Nsuyirii so yɛ adze kor a ɔrehaw adasamba papaapa. Nkyɛ dza yenyim nye dɛ, sɛ nsu tɔ a, bi kogu ahaban do ma hɛn kwamu ndɔbaa yɛ frɔmfrɔm. Afie so, bi kogu esutsen mu ma yenya bi nom na yɛdze bi so yɛ adze. Bi ara so na ɔma hɛn eyinam nkandzea yi. Dza ogu asaase enyi no so, sɛ ewia bɔ a, ɔwewew. Ehubɔehubɔ no san kɔ wim kɛhyɛ fua ma nsu muna, san tɔ.
Mbom, sɛ nsu no tɔ kɛse a nna ɔreyɛ akɛfa asɛm aba. Ɔno nye dɛ, sɛ nsu no tɔ pii a, asaase no a ɔnonom nsu no pow dɛ ɔbɛmemen bio, osiandɛ nna ataa no. Sɛ nsu taa atwer a ɔgye wɔɔ. Dɛm nsu a abor do yi pram do pradadaada wɔ kwaa ase. Ɔba no dɛm a otum hohor asaase enyi seradze no nyina kogu beebi. Afie so, otwitwa mbɔnka mbɔnka toto haban no mu.
Bio, nsu no tum ma esutsen na nsutae nyina yeyɛ tentann. Iyi tum dze esian ahorow ba. Otum yir ba fie botu nkorɔfo fi hɔn efiefie fefa ndzɛmba pii kɔ.
Nsuyirii no bi wɔ hɔ a, yenyim pefee dɛ sɛ nsu tɔ kɛse a nna ɔdze ba, naaso nyimpa so ne ndzeyɛɛ ka ho. Ndɛ ɔrohwehwɛ ayɛ dɛ ɔnam dɛ nyimpa rodɔɔ so, na obiara reper enya beebi a ɔdze ne tsir bɔto ntsi , beebiara a nna worisi dan. Ndɛ atɛkyɛ mu mpo nkorɔfo sisi adan. Ɔmam dɛm ntsi sɛ nsu tɔ a bea ɔwɔ dɛ nsu no pem fa nyina nkorɔfo dze adan esisiw no. Sɛ nsu no bu do a otum twuw fa do kɛsɛɛsɛɛ nkorɔfo ndzɛmba.
Binom so nnyiyi nsu mbɔnka mu. Sɛ nsu mbɔnKa yɛ ma a, nsu no twuw fa do. Sɛ yɛdze nsu a oyir ba fie bɛfa nyimpa na ndzɛmba to nkyɛn a, ɔhaw a nsuyirii dze ba no so. Odzikan ɔhorhor asaase enyi ndɔbaa. Ɔsan twitwa mbɔnkambɔnka toto kurow mu a, ɔsɛe kurow no n’ahoɔfɛw. Nsuyirii dze kɔm ba . Obi a no kwaa wɔ esuogya nntum nnkɛfa edziban mmba fie. Nsu tum yir sɛɛ nkorɔfo hɔn ekuadze . Po so yɛ ma a nkorɔfo nnkɔ po.
Sɛ yebotum esiw ano a, gyedɛ adansifo sisi hɔn adan yie. Afie ɔwɔ dɛ yeyiyi hɛn mbɔnka mbɔnka mu. Bio sɛ nkyɛ yɛbɛfa kwan bi do asɔn nsu no bi esiesie a nkyɛ yɛbɔbɔ nsuyirii ho ban, nna yɛdze nsu esie ama ɔpɛber. Yebotum so dze nsu no bi ayɛ anyinam nkandzea dze bi so ayeyɛ paep nsu. Sɛ haban mu so yebotum etwitwa amona ahorow a nsu no bogu mu a nkyɛ ɔbɔboa.
