Assin Manso guadzibea hɔ no, wotum ma efir a efir a wɔdze tow adze dɔ ara yie na wɔdze ayɛ ahyɛnsew wɔ adɔnkɔfo no honan ho; hɔn bo do anaa hɔn abatsir. Wɔyɛ iyi dze kyerɛ dɛ dɔnkɔnyi bi yɛ obi nedze. Bio, wotum yɛ iyi dze kyerɛ dɛ obi etua sika a ɔsombo wɔ dɔnkɔnyi bi no ho. Nda kakra anaa ndaawɔtwe kakra wobedzii wɔ hɔ no so ma wɔdze adɔnkɔfo no robɔkɔ a, wɔpamu yiyi hɔn a wɔwɔ ahoɔdzen no na woegyaa hɔn a wɔayɛ mberɛw anaa wonnyi ahoɔdzen no wɔ hɔ egu hɔn nkɔnsɔnkɔnsɔn dze hɔn abɔ dua mu. Afei, wogu hɔn a woeyiyi hɔn no so nkɔnsɔnkɔnsɔn dze hɔn si mu kɔ Ogua abankɛse mu a ɔyɛ bea a otwa tun wɔ nyimpa guadzi (Slave trade) no mu.
Sɛ idur Assin Manson nyimpa guadzibea hɔ a ndzɛmba ahorow pii na ihu no wɔ hɔ. Dɛm ndzɛmba no nye Adɔnkɔfo nsu, (slave river), nkaa afasin, (Memorial wall of returns), na bea a woesie ekunyin bi wɔ (Graveyard).
Abakɔsɛm kyerɛ dɛ, nsu bi da Assin Manso guadzibea hɔ na hɔ na sɛ wɔdze adɔnkɔfo no baa bodur wɔ Assin Manso a, wɔdze adɔnkɔfo no kɔ hɔ ma woguar hɔn eguar a otwatun (last bath). Sɛ ikɔ Assin Manso nyimpa guadzibeabea hɔ a, dɛm nsu (Slave River) yi da ho ara da hɔ. Assin Manso nyimpa guadzibea dzii dwuma dɛ bea a adɔnkɔfo no benya akwangya enya hɔn eguar a otwa tun ansaana wɔdze hɔn edu Ogua abankɛse mu.
Bio, Assin Manso nyimpa guadzibea san so wɔ bea bi a wɔfrɛ hɔ “Ancestral Graveyard”. Dɛm bea no na wosie Crystal a ofi Jamaica na Carson a no so fi New York. Abakɔsɛm da no edzi dɛ, Dzifuw bosoom na da odzikan wɔ afe biara mu no, wɔyɛ nkaa som dze ma nyimpa beenu yi na adɔnkɔfo a wɔdze hɔn haa hɔ no nyinara.
Sɛ ikɔ Assin Manso nyimpa guadzibea hɔ a, afasin bi wɔ bi wɔ hɔ a wɔfrɛ no, “Memorial wall of return”. Afasin yi yɛ afasin a sɛ nyimpa fi Afrika amanaman ahorow no do ba hɔ nseranhwɛ a, wɔkyerɛw hɔn edzin gu ho na nsɛm bi a wɔpɛ dze kaa hɔn nanaanom na wɔsan dze kyerɛ dɛ wɔaba abohu hɔn nkyir.
Bio, wɔayɛ ɔbo bi so wɔ hɔ a ɔda nsɛm bi edzi fa ekunyin bi a wɔdze hɔn ka nyimpa wɔfa hɔn ka nyimpa guadzi no ho (epitaph). Ndzɛmba ahorow pii na sɛ ekɔ Assin Manso nyimpa guadzibea hɔ a ihu na ɔda dwumadzi ahorow a ɔkɔr do wɔ hɔ no edzi.
