔdze too gua no bi nye iyi:
“Emi dze, muhu abawdobɔdze yi dɛ ɔyɛ adze bi a ɔdze nsesa kɛse reba m’edwumayɛ mu na medze me nsa ebien nyinara esuo akwanya a ɔtse dɛm no mu. Ɔyɛ me ahohoahoa kɛse dɛ metum agye BBC Komla Dumor abawdobɔdze no esi me nan do. Ekyingye biara nnyi ho dɛ abawdobɔdze yi nye nsɛnkyerɛw mu abawdobɔdze a ɔsom bo ma Ebibir mu nsɛnkyerɛwfo. Komla n’adom akyɛdze no yɛ dza m’enyi gye ho ankasankasa na m’enyi agye dɛ ndɛ emi so merenantsew ne mpabowa mu”.
Ber a BBCfo abɔ Paa Kwesi Asare n’abaw do yi, ɔnye hɔn bɛyɛ edwuma abosoom ebiasa wɔ London. Obedzi dwuma wɔ BBC tɛlɛbihyɛn do, kasafir na ntanɛtse do nyinara. Ɔbɛsan so enya ntsetsee efi BBC edwumayɛfo mpanyimfo hɔ na wɔbɛfa no dɛ hɔn dze ebuebue nsɛnkyerɛw edwuma no enyi do yie akyerɛ no. Ɔbɛsan so etu kwan akɔ Ebibiman bi mu na ɔakɛyɛ kasee bi a wɔdze bɔto gua wɔ BBC do no so aka ho.
Paa Kwesi Asare atsew Ghana nsɛnkyerɛwfo enyim papaapa a otwar dɛ yɛkɔ do ara bɔ n’abaw do. Ɔnnyɛ nwanwa dɛ Ghana mampanyin n’abedzi ekyir Okunyin Mahamudu Bawumia abɔ n’abawdo wɔ Sohyial midia do. ‘Media General’ a ɔyɛ edwuma ma hɔn no so abɔ n’abaw do Amereka sika no ɔpepem du ($10,000). Bolingo edwumayɛfo nyinara bɔ Paa Kwesi n’abaw do wɔ konyim kɛse a oedzi no ho. Ɔkwabran twa par a, wɔma no mbo.
