Bɔ nsɛm yi tie:
Aban aka sɛ, ɔbɛhyehyɛ sɔhwɛ ama wɔn a wɔpɛ sɛ wɔkɔ akyerɛkyerɛfoɔ nteteeɛbea kɔsua adeɛ bɛyɛ akyerɛkyerɛfoɔ no ama wɔatwerɛ ansa na wɔgye wɔn wɔ adesua no mu firi 2023 de rekɔ.
Wei rebɛkɔ so ɛsiane mmuaeɛ a ɛnsɔ ani a wɔhunuu no wɔ akyerɛkyerɛfoɔ sɔhwɛ a wɔde gye wɔn tom sɛ akyerɛkyerɛfoɔ sɔhwɛ nkrataa soɔ no, na wei ama aboafoɔ binom a wɔwɔ adesua fam no ani abere.
Aboafoɔ yinom nkitahodie wɔ nhyiamu a ɛkɔɔ so wɔ akyerɛkyerɛfoɔ nteteeɛ ho no mu no, Ↄkwankyerɛfoɔ Panin a ɔda Asoɛeɛ a ɛhwɛ Adesua ho nsɛm soɔ, Divine Ayidzoe kaa sɛ sɔhwɛ no bɛgyina adesuadeɛ atitire mmienu so – Nkonta ne Borɔfo ho adesua so.
Ↄkaa sɛ berɛ aso sɛ wɔhwɛ ma ɔman no nya akyerɛkyerɛfoɔ papa. Ↄkyerɛɛ sɛ sɔhwɛ a wɔtwerɛ ma wɔgye wɔn to mu sɛ akyerɛkyerɛfoɔ no ho nsunsuansoɔ kyerɛ sɛ akyerɛkyerɛfoɔ a wɔafa nteteeɛ mu a wɔatwerɛ BECE ne WASSCE na UCC ne UEW de wɔn ani adi wɔn akyi ahwɛ wɔn soɔ no ntumi nyɛ ɔkasamu baako mpo. Ↄbisaa ampɛmmuaeɛ asɛm bi sɛ, sɛ ɛba no saa a, sɛn na wɔbɛsi akyerɛ mmɔfra no adeɛ? Ↄkyerɛɛ sɛ ne saa nti na afe a yɛrebɛsi mu no mu no, wɔbɛyɛ sɔhwɛ afa Nkonta ne Borɔfo adesua ho ama wɔn a wɔpɛ sɛ wɔkɔ akyerɛkyerɛfoɔ nteteeɛbea kɔsua adeɛ no na wɔahwɛ wɔn mmɔdemmɔ so afa wɔn.
Akyerɛkyerɛfoɔ sɔhwɛ a wɔtwerɛ ma wɔgye wɔn tom sɛ akyerɛkyerɛfoɔ no hyɛɛ aseɛ 2018 sɛdeɛ ɛbɛma akyerɛyerɛfoɔ abodin krataa a ɛhia a ɛdi adanseɛ sɛ wɔtumi di wɔn dwuma wɔ Ghana, nanso ɛbɛyɛɛ asɛm a ɛde ntawantawadie baa ɔman yi mu.
ℇbinom de nsusuiɛ aba sɛ anka wɔnsesa adesua nhyehyɛeɛ no mu, na wɔmfa saa sɔhwɛ yi nka berɛ a wɔde rekɔgye nteteeɛ wɔ sukuu mu no ho.
Aban nso asi so dua sɛ mfomsoɔ biara nni saa sɔhwɛ yi nhyehyɛeɛ no ho, nanso NDC foɔ kyerɛ sɛ, ɔkwan a wɔfa so yɛ sɔhwɛ no nyɛ deɛ ɛyɛ.
ℇnkyɛree biara, Ↄsoafoɔ a Ↄhwɛ Adesua nsɛm so, Dr. Yaw Osei Adutwum kaa sɛ, ɔne n’adumakuo no nyinaa rehwehwɛ kwan a wɔbɛfa so ate nkugudie a ɛpue akyerɛkyerɛfoɔ sɔhwɛ a wɔtwerɛ ma wɔgye wɔn tom no mu no so. Ↄkaa wei ɛsiane sɛ anyɛ hwee koraa no, akyerɛkyerɛfoɔ a wɔtwerɛɛ sɔhwɛ Ↄbɛnem 2021 mu fa dodoɔ no ara dii nkuguo wɔ adesuadeɛ mmienu mu.
Akyerɛkyerɛfoɔ nkabomkuo a wɔkɔɔ suapɔn, ne akyerɛkyerɛfoɔ a wɔfaa nteteeɛ nkaeɛ no mu no de ha a ɛha wɔn sɛ nkugudie no wɔ soro ato dwa.
Dr. Yaw Adutwum nam wei so hyɛɛ bɔ sɛ Asoɛeɛ no ne aboafoɔ binom bɛka abom ahwɛ asɛm yi.
