Akwanhyia yi sii Fida, Fankwa 9, 2022, ber a nna hɔn enyi kyerɛ kwan dɛ wɔrokɔ nserahwɛ wɔ Bepɔw Afadjato ho. Simpa Esuapɔn a wɔhwɛ Nwomasua do (UEW) ne fa wɔhwɛ Early Grade and Childhood Development ho nsɛm no mu esuafo binom a hɔn kyerɛkyerɛnyi ka ho na nna wɔrokɔ dɛm nserahwɛ yi.
Amandzɛɛbɔ kyerɛ dɛ hɛnkanyi no nsa tserewee ber a nna orisian Aperede koko no wɔ Aperede dze kɔ Somanya kwan no do. Iyi na bɔɔso a nna esuafo no wɔ mu no munumii fii kwan no do kɛdaa kwan no nkyɛn. Esuafo baasa na kyerɛkyerɛnyi kor a ɔka ho na wɔhweer hɔn nkwa wɔ akwanhyia yi mu. Bɔɔso a nna wɔdze rokɔ no yɛ Esuapɔn no n’ahɛn ahorow a esuapɔn no ne dzin gu ho no mu kor.
Esuafo no mu eduonu awɔtwe (28) na amandzɛɛbɔ kyerɛ dɛ wopirapirae a seseiara wɔregye ayarhwɛ. Asɛm yi sii amonmu hɔara na wɔdze epirafo no kopuee Yilo Krobo Mansin Ayarsabea wɔ Somanya ma wɔhyɛɛ ase maa hɔn ayarhwɛ. Amandzɛɛbɔ a esuapɔn no mu Esuafo Ananmusifo Kuw no dze efir edzi ama abɛda gua dɛ mprenpren, esuafo a woepirapira no bi wɔ Epuei Mantɔw mu Mantɔw Ayarsabea na binom so wɔ Simpa Trauma Ayarsabea a wogu do megye ayarhwɛ.
Esuafo a wɔwɔ Simpa no mu ridzi awerɛhow kɛsenara ber a worigyam hɔn Kyerɛkyerɛnyi nye hɔn enuanom baasa a ɔnam akwanhyia yi do wɔayɛ Onyame dze no. Dza ɔyɛ awerɛhow gu awose kɛse nye dɛ iyi nye ne mpɛn ebien do a Simpa Esuapɔn no mu esuafo dodow a worutu kwan enya lɔɔre akwanhyia wɔ afe yi ara mu. Dza odzi kan no sii wɔ Ebɔw 13, 2022 mu a ɔno so esuafo bɛyɛ beenum hweer hɔn nkwa wɔ mu.
