Dwumadzi bi a wɔato no dzin “Moot Court” akansi kɔr do, Ɔbɛse 28, 2022 dze kesii Ɔbɛsɛ 29, 2022. Dwumudzi no kɔr do wɔ Nkran kropɔng Mantɔw no mu, Legon esuapɔng no ne fa a wosua mbra ho nsɛm wɔ (legon skuul of law). Tsir asɛm a nna ɔda dwumadzi no do nye dɛ; “Yɛbɔboa mbabum ma woehu ɔman no ne mbrapɔn no dze aboa hɔn nkankɔ na ɔman no ne mpontu.
Mpanyimfo nsɔwdo skuul ahorow pii na mpanyimfo maa hɔn akwangya ma wobesii akan no bi.
Mpanyimfo nsɔwdo a wonyaa akwangya no besii akan no nye;
Mfantseman Girls, West Africa SHS, Legon Presec, Accra Academy, Legacy girls college, Aburi girls, Achimota SHS, Labone SHS na pii a wɔkeka ho.
Dwumadzi yi yɛ dwumadzi a ɔbɔboa ma mpanyimfo nsɔwdo esuafo ehu kwan a wɔfa do dzi asɛm wɔ asɛndziibea na woenya nyimdzii a ɔfa Ghana mbrapɔng no ho. Dwumadzi no mu no, nsɛm anaa kwadu nsɛm ebiasa na wɔdze too hɔ maa esuafo yi mu biara faa hɔn afa anaa hɔn egyinasi wɔ mu. Esuafo yi mu bi yɛɛ hɔn ho dɛ nkorɔfo a mbra mu no, wɔayɛ nsɛm bi etsia hɔn skuul bi a ɔwɔ Assawa, Opimpim SHS, dɛ wɔanngye osuanyi bi a ne dzin dze Kofi Paintsir a ɔayɛ raseta wɔ hɔn skuul osiandɛ nna ɔnye hɔn skuul mbra no nnkɔ ntsi. Binom so yɛɛ hɔn ho dɛ wogyina skuul no anan mu rekyerɛ mu siantsir a ɔnam do ma wɔanngye osuanyi kofi Paintsir. Afa kor no so yɛɛ hɔn ho dɛ asɛndziibea no ne nyɛnko a dza ɔyɛ nye dɛ, otu hɔn fo fa nsɛm ho anaa akyerɛ n’adwen fa asɛm a ɔda court no n’enyim no ho (amicus Curae)
Nsɛm ebiasa a esuafo yi kasa faa ho no nye dɛ;
Odzikan, siantsir a ɔnam do ma skuul no anngye kofi Painstir ɔnam ne tsir a nna ɔayɛ no ntsi.
Bio, siantsir a ɔnam do ma skuul no abra som ahorow ne nyɛe wɔ skuul no mu na afei mpaapaamu a skuul no ayɛ ɔnam dɛ wɔama mbaa a wɔwɔ gyinapɛn ebein na ebiasa no skuul atar fofor a nkaa fo no nnka ho.
Dwumadzi no ne fa a odzikan na dza ɔtɔ do ebein ebien no baa n’ewiei. Ɔnam dɛ nna ɔyɛ akensi ntsi, skuul no no mu binom enntum annkɔ hɔn enyim wɔ dwumadzi no mu.Nokwar, skuul ahorow no nyinaa bɔɔ hɔn ho mbɔdzen ara yie. Skuul ahorow no a wotumii kɔr hɔn enyim wɔ akansi no mu no nye; Legacy Girls’ SHS, Legon Presec SHS, Accra Academy SHS, Achimota SHS, Aburi Girls’ SHS na ɔnye Labone SHS.
Wɔdze ɔfa fofor hyehyɛɛ do maa skuul esia yi a wotumii kɔr hɔn enyim no na yi buei kwan maa skuul ebiasa; Achimota skuul, Legacy girls college na Presec legon a ɔkyerɛ hɔn na wobenya akwangya ekesi akan a otwa tun no koraa wɔ court of Appeal a ɔwɔ Nkran kropɔng Mantɔw no mu.
Memenda, Ɔbɛsɛ 29, 2022, nyimpa bɔɔ dɔmpim wɔ “Court of Appeal”, Nkran ɔnam akensi yi ntsi.Mbrayimfo etsirtsir a wɔaagye dzin wɔ Ghana ha tsena hɔn egua mu ma esuafo daa hɔn nyimdzii fa akensi yi ho kyerɛɛ hɔn. Odur beebi no, nna mbrayimfo ekukudam yi dwen dɛ wɔnye esuafo a wofi esuapɔng na wɔnye hɔn ridzi dwuma yi. Esuafo no bɔɔ hɔn ho mbɔdzen ara yie wɔ akensi no mu.
Dwumadzi no hyɛɛ ase anapa ndɔnkrɔn mpaamu na ɔbaa ne ewiei no, Legon Presec mpanyimfo nsɔwdo skuul na wodzii kan wɔ akansi no mu. Achimota mpanyimfo na wɔtɔ do ebien na Legacy Girls’ fo na wɔtɔɔ to ebiasa. Akyɛdzi bi tse dɛ mɛdal, sika na sika kɔpow na wɔdzi bɔɔ esuafo yi abaw do.
