Ber a aborɔfo bodur Afrika no, wɔhyɛɛ dwumadzi pii ahorow ase a nyimpa guadzi (slave trade) ka ho bi. Nyimpa guadzi yi kɔr do wɔ mbeambea ahorow bi tse dɛ Oguaa, Elimina, Nkran, Anomaba na pii a ɔkeka ho. Abakɔsɛm kyerɛ dɛ, Assin Manso yɛ kurow kor so a nyimpa guadzi ho dwumadzi no bi kɔr do wɔ hɔ a ndzɛmba pii ara da ho wɔ hɔ dze da no edzi ma nkorɔfo kɔ hɔ nserahwɛ. Assin Manso yɛ kurow bi a ɔda Finimfin Mantɔw mu. Ibohu no wɔ Ogua dze kɔ kumase kwantsempɔn no do. Ber a aborɔfo no bodurii no, wohun dɛ Afrikafo hia ndzɛmba ahorow pii a wɔwɔ bi ara yie. Bio, wohun dɛ
Afrika so wɔ ndzɛmba ahorow bi a wobotum dze dɛm ndzɛmba yi a Afrikafo hia no asesa dza wɔwɔ no a wobenya ho mfaso pii. Wɔhyɛase dze ndzɛmba bi tse dɛ sekan, ahwehwɛ, etudur, tobacco, itur, atam, ahondze na ndzɛmba ahorow pii a ɔkeka ho bae. Dɛ mbrɛ ɔbɛyɛ a wobenya nyimpa ma wɔayɛ edwuma wɔ hɔn haban mu so ama hɔn ntsi, wɔhyɛ ase dze dɛm ndzɛmba a wɔwɔ no sesa nyimpa dze hɔn kɔr Europe. Bio, wohun dɛ wimu nsesa a ɔwɔ Afrika no mmboa hɔn apɔwmudzen na no dɛm ntsi wobehia nkorɔfo a wɔbɛyɛ edwuma ama hɔn. Iyi na ɔnam do ma nyimpa guadzi bɔbɔ adze wɔ Afrika.
Abakɔsɛm da no edzi dɛ, ber a nna nyimpa guadzi rokɔ do no, wɔdze Assin Manso yɛɛ nyimpa guadzibea a otwa tun ansaana wɔdze adɔnkɔfo no edu Oguaa nyimpa guadzibea hɔ. Dwumadzi ahorow pii na nna ɔkɔ do wɔ dɛm bea hɔ ansaana wɔdze adɔnkɔfo no akɔ bea a wɔbɔkɔ akɔtɔn hɔn no. Sɛ wɔdze adɔnkofo no fi Etsifi Mantɔw mu reba a, wɔdze nkɔnsɔnkɔnsɔn gugu hɔn nan na hɔn nsa dze hɔn nantsew bodu Assin Manso.
Adɔnkɔfo no nndzidzi nnom nnguar. Dodowara hweer hɔn nkwa osiandɛ mbowa tun tu hyɛ hɔn do a wonntum nguan anaa wɔngye hɔnho ɔnam dɛ woegu hɔn nkɔnsɔnkɔnsɔn ntsi. Ɔnam dɛ wɔnantsew kwan tsentsen na wɔbrɛ ntsi, sɛ wodu Assin Manso a, nna wɔdze hɔn akɔsoe ekuraa no ase ama woetum agye hɔn ahom kakra. Hɔ no, wɔma adɔnkɔfo no guar na wɔama hɔn edziban papa so edzi. Siantsir nye dɛ, sɛ wɔdze adɔnkɔkɔfo no kɔ dɛ wɔrokɔtɔn hɔn na wonnyi ahoɔdzen a, wonnya bo papa na otum so ba dɛ wɔnntɔ koraa. Iyi ntsi na ɔma wɔdze hɔn kɔsoe Assin Manso hɔ no. Wodzi nda kakra wɔ hɔ dze hwɛ hɔn ma wonnya apɔwmudzen mapa ansaana wɔdze hɔn akɔ akɔtɔn hɔn.
