Atiridii nini yɛ yadeɛ a yadeɛmmoa na ɛde ba, na ɛma ne homene so pa ara wɔ abibiman mu sene aman afoforɔ so. Atiridii yadeɛ yi ne efi wɔ twaka pa ara, ɛno nti aman ahodoɔ a ahonidie nwie pɛyɛ wɔ so pa ara no na yadeɛ yi di akotene wɔ so.
Adɔkotafoɔ kyerɛ sɛ, sɛ obi nya saa yadeɛ yi bi a, na ɛkyerɛ sɛ saa nipa no ahonidie ato kyema kakra.
Ɛkwan a yadeɛ yi fa so terɛ yɛ berɛ a obi adi aduane anaa anom nsuo a saa yadeɛ mmoa yi bi wɔm anaa saa nipa no ne obi a ɔwɔ yadeɛ yi bi anya nkitaho. Ebinom wɔ hɔ a yadeɛmmoa yi tumi da adi wɔ wɔn nipadua mu nanso ɛnnya wɔn so nsunsuansoɔ biara, nanso berɛ korɔ no ara wɔtumi de sane afoforɔ.
Hyɛ no nso sɛ saa yadeɛ yi tumi yɛ mpanin ne mmɔfra, mmom mmɔfra deɛ no yɛ hu pa ara.
Nsɛnkyerɛnneɛ a ɛda adi wɔ atiridii nini ho
Atiridii nini yadeɛmmoa yi bi nya kwan kɔ obi nipadua mu a, adɔkotafoɔ kyerɛ sɛ ɛtumi di nnawɔtwe baako rekɔ mmiɛnsa so ansa na ada adi sɛ saa yadeɛ no wɔ nipadua no mu.
Nnawɔtwe a ɛdi kan no, nsɛnkyerɛnneɛ weinom na ɛda ne ho adi.
1. Ahoɔhyeɛ hyɛ aseɛ nkakrankakra wɔ nipa no so, na ano yɛ den.
2. Ɔnya tipaeɛ
3. Ahoɔmmerɛ ne ahoɔyea da ne ho adi.
4. Ɔbɔ wa a amaman biara nni akyire.
5. Saa nipa yi kɔn nnɔ aduane.
6. Ne yam taa tutu no.
7. Ne yam hwie anaa ɔnya ayamtim.
8. Honam ani nsaa nsaa gu no.
Nsɛnkyerɛnneɛ a ɛda adi wɔ nnawɔtwe a ɛtɔ so mmienu no mu.
Sɛ saa nipa yi ampɛ yadeɛ no ano pomasiberɛ wɔ nnawɔtwe a ɛdi kan no mu, na ɛdidi mu ara kɔduru nnawɔtwe a ɛtɔ so mmienu no mu a, nsɛnkyerɛnneɛ a ɛdidi soɔ yi na ɛda adi:
1. Ahoɔhyeɛ no ano yɛ den boro so.
2. Ayamtuo anaa ayamtim no nso ano yɛ den.
3. Nipa no so hyɛ aseɛ sɛ ɛrete.
4. Ne yafunu hyɛ aseɛ sɛ ɛreyɛ kutuu anaa kɛse.
Nsɛnkyerɛnneɛ a ɛda adi wɔ nnawɔtwe a ɛtɔ so mmiɛnsa no mu.
Saa berɛ yi deɛ na yadeɛ no aduru tebea a ɛyɛ hu mu yie, na ɛde nsɛnkyerɛnneɛ a ɛdidi soɔ yi na ɛba.
1. Nipa no firi aseɛ da adwenemuhaw adi mpofirem, bi te sɛ, n’adwene yɛ no ntantan wɔ nneɛma a ɔyɛ biara ho, ɔtumi bɛyɛ kekakeka, na ɔntumi mfa n’adwene nyinaa nsi adeɛ pɔtee bi a ɔreyɛ so.
2. Ɛtumi ka wɔn a wɔwɔ yadeɛ yi bi no to mpam a wɔntumi nyɛ wɔn ho hwee, na berɛ korɔ no ara mu nso wɔn ani fa baako tumi kata.
Nneɛma ahodoɔ a ɛtumi bɔ kwan ma yadeɛ yi ba
1. Ada adi wɔ wiase nyinaa sɛ mmɔfra pa ara na wɔtaa nya saa atiridii nini yadeɛ yi.
2. Wɔn a wɔyɛ adwuma anaa wɔatu kwan kɔ mmeaeɛ a yadeɛ yi bi wɔ no nso tumi nya bi.
3. Wɔn a wɔbɛn afoforɔ a wɔwɔ atiridii nini yi bi no nso tumi nya yadeɛ yi bi.
4. Wɔn a wɔn nkwammoa ahoɔden aba fam no nso tumi nya yadeɛ yi bi.
5. Wɔn a wɔnom anaa wɔdi nnuane a yadeɛmmoa yi bi wɔm no tumi nya yadeɛ yi bi saa ara.
Ɔhaw afoforɔ a ɛyɛ hu a yadeɛ yi bɛtumi asane akɔfa aba.
Obi nya yadeɛ yi bi na wampɛ ho asɛm ammua a, ɛtumi didi kɔ tebea a ɛyɛ hu mu wɔ nipadua no mu. Saa ɔhaw no binom na ɛdidi soɔ yi:
1. Yadeɛ mmoa yi tumi bobɔ nipa a ɔwɔ yadeɛ no nsono mu tokuro, wei nam so tumi ma mogya nwunu gu nipadua no mu. Ɛba no saa a, saa nkurɔfoɔ yi tumi hunu mogya wɔ sɛbe wɔn agyanan mu. Ɔhaw yi taa yi ne ho wɔ nnawɔtwe a ɛtɔ so mmiɛnsa no mu.
2. Yadeɛ mmoa yi terɛ ba mogya no mu a, wɔtumi ha akoma no ma ɛhuhuru bɛyɛ kɛse.
3. Yadeɛ mmoa yi sane tumi terɛ kɔ dwonsɔtwaa ne saa no mu de ɔhaw ba hɔ. Wei kɔfa dwonsɔ mu haw ba.
4. Yadeɛ mmoa yi tumi sane ma adwenemuhaw sɛdeɛ yɛaka no dada no.
Ɔkwan a yɛbɛtumi afa so asi ano kwan
1. Bɔ mmɔden sɛ wode samina bɛhohoro wo nsa berɛ biara ansa na woadidi ne berɛ a wofiri sɛbe, agyanan so aba.
2. Hwɛ sɛ wonnom nsuo a wɔmfaa kwan pa so nsiesiee no yie. Ne saa nti yɛtu fo sɛ ɛbɛtumi a, anka yɛnnom nsuo a wɔde agu toa mu atua so yie. Ɛsiane sɛ ɛno na yɛgye tom sɛ wɔde afa mfidie mu a yadeɛ mmoa ntumi ntena mu.
3. Bɔ mmɔden sɛ wonni nnuaba anaa atosodeɛ wɔ berɛ a wonhohoroo ho yie.
4. Di nnuane a ɛyɛ hye ɛfiri sɛ saa mmoa yi ntaa ntumi ntena mu. Hyɛ no nso sɛ, adɔkotafoɔ kyerɛ sɛ atiridii nini ho nsɛnkyerɛnneɛ ne yadeɛ ahodoɔ bebree nsɛnkyerɛnneɛ sesɛ, ne saa nti wohunu nsɛnkyerɛnneɛ ahodoɔ a yɛabobɔ so wɔ soro hɔ no mu biara wɔ wo nipadua mu a, mma no nyɛ w’adwene sɛ ɛyɛ atiridii nini yadeɛ na mfa wo pɛ nkɔtotɔ nnuro nnom, mmom kɔ ayaresabea na adɔkotafoɔ nhwɛ wo yie na wɔmma wo yadeɛ no ho aduro ankasa.
Bɔ mmɔden kyɛ ma afoforɔ nso na wɔnnya nimdeɛ mfa saa yadeɛ yi ho.
