Atiridii yɛ yadeɛ a yadeɛmmoa a yɛfrɛ no ntontom na ɛde ba. Obi bɛtumi anya yadeɛ yi bi a, gye sɛ ntontom a atiridii mmoa yi bi wɔ ne mu aka saa nipa no. Nhwehwɛmu kyerɛ sɛ, abibiman mu ha na wɔtaa hunu ntontom a wɔde atiridii ba no pa ara.
Ɛnam sɛ ate atɛsɛ wɔ abibiman mu ha nti no, wiase apɔmuden kubaatan reyɛ nhyehyɛeɛ biara a wɔbɛtumi afa so ate atiridii yadeɛ so wɔ abibiman mu ha. Ne saa nti wɔnam dawubɔ so tu fo wɔ ho wɔ hia a ɛhia sɛ obiara da ntontom dan mu, na wɔkyɛ no kwa. Nnipa dodoɔ no ara susu sɛ yadeɛ yi yɛ adeɛ kumaa bi nanso ɛnte saa. Adɔkotafoɔ kyerɛ sɛ yadeɛ yi bɛtumi agye obi kra afiri ne nsam, ne titire ne mmɔfra a wɔn mfeɛ no firi nnum reba fam. Ne saa nti obiara a ɔbɛnya atiridii yadeɛ yi biara a no, ɛsɛ sɛ ɔma n’ani ba ho na ɔkɔ ayaresabea ɛsane sɛ ɛsane ne yadeɛ binom ho nsɛnkyerɛnneɛ sesɛ.
Nsɛnkyerɛnneɛ ahodoɔ a ɛda adi wɔ atiridii yadeɛ ho
Obiara a ntontom a yadeɛ yi bi wɔ ne mu bɛka no no tumi da nsɛnkyerɛnneɛ ahodoɔ a ɛdidi soɔ yi no mu biara adi.
1. Nipa no ho firi aseɛ woso nkakrankakra kɔsi sɛ ɛbɛyɛ kɛse.
2. Ne ho yɛ hye boro so anaa n’ahoɔhyeɛ kɔ soro pa ara.
3. Ne ho te mfifire berɛ a ahoɔhyeɛ no aba fam no.
4. Ɔnya tipaeɛ.
5. Ɔtaa fefe.
6. Ne yam tu.
Atiridii yadeɛ yi hyɛ aseɛ firi nnawɔtwe baako rekɔ mmienu berɛ a ntontom aka obi no. Ebinom nso deɛ tumi di abosome ne akyire ansa na yadeɛ no ayi ne ho adi.
Deɛ ɛde atiridii yadeɛ ba
1.Sɛdeɛ yɛadi kan aka no, atiridii yadeɛ nam ntontom mmaa so na ɛba. Wɔn ankasa nni yadeɛ yi bi, mmom wɔka a obi a ɔwɔ bi a, wɔfa yadeɛ no firi hɔ, na berɛ a wɔbɛka nipa foforɔ a ɔnni yadeɛ no bi no, wɔde yadeɛ yi ma saa nipa no. Ɛba saa na yadeɛmmoa no nya kwan kɔ nipadua no mu a, ɛkɔtena brɛboɔ no mu mmerɛ kakra nyini wɔ hɔ. Ɛno akyi no ɛba mogya no mu de yadeɛ no bɛka mogya nkwammoa no, ɛhɔ na nsɛnkyerɛnneɛ no firi aseɛ da adi wɔ nipa no ho.
2. Maame a ɔwɔ yadeɛ yi bi no tumi de ma ne ba wɔ awoɔ mu.
3. Mogya a yɛtwe ma obi no nso tumi ma saa nipa no nya bi berɛ a yadeɛ mmoa no wɔ deɛ ɔretwe ne mogya no mogya mu no, wei si ɛnam sɛ mmoa no tena mogya mu nti.
Nneɛma ahodoɔ a ɛtumi bɔ kwan ma obi nya atiridii yadeɛ.
1. Sɛ obi yɛ abɔfra anaa tɔtɔfeewa no nko ara tumi bɔ kwan sɛ ɔnya yadeɛ yi bi.
2. Akwantufoɔ a wɔfiri beaeɛ a ntontom nni hɔ aba faako a ntontom wɔ no tumi nya yadeɛ yi bi.
3. Apemfoɔ ne mmɔfra a wɔnnya nwoo wɔn.
4. Ohia, atiridii yadeɛ ho nimdeɛ a nipa binom nni ne apɔmuden pa a ɛho ayɛ den ama binom no nso tumi bɔ kwan ma obi nya yadeɛ yi bi.
Ɔhaw afoforɔ a atiridii yadeɛ tumi kɔfa ba
1. Atiridii mmoa no nya kwan kɔ mogya no mu a, wɔtumi si ntini a mogya nam mu kɔ adwene mu no ho kwan. Ɛba saa a adwene no tumi hono anaa ɛho te kyema wɔ ne dwumadie mu. Ɛnam so ma ebinom nso tumi twa hwe.
2. Ɛtumi ma nsuo kɔgyina nipa no ahrawa mu. Ɛba saa a ɛma home ho yɛ den ma no.
3. Ɛbɛtumi ama nipa no saa anaa brɛboɔ no adwumayɛ aba fam koraa. Saa adeɛ yi mu biara si a, ɛbɛtumi de nipa no akɔ owuo mu.
4. Ɛbɛtumi asɛe mogya nkwammoa no ama nipa no mogya so ate koraa.
Kwan a yɛbɛtumi afa so asi ano
1. Ɛsɛ sɛ yɛtɔ ntontom nnuro de kum wɔn.
2. Bɔ mmɔden sɛ wobɛda ntontom dan mu. Titire ne mmaa a wɔafa afuro ne mmɔfra nketewa.
3. Hyɛ ntadeɛ a ɛkata wo ho nyinaa titire wo nan ne wo nsa ho wɔ beaeɛ a ntontom wɔ no.
4. Hwɛ sɛ woremma nsuo ntaa mmɔnka mu.
Mmu yadeɛ bi kumaa nsene bi. Yadeɛ biara bɛtumi de wo akɔ ɔsɛeɛ anaa owuo mu. Bɔ mmɔden sɛ wobɛhwɛ wo ho so yie na woakɔhunu wo dɔkota ntɛm pa ara berɛ a nsɛnkyerɛnneɛ ahodoɔ a yɛabobɔ so no mu biara bɛfiri aseɛ sɛ ɛreda ne ho adi no. Kyɛ ma afoforɔ nso nhunu kwan a wɔbɛtumi afa so abɔ wɔn ho ban afiri atiridii yadeɛ ho.
