Akoma no yɛ nipadua akwaa a ɛdi dwuma soronko de boa nipadua akwaa no nyinaa. Dwuma titire a ɛdi ne sɛ ɛbɔ mogya kɔ nipadua no akwaa nyinaa mu ma nkwammoa a ɛwɔ mu no nya ahoɔden. Sɛ wokɔ nipadua no mu a, adɔkotafoɔ kyerɛ sɛ, akoma no hyɛ benkum so wɔ yɛn koko so. Wɔsane kyerɛ sɛ, onipa biara akoma kɛseɛ bɛyɛ sɛ sɛdeɛ ɔno ankasa ne twɛdeɛ a wamoa no kɛseɛ teɛ. Nhwehwɛmu sane kyerɛ sɛ, akoma no bɔ mprɛ aduɔson mmienu wɔ simma baako biara mu. Nti sɛ wohwɛ mu a, akoma no tumi bɔ bɛyɛ sɛ mpem ɔha dabiara, ɛnna ɔpepe aduasa nson afe biara.
Yɛhwɛ sɛdeɛ akoma no yɛ n’adwuma fa a, ɛkyerɛ ma yɛhunu sɛ ɛno na ɛkura nipadua no akwaa nyinaa. Ne saa nti sɛ ɛho te kyema a, ɛtumi ka akwaa ahodoɔ a aka no nyinaa. Wei nti na ɛsɛ sɛ yɛhwɛ na yɛsua yadeɛ a ɛtumi ka akoma no, na yɛhwɛ hunu kwan a yɛbɛtumi afa so asi ano kwan no.
Ɛdeɛn ne akoma yadeɛ?
Akoma yadeɛ yɛ yadeɛ ahodoɔ a ɛtumi ka akoma no ma ɛsi n’adwumayɛ ho kwan. Nyarewa ahodoɔ a ɛtumi ka akoma no bi ne yadeɛ a ɛwɔ ntini a mogya nam mu no, sɛ akoma no bɔ primprim, sɛ kyemateɛ aba akoma no yɔbea ho ne deɛ ɛkeka ho.
Nsɛnkyerɛnneɛ a ɛda adi wɔ akoma yadeɛ ho.
1. Obi a ɔwɔ akoma yadeɛ no tumi te yea wɔ ne koko so, ne titire ne ne benkum so, faako a akoma no hyɛ no.
2. Ne home ntaa nsisi so.
3. Ne nan anaa n’abasa tumi yɛ titiritii, ɔtumi te yea wɔ mu, afei ɛmu nso tumi yɛ no nwunu.
4. Ɔtumi te yea wɔ ne kɔn ho ma ɛtumi didi ba n’abɔdwe ase, ne mene mu ne n’akyi. Ɔte saa yea yinom nyinaa wɔ akwaa yɛabobɔ soɔ no benkum so.
5. Ne nan ase, ne yafunu ne n’ani akyi tumi pagyapagya.
6. Ebinom nso akoma tumi bɔ ntɛntɛm so pa ara.
7. Deɛ ɛtwa toɔ koraa a ɛyɛ hu ne sɛ, ɛtumi ma nipa no twa hwe.
Deɛ ɛde akoma yadeɛ ba anaa nneyɛeɛ a ɛtumi kɔfa akoma yadeɛ ba.
1. Ebinom wɔ hɔ a wɔn awofoɔ tumi de wo wɔn.
2. Sɛ obi wɔ mogyaborosoɔ na ɔmpɛ ano pomasiberɛ no tumi kɔfa ba.
3. Obi a ɔwɔ asikyire yadeɛ nso tumi nya akoma yadeɛ.
4. Nkyenedie bebree nso tumi kɔfa ba.
5. Afei nnuane ahodoɔ a sradeɛ wɔ mu die bebree tumi kɔfa ba.
6. Nsanom ne tawanom bebree de akoma yadeɛ ba.
7. Adwennwene mmorosoɔ nso tumi kɔfa ba.
8. Kɛseyɛ mmorosoɔ de akoma yadeɛ ba saa ara.
Ɔkwan a yɛbɛtumi afa so asi akomayadeɛ ano.
1. Ɛtwa sɛ obi a ɔwɔ akoma yadeɛ no te ne nkyene, asikyire, sradeɛ ne anwa nnuanedie bebree so.
2. Ɛsɛ sɛ ɔte nnuane a yɛapɔ ho die bebree so na ɔdi deɛ ntɛtɛ wɔ ho pii.
3. Afei, ɛtwa sɛ ɔtenetene n’apɔm.
4. Ɛsɛ sɛ ɔgyae nsa ne tawanom nso.
5. Ɛsɛ sɛ ɔsane hunu kwan pa a ɔbɛtumi afa so asɔ adwennwene mmorosoɔ ano.
6. Yɛresɔ mogyaborosoɔ ne asikyire yadeɛ ano no nso bɛtumi asi akoma yadeɛ ano kwan.
7. Ɛtwa sɛ obi a ɔwɔ akoma yadeɛ no taa di nnuane a ɛma ntini no mu buebue, saa nnuane yi bi ne gyeene, akekaduro, anwo ne deɛ ɛkeka ho.
8. Ɛsɛ sɛ ɔtaa di nnuane a nnuanennuro bi te sɛ potaaseɔm, magniiseɔm ɛnna kaaseɔm wɔ mu. Saa nnuane yi bi ne kwadu, paya, kube, ntoosi ne deɛ ɛkeka ho.
Ɛnam sɛ akoma no na ɛkura nipadua no akwaa nyinaa nti no, yɛtu fo sɛ kora w’akoma kyɛn deɛ ɛhia wo nyinaa, ɛfiri sɛ ɛno mu na nkwa firi ba.
Mma wo werɛ mfiri sɛ wobɛkyɛ ama wo nuanom ne w’ayɔnkofoɔ ama wɔanya saa nimdeɛ yi bi. Wobɛtumi aka ho asɛm nso.
