Asasewoɔ yɛ asiane baako a ɛtumi sɛe nneɛma sane di awu wɔ asase so pa ara. Ɛtumi kunkum nnipa mpempem pii, sɛe adan, akwan, nsuo, ne agyapadeɛ bebree. Ɛsiane sɛ ɛyɛ biribi a ɛnyɛ nnipa nneyɛɛ na ɛde ba nti, ɛyɛ den pa ara sɛ nnipa bɛtumi asi ano kwan. Yei nyinaa akyi no, ɛho hia nso sɛ yɛbɔ yɛn ho ban sɛdeɛ ɛbɛyɛ a sɛ yɛkɔpue baabi a asasewosoɔ taa sisi a yɛbɛtumi anya yɛn tiri adidi mu. Ne saa nti, yɛrebɛhwɛ aman ahodoɔ bi binom a asasewosoɔ taa sisi wɔ so pa ara. Aman yinom na ɛdid soɔ yi.
Japan
Japan yɛ asase a ɛda nsuo so wɔ Asia Atɔeɛ fam. Wɔkyerɛ sɛ, ɛfiri afe 1990 bɛsi mfeɛ 2022 mu no, asasewosoɔ aduokron-nnan na asisi wɔ Japan. Ɛsiane sɛ mpanimfoɔ se, “Menya wo a mɛyɛ wo, ɛno ara ne mada me ho so” nti, ɔman no ayɛ mfidie binom a wɔtumi de hunu asasewoɔ nketewa ne akɛseɛ a ɛrebɛsi biara.
nhwehwɛmufoɔ kyerɛ sɛ, asasewosoɔ ahodoɔ a ɛsisi wɔ ɔman no mu no nyɛ deɛ ano yɛ den biara, na ɛtɔ da mpo a nnipa a wɔtete ɔman no mu no nte. Nanso ɛtɔ da nso a, asasewosoɔ akɛseɛ binom tumi sisi, sɛeɛ nneɛma ma nnipa binom nso fa mu hwere wɔn nkwa. Japanfoɔ wɔ afidie bi a sɛ wɔhunu sɛ asasewosoɔ bi rebɛsi a, wɔde bɔ ɔmanfoɔ no nyinaa nkaeɛ ma wɔboaboa wɔn ho kɔpɛ baabi bɔ wɔn ho adwaa.
Indonesia
Animdefoɔ kyerɛ sɛ, asasewosoɔ a ɛsisi wɔ Indonesia no akɛseɛ bɛboro 6.0 magnitude. Mfeɛ 2018 mu no, asasewosoɔ ahodoɔ nkron a n’akɛseɛ bɛboro 6.0 sisii ɔman no mu kunkum nnipa sane sɛee nneɛma bebree. Ɛyɛ ɔman baabko a ogya tumi pue firi abotan mu bɛgu asase no ani sɛeɛ nneɛma, nsuyiri tumi sisi na mframa gyampanturudu nso tumi bɔ wɔ so pa ara.
China
Chinafoɔ abakɔsɛm mu no, asasewosoɔ akɛseɛ a ani yɛ nyan bebree asisi wɔ ɔman no mu akunkum nnipa asane asɛe nneɛma bebree. Mfeɛ 2008 mu no, asasewosoɔ bi a ne kɛseɛ bɛboro 7.0 magnitue sii wɔ ɔman no maa nnipa bɛboro 87,000 ho kaeɛ. Ebinom faa mu hweree wɔn nkwa ɛnna ebinom nso yeraeɛ a wɔanhunu wɔn akyiri kwan. Wɔkyerɛ sɛ, saa asasewosoɔ no ne asasewosoɔ a ani yɛ nyan a ɛtɔ so dunwɔtwe a asi wɔ wiase abakɔsɛm mu.
Philippines
Philippines yɛ ɔman a abotan ne mmepɔ atwa ho ahyia. Yei nti, ɛka aman ahodoɔ a asasewosoɔ taa sisi wɔ so pa ara no ho. Afei nso, mframa gyampanturudu a ɛseɛ nneɛma nyɛna wɔ hɔ koraa. Ɛsiane sɛ temmamufoɔ a wɔwɔ saa ɔman no so nim sɛdeɛ wɔn asetena teɛ nti, wɔsisi adan a ne ho yɛ den sɛdeɛ ɛbɛtumi agyina atorɛnkyɛm ahodoɔ no ano.
Iran
Yɛreka aman ahodoɔ a asasewosoɔ taa sisi wɔ so pa ara a, Iran yɛ ɛmu baako. Wɔn abakɔsɛm mu no, asasewosoɔ akunkum nnipa ɔpepem pii wɔ ɔman no mu. Asasewosoɔ baako a ɛbɛgyee ntrɛha wɔ ɔman no mu ne deɛ ɛsii wɔ kuro baako a wɔfrɛ no Gilan mu no. Saa asasewosoɔ yi sii afe 1990 mu, na ɛkunkum nnipa bɛboro 40,000. Ɛwom sɛ ɔman no mu asetena nna fam deɛ, nanso ɔmanfoɔ a wɔwɔ Iran no asiesie wɔn ho ama atoyerɛnkyɛm a ɛbɛtumi ato wɔn biara.
Turkey
Asasewosoɔ a ɛsisi wɔ wiase no, ɛmu dodoɔ no ara nso sisi wɔ Turkeyman no mu. Ɛsiane nnwuma ahodoɔ a atwa wɔn ho ahyia nti, ɛnyɛ den koraa sɛ asasewosoɔ bɛsi ɛman no mu. Wɔkyerɛ sɛ, anyɛ yie koraa no, asasewosoɔ si ɔman no fa bi afe biara. Awerɛhosɛm a Ghanafoɔ nyinaa werɛ remfiri da ne sɛ, saa ɔman yi mu na asasewosoɔ si maa Ghana dehyeɛ Chritian Atsu kɔhyiaa n’akwanhyia wuo wɔ mfeɛ 2023 mu no. Yei nyinaa mu no, ɔmanfoɔ a wɔwɔ Turkey no yɛ deɛ wɔbɛtumi biara de bɔ wɔn ho ban firi atoyerɛnkyɛm a ɛtete saa ho.
Peru
Ɛwom sɛ asasewosoɔ a ɛsisi wɔ Peru no ano nyɛ den sɛ deɛ ɛsisi aman ahodoɔ a yɛadi kan abobɔ so no deɛ, nanso sɛ asasewosoɔ bi si wɔ hɔ a, ɛtumi bubu adan sɛe akwan ma nnipa ho kyere wɔn yie pa ara. Owuo deɛ, yɛnni mu kɛseɛ nni ketewa biara nti, ɔman no de nneɛma binom agugu akwan mu a wɔtumi de si ɔhaw ahodoɔ a asasewosoɔ bɛtumi de aba no ano.
USA
Ɛrekame ayɛ sɛ, USA nka aman ahodoɔ a asasewosoɔ sisi wɔ so pa ara no ho. Nanso deɛ ɛte ne sɛ, ɛsiane sɛdeɛ ɔman no asase teɛ nti, ɛtumi ma asasewosoɔ sisi wɔ so. USA yɛ ɔman a ɛmu nnipa dɔɔso pa ara. Wɔn dodoɔ bɛyɛ ɔpepem ahasa (300,000,000). Yei nti, sɛ asasewosoɔ ketewa bi si wɔ hɔ mpo a, ɛtumi ka nnipa bebree ma ebinom fa mu hwere wɔn nkwa.
Italy
Asasewosoɔ bi sii Italy wɔ afe 1908 mu a na wɔfrɛ no Messina. Saa asasewosoɔ yi kunkum nnipa bɛboro 75, 000. Baako nso sane sii afe 1980 mu a na wɔfrɛ no Irpinia. Ɛno nso, nnipa a wɔwuwuiɛ bɛboro 2,400. Atoyerɛnkyɛm ahodoɔ yi nyinaa akyi no, nnipa a wɔwɔ Italy no kɔ so ara yɛ wɔn nnwuma wɔ mmeaeɛ binom a asasewosoɔ bɛtumi asisi wɔ hɔ.
Mexico
Mexico nso ka aman ahodoɔ a asasewosoɔ taa sisi wɔ so no ho. Ɛtɔ da a, ebi tumi woso wɔn asase no ma ɔmanfoɔ no ho kyere wɔn pa ara. Yei nti, ɔman no ayhɛ da ahyɛ mmara bi a ɛkyerɛ ɔmanfoɔ sɛdeɛ ɛsɛ sɛ wɔsisi wɔn adan na atumi abɔ wɔn ho ban. Afei nso, wɔde nhyehyɛeɛ binom agugu akwan mu a sɛ atoyerɛnkyɛm bi si mpofirem a, wɔbɛtumi afa so abɔ ɔmanfoɔ no ho ban. Ne nyinaa mu no, ɛho hia pa ara sɛ ɔmanfoɔ no da wɔn ho so na wɔyɛ deɛ wɔbɛtumi biara de bɔ wɔn ho ban firi asiane ahodoɔ a ɛtete saa ho.
Sɛdeɛ yɛabɛhunu no, ɛho hia pa ara sɛ baabiara a yɛte wɔ wiase biara no, yɛbɛbɔ yɛbɔ yɛn ho ban na yɛsiesie yɛn ho na ɛkɔ ba sɛ atoyerɛnkyɛm bi to yɛn mpofirem a, yɛatumi anya yɛn tiri adidi mu.
