Eyiyɛ bi kɔr do maa banyin bi a ne dzin dze Owura Wilson Gbli Nartey a ofi Ningo wɔ Nkran Mantɔw no mu. Dzin a dodowara dze frɛ no nye Tseko Wudah anaa Kokotako. Owura Wilson Gbli Nartey dzii mfe pɔrpɔr ɔha na ebiasa (103). Ber a banyin yi tse ase no, nna ne yernom yɛ eduonu(20) na sɛ wɔrekan mba a, otumii woo mba ɔha na eduonu-awɔtwe (128). Owura Wilson Gbli Nartey nyaa nanaanom a hɔn dodow yɛ ahaenum na ɔnye du (510). Iyi kyerɛ dɛ owura yi bɔɔ bra ara yie. Kurowmbafo no kyerɛ dɛ nna Owura Gbli Nartey yɛ nyimpa nna ɔyɛ n’asɛdze dɛ mbrɛ agya pa biara bɛyɛ ama ne mba. Wɔkyerɛ a, oyii ne yamu ara hwɛɛ ne mba no nyinaa. Owura yi yɛ nyimpa a nna dodowara dze obu ma no ɔnam no mbɔdzembɔ ntsi.
Owura bi a ne dzin dze Nartey Jokshan kyerɛ dɛ, ndzɛmba ahorow pii na Owura Wilson Gbli Nartey yɛɛ wɔ Ningo. Odzikan. Owura yi na ɔyɛ “Modern Ghana Construction and salt factory” na “Morden Ghana Builders” edumakuw no no wura na ɔkyerɛ dɛ n’abrabɔ bɔkɔdo ara atsena hɔ daa. Ɔkɔr do kyerɛɛ mu dɛ, ɔnam Owura Wilson Gbli Nartey do na enyinamkandzea baa Ningo. Ɔdɛ, ɔnoara so na ɔyɛɛ Old Ningo dze kɔ Lekpongunor san dze kesi Tsopoli lɔɔre kwan no. Owura Nartey noara so na ɔhyɛɛ Ningo mpanyimfo nsɔwdo skuul ase. Iyinom nyinaa kyerɛ dɛ ɔtsenaa ase no, ɔbɔɔ bra pa a ɔsɔ enyi ara yie.
Opanyin Nartey Jokshan ne nsɛm mu no, ɔdze too gua dɛ, Owura yi a oeenya ne beebi kɔr yi ara so na osii Ningo ayarsabea, aporisifo hɔn edwumayɛbea, Damgbe West District assembly, bea a wodzi lɛta ho dwuma wɔ, Ningo (Ningo post office), “Ningo caustic soda factory” a ɔno dze oeenntum ennwiei na afei bea edwumayɛfo a wɔwɔ Ningo tsena (Ningo workers quarters).
Owura Gbli Nartey Wilson yɛ nyimpa a ɔgyee dzin wɔ Ghana ara yie. Banyin yi kaa nkyen gui wɔ mfe ebiasa a etwamu ekyir wɔ Fankwa 2, 2019 mu wɔ ne fie, Osu, (Ringway Estate). Wɔdze no too mpamu yɛɛ n’eyi noom ne sikanasa wɔ Fankwa 30, 2022 dze kesi Ɔbrɛfɛw 2, 2022 mu. Ebuasua, mba, nanaanom, anyɛnkofo, ankorankor na pii noara na wɔkaa bɔɔ mu kataa n’ekyir fɛfɛɛfɛw.
