Ghanaman yɛ ɔman bi a ka-bi-ma-menka-bi dzi akotsen wɔ mu papaapa. Sɛ yɛka ka-bi-ma-menka-bi a, Borɔfo kasa mu no, wɔfrɛ no “Democracy”. Sɛ yɛhwɛ ka-bi-ma-menka-bi no Borɔfokasa mu abɔse a, ofi Greek nkasafua “demos” a n’asekyerɛ nye ‘nkorɔfo’ na ‘kratos’ a ɔkyerɛ “tum” mu. Sɛ yɛka nkasafua ebien yinom bɔ mu a, yenya ka-bi-ma-menka-bi a, n’asekyerɛ nye “tum a ɔyɛ nkorɔfo anaa amamfo dze”. Nna tserɛ, ka-bi-ma-menka-bi yɛ aban a amambu no gyina ɔman bi ne mamfoe do. Yetum so ka dɛ ka-bi-ma-menka-bi yɛ aban a ɔma ne mamfoe kwan ma wɔkyerɛ hɔn adwen a obiara nntum nnsiw hɔn ho kwan.
Afe 1992 mu na Ghana daan n’aban fii nsordaafo aban baa ka-bi-ma-menka-bi aban a ndɛ yɛwɔ mu yi. Fitsi hɔ no, ɔman no abɔ no ho mbɔdzen wɔ ka-bi-ma-menka-bi mu araa yie kɛpem dɛ, Wiadze Kuw Baatan a wɔfrɛ hɔn “The Global Economy” kan Ghana ka aman a amanyɛsɛm asomdwee dze, wɔfa no kwan no ho. Wɔyɛɛ dɛm nhwehwɛmu yi afe 2021 mu na hɔn nhwehwɛmu no mu no, wiadze n’afɛndzeanan n’amanaman ɔha eduakron anan (194) no, Ghana tɔ do eduakron ebien (92). Ebibiman mu no so, amanaman eduonum ebiasa (53) no, Ghana tɔ do akron (9). Ebibir Atɔree afamu no so, Ghana tɔ do ebien (2) a ɔman Gambia na odzi kan. Iyi kyerɛ dɛ ka-bi-ma-menka-bi kɔ do wɔ hɛn man yi mu papaapa a ɔkyerɛ dɛ asomdwee dze, yɛfa no kwa.
Afe 1992 na Ghana naam ka-bi-ma-menka-bi aban do toow n’aba a odzi kan. Abatow no kɔr do Ɔberɛfɛw 1992 mu na JJ Rawlings a nna ɔyɛ nsordaafo panyin na odzii konyim maa NDC amanyɛkuw no. Odzii adze mfe awɔtwe (1992-2000). Mfe awɔtwe no durii no, mampanyin dadaw John Agyekum Kuffuor bɔtoaa do. Odzii adze wɔ NPP amanyɛkuw no ne dzin mu mfe awɔtwe (2000-2008). John Agyekum Kuffour fii do no, mampanyin dadaw a oenya ne beebi kɔ a wɔfrɛ no John Evans Fiifi Atta Mills so bedzii adze wɔ NDC amanyɛkuw no anan mu. Odzii adze mfe ebiasa na abosoom esuon (2008- Ayɛwoho 2012) na owui. N’abedziekyir John Dramani Mahama bɛhyɛɛ n’ananmu mu na odzii konyim afe 2012 abatow no mu. Odzii adze mfe anan dze kaa dza John Evans Fiifi Atta Mills dzii no ho ma ɔbɛyɛɛ mfe awɔtwe maa NDC amanyɛkuw no. Afe 2016 abatow no mu no, ɔmampanyin a ber yi ɔda ho ridzi adze a wɔfrɛ no Nana Addo Danquah Akuffo Addo bedzii adze wɔ NPP amanyɛkuw no ne dzin mu. Afe 2024 mu na ɔdze n’adzedzi bɛba ewiei. Iyi bɛma oedzi adze mfe awɔtwe ama NPP amanyɛkuw no.
Dza ɔgye adwen wɔ Ghanaman ne ka-bi-ma-menka-bi akwantu no mu no nye dɛ, fitsi nananom aber do a ka-bi-ma-menka-bi yi bɔbɔɔ adze wɔ ɔman no mu no, Ghana yɛ ɔman a n’amanbra ma kwan ma amanyɛkuw ebiasa na no mboree dzi mu akotsen dze, naaso no mu ebien pɛr (NDC na NPP) na no mu nkorɔfo etum afow Ghana egua kɛse no atsena do ebu ɔman no. Asɛmbisa nye dɛ, “Ebɛnadze na osiw amanyɛkuw nkaa no kwan ma wonntum nndzi adze no bi no?” Ne saso ntsi, medze Ghana hɛn amambu a adan ekedzi amanyɛkuw ebien yinom hɔn nsamu yi dze reyɛ ntotoho wɔ dza osii wɔ Nigeria hɔn 2023 abatow no mu.
Tse dɛ Ghana no, Nigeriaman no yɛ ɔman bi a hɔn amanbra no ma kwan ma amanyɛkuw ebiasa na no mboree dzi mu akotsen, naaso ebien pɛr na fitsi nananom aber do no, woedzi adze edzi edzi araa. Hɔn nye “All Progressive Party” a wotwa no sin frɛ hɔn “APC” na ” People’s Democratic Party” a wotwa no sin frɛ hɔn “PDP”. Osiandɛ dɛm amanyɛkuw ebien yinom mu nyimpa nko na woedzi adze edzi edzi araa ntsi no, hɔn afe 2023 abatow no mu no, Owura bi a ɔdɔm amanyɛkuw bi yii ne tsir. Owura bɛn na amanyɛkuw bɛn na nna ɔdɔm? Ɔno nye Peter Gregory Obi a dodowara nyim no Peter Obi a ɔdɔm Labour Amanyɛkuw no. Owura yi bɛdaa dodowara nkankan mbabun akoma do dɛ wɔbɔtow aba ama no ma oeetum ebedzi Nigeria mampanyin etu amanyɛkuw ebien a dabaa wodzi konyim wɔ Nigeriaman n’abatow mu no ase. Awerɛhowsɛm nye dɛ, abatow no kɔr n’ewiei no, Peter Obi enntum ammfa kɔtɔ annyɛ nkwan. “APC” amanyɛkuw a Owura Bola Ahmed Tinubu da ano na odzii konyim. Owura Atiku Abubakar a ɔdɔm “APC” amanyɛkuw no tɔɔ do ebien na Labour Amanyɛkuw a Owura Peter Obi daa ano no so tɔɔ do ebiasa.
Dza nna mbabun hɔn mu dodowara rohwehwɛ dɛ Owura Peter Obi bedzi konyim no ammba mu dze, naaso oegya anamɔn bi ato hɔ a Ghanafo, tsitsir mbabun a NPP na NDC amanyɛkuw no hɔnho afon hɔn no dɛ wɔnhwɛ do nnantsew do. Sɛ yɛhwɛ Ghanaman no n’abatow abakɔsɛm mu a, bi esi pɛn. Obi a ommfi NPP anaa NDC amanyɛkuw no mu ahyɛ da ara eyi ne tsir pɛn. Sɛ hɛn werɛ befir mpo a, hɛn werɛ nnkotum efir Hɛnwura Papa Kwesi Ndoum ma “CPP” afe 2008 na ma nankasa n’amanyɛkuw “PPP” afe 2012 na 2016 abatow no. Oenntum enngyina wɔ afe 2020 abatow no mu. Papa Kwesi Ndoum enntum enngyina wɔ afe 2020 Ghana abatow no mu no, “Ghana Union Movement” a ɔsɔfo a wɔfrɛ no Christian Kwabena Andrews a dodowara frɛ no “Ɔsɔfo Kyir Abosom” no gyinae naaso tse dɛ Papa Kwesi Ndoum dze no bi no, ennkesi aga.
Iyi na 2024 Ghana abatow a ɔreba yi, Ghanafo dodowara kyerɛ a, NDC na NPP amanyɛkuw no, hɔnho afon hɔn ntsi wɔpɛ nsesa. Sɛ Ghanafo dodowara pɛ nsesa dze a, nna ɔno woana na ɔreba abɛyɛ hɛn “Peter Obi” a ɔbɛba abɛgye tum efi NPP na NDC amanyɛkuw no nsamu?
