Amanyɛkuw yɛ nyimpakuw a wɔka hɔnho bɔ mu dɛ kuw dze hɔnho gye amanyɛsɛm mu. Ɔyɛ kuw bi a ɔnnyɛ kuw biara kɛkɛ ɔnam tum a wɔper nya, na wonya a wotum dze bu ɔman bi do no. Ogu ahorow ebiasa wɔ ɔman biara mu. Yɛwɔ amanaman binom wɔ hɔ a amanyɛkuw kortsee na ɔwɔ mu. Dɛm amanaman no mu bi nye China a amanyɛkuw a wɔfrɛ no CCP nko na odzi mu akotsen no. Binom so nye Vietnam, North Korea na Cuba. Yɛwɔ amanaman binom so wɔ hɔ a, amanyɛkuw ebien pɛr na wodzi mu akotsen. Iyinom mu bi nye Amereka a Democrat na Republican amanyɛkuw no dzi mu akotsen no, Canada, UK na Australia. Dza otwa tun no nye amanaman a amanyɛkuw ebiasa anaa no mboree dzi mu akotsen no. Iyinom mu bi nye Ghana, Nigeria, India, Germany, Italy, Israel na dza ɔkeka ho.
Amanaman a amanyɛkuw a ɔyɛ ebiasa na no mboree dzi akotsen wɔ mu no dɔɔ so kyɛn nkaa no nyinara. Mbom mpɛn pii no, amanaman a wɔtse dɛm no, ebien pɛr na woyi hɔn enyim dzi ɔman no do. Sɛ ndɛ ɔnnyɛ Kodwo Amanyɛkuw na oridzi adze a, ɔyɛ Kɔbena Amanyɛkuw a. Sɛ ɔba no dɛm a, ɔhaw amamfo na hɔnho so tum fon hɔn. Afei, amanyɛkuw fofor biara a obeyi ne tsir no, onntum nndzi konyim. Mfatoho nye Okunyin Papa Kwesi Ndoum ma CPP/PPP amanyɛkuw no wɔ Ghana na Peter Obi na Labour amanyɛkuw no wɔ Nigeria na binom a wɔkeka ho. Asɛmbisa nye dɛ, wɔyɛ no dɛn na amanaman a wɔtse dɛm yi nntwa amanyɛkuw nkaa no mu ma ɔnka ebien no nko dɛ mbrɛ aber biara hɔnara na wonya kwan dzi adze no? Asɛm sɛ bɛ.
Dɛ mbrɛ medzi kan abɔ do dada no, amanaman a dza ɔtse dɛm yi kɔ do wɔ mu no bi nye Ghana na Nigeria. Ma yɛnhwɛ Ghana dze no. Fitsi ber a Ghanaman no twaa Nsordaafo aban mu baa Ka-bi-ma-menka bi aban mu wɔ afe 1992 mu no, ɔwɔ mu dɛ 1992 Ghana amanbra no gye amanyɛkuw a ɔyɛ ebiasa na no mboree to mu dze, naaso amanyɛkuw ebien pɛr na wodzi mu akotsen. Dɛm amanyɛkuw ebien yi nye ‘New Patriotic Party’ a wotwa no sin frɛ hɔn ‘NPP’ na ‘National Democratic Congress’ a wotwa no sin frɛ hɔn ‘NDC’ no. Ansaana Ghana rebɛdan aban akɔ Ka-bi-ma-menka aban mu no, nsordaafo aban na nna wodzi akotsen. Dɛm ntsi dza Frɛnkye kasa mu no wɔfrɛ no ‘Coup d’état’ no, nna ɔmmpar Ghanaman ho da! ‘Coup d’état’ yɛ mpofirimu na basabasayɛ kwan a mpɛn pii no, nsordaafo mpanyimfo fa do gye tum fi aban a ɔtse do nsamu. Ɔyɛ aban bi a otsiatsia ka-bi-ma-menka-bi na aban ahorow do korakoraa na nkorɔfo kyerɛ a, ɔnnyɛ aban a ɔdze asomdwee nam.
Afe 1992 na Ghana naam ka-bi-ma-menka-bi aban do toow n’aba a odzi kan. Abatow no kɔr do Ɔberɛfɛw 1992 mu na JJ Rawlings a nna ɔyɛ nsordaafo panyin na odzii konyim maa NDC amanyɛkuw no. Odzii adze mfe awɔtwe (1992-2000). Mfe awɔtwe no durii no, mampanyin dadaw John Agyekum Kuffuor bɔtoaa do. Odzii adze wɔ NPP amanyɛkuw no ne dzin mu mfe awɔtwe (2000-2008). John Agyekum Kuffour fii do no, mampanyin dadaw a oenya ne beebi kɔ a wɔfrɛ no John Evans Fiifi Atta Mills so bedzii adze wɔ NDC amanyɛkuw no dzin mu. Odzii adze mfe ebiasa na abosoom esuon (2008- Ayɛwoho 2012) na owui. N’abedziekyir John Dramani Mahama bɛhyɛɛ n’ananmu na odzii konyim afe 2012 abatow no mu. Odzii adze mfe anan dze kaa dza John Evans Fiifi Atta Mills dzii no ho ma ɔbɛyɛɛ mfe awɔtwe ma NDC amanyɛkuw no. Afe 2016 abatow no mu no, ɔmampanyin a ber yi ɔda ho ridzi adze a wɔfrɛ no Nana Addo Danquah Akuffo Addo bedzii adze wɔ NPP amanyɛkuw no ne dzin mu. Afe 2024 mu na ɔdze n’adzedzi bɛba ewiei. Iyi bɛma oedzi adze mfe awɔtwe ama NPP amanyɛkuw no.
Dza ɔyɛ nwanwa wɔ Ghana ka-bi-ma-menka-bi abakɔsɛm ho no nye dɛ, dɛm amanyɛkuw ebien yi mu kor mpo nndzii adze mfe anan da! Dɛ mbrɛ ɔtse biara no, wodzi mfe awɔtwe wɔ aban mu ansaana fofor aba. Bio, amanyɛkuw yinom mu kor mpo nnyi hɔ a woetwa mfe awɔtwe na no mboree wɔ aban mu da! Dɛ mbrɛ ndzɛmba rotow kɔ yi a afe 2024 NPP amanyɛkuw no dze hɔn adzedzi bɛba ewiei no, yennhia Ɔsɔfopɔn Egya Ahɔr anaa Kɔmfo Eku ma wɔabɛhyɛ hɛn bɔ dɛ NDC amanyɛkuw no hɔn aban na ɔreba do osiandɛ birbiara da edzi pefee. Na mbom asɛmbisa no nye dɛ, “Aso da bi bɛba a Ghana benya mampanyin a ɔnndɔm NDC anaa NPP amanyɛkuw no mu?” Nna aso.
