Anɛɛsefo a woewiei skuul na wɔretwoen dɛ aban bɛma hɔn beebi ma wɔakɛyɛ edwuma na wonnyae, na mpɛmpɛmdo yi wogu do ara tse fie no dze kɔkɔbɔ ato abɔto gua dɛ, ɔrennkyɛr, wɔbɛtsew hɔnho egu abowano ayɛ ɔkyerɛ dze akyerɛ asoɛe a wɔhwɛ apɔwmudzen nsɛm do na asoɛe a wɔhwɛ ɔman no ne sikasɛm do. Anɛɛfo yi rekyerɛ dɛ,wɔreyɛ ɔyjkerɛ yi ɔnam dɛ wɔabɔkaw akɛgye ntsetsee wɔ anɛɛsefo skuul dɛ apɔwmudzen edwumayɛfo na afei wɔtsetse fie a wonnya edwuma biara nnyɛ. Wɔkyerɛ dɛ ɔyɛkyerɛ no bɔkɔdo wɔ Yawda, Ɔbrɛfɛw 10, 2022.
Anɛɛsefo yi da no edzi wɔ hɔn amandzɛɛbɔ no mu dɛ, wɔnye mpanyimfo abobowbow nsɛm yi ho na annkosi hwee na iyi ntsi na afei, ahyɛ hɔn dɛ wɔnyɛ ɔkyerɛ yi ma aban nhu dɛ ampa, hɔn enyi aber ara yie. Francis Mengmi, panyin anaa kandzinyi a ɔda Etsifi Mantɔw mu anɛɛsefo hɔn nkabɔmukuw ano no dze too gua dɛ, wɔrennda hɔn ebisadze yi do kɛpem ber a mpanyimfo bɛyɛ hɔn apɛdze ama hɔn. Ɔsanee dze too gua dɛ, ofi 2019 ber a wowiei skuul no, wɔnye mpanyimfo aka dɛ wɔma hɔn beebi ma wɔnkɔyɛ edwuma dɛ anɛɛsefo naaso annkosi hwee.
Francis Mengmi dze too gua dɛ ɔyɛ ɔhaw kɛse dɛ wɔbɔhwɛ wo mfe ebien anaa ebiasa ma ewie skuul na afei rennya hwee nntua ho kaw. Dɛm siantsir yi ntsi, wɔbɔkɔ do ara ayɛ dede dze hɔn haw na hɔn ahohiahia ato abowano kɛpem ber a mpanyinfo bedzi hɔn asɛm no ho dwuma ama hɔn.
