Mpanimfoɔ se, “Abɔsobaa na ɛma egya wae.” Ɛnna, yɛredi adi bio nso na ɛma ɔhɔhoɔ sere. Ɛnnɛ, yɛrebɛtoa yɛn adesua no so ahwɛ ‘Tete amammerɛ ne amanneɛ binom a yɛato atwene ne sɛdeɛ aka yɛn asetena ɛnnɛ’ no, ne fa a ɛtɔ so mmienu.
Adesua a ɛdi kan no mu no, yɛhunuu sɛ bragorɔ yɛ Akanfoɔ amammerɛ titire a wɔntoto no ase koraa. Afei nso, yɛhwɛɛ bragorɔ mu amanneɛ binom ne mfasoɔ ahodoɔ a yɛnya firi bragorɔ mu. Yɛwieeɛ no, yɛde asimmisa bi sii hɔ sɛ, ‘sɛ ɔbaa bi antwɛn amma wɔangoro no bra na ɔne ɔbarima kɔdi mpa mu agorɔ a, na wɔyɛ no deɛn?’
Tete no, ɛsiane sɛ na ɛyɛ mmusuo sɛ ɔbaa biara ne ɔbarima bɛda berɛ a wɔngoroo no bra nti, na sɛ ɔbaa bi yɛ saa a, wɔyɛ no Kyiribra. Kyiribra yɛ Akanfoɔ amammerɛ a wɔyɛ de popa mmusuo a ɔbaa a wɔngoroo no bra no ne ɔbarima no de aka kuro no. Ɛsiane sɛ kyiribra yɛ aniberesɛm nti, na wɔyɛ amanneɛ binom de sopa ɔbaa ne ɔbarima no nyinaa sɛdeɛ ɛbɛyɛ nhwɛsoɔ ne kɔkɔbɔ ama nkyirimma a wɔreba no. Ɛno akyi no, na wɔtwa Kyiribra, ɔbaa no, asu firi kuro no mu kɔpem abosome nkron a ɔbɛwo awie ansa na wɔasan agye no atena kuro no mu bio.
Afei nso, sɛ animguaseɛ a ɛde brɛ ɔbaa ne ɔbarima no da nkyɛn a, na animguaseɛ korɔ yi ara bi ka wɔn abusuafoɔ nso ɛfiri sɛ, sɛ nkonkonte anim gu ase a, ɛbi ka nkuruma. Ɛnna sɛ ɛka wo nantini nso a, na aka wo to.
Yei nti, na awofoɔ ma wɔn ani ku wɔn mmammaa ho yie pa ara sɛdeɛ ɛbɛyɛ a wɔnkɔfa nsopa a ɛte saa mmɛka abusua no. Bio nso, na mmaayewa ne mmeranteɛ nyinaa hwɛ wɔn ho so yie na ama wɔatumi akwati animguaseɛ a ɛte saa. Ɛno nti, tete no, na mperewanyinsɛn nnɔɔso sɛ ɛnnɛ. Ɛnna na mmaayewa siesie wɔn ho sie sɛdeɛ ɛbɛyɛ a ɔbarima bi kɔn nnɔ wɔn wɔ ɔkwan a ɛmfata so. Afei nso, na ɔbaa biara pɛ sɛ wɔgoro no bra de hyɛ ɔne n’abusuafoɔ animuonyam na ama no atumi anya kunu pa ne aware pa bi aware.
Awerɛhosɛm ne sɛ, ɛsiane suatra ne gyedie afrafra nti, ɛnnɛ, nnipa dodoɔ no ara adwene yɛ wɔn sɛ saa amammerɛ yinom ho nhia bio. Enti wɔato atwene reyɛ deɛ wɔpɛ biara. Ɛwom sɛ anibue aba, nanso ɛno nso nkyerɛ sɛ ɛsɛ sɛ yɛto yɛn amammerɛ a ɛyɛ papa no twene kɔfa obi deɛ. Aboa no ntakra na ɛma ne ho yɛ fɛ nanso ntakra bɔne deɛ, fanyinam kwaterekwa!
Deɛ afiri saa adeɛ yi mu aba ne sɛ, ɛnnɛ, mmaayewa tumi yiyi wɔn ho gu intanɛte so a wɔn ani mmu wɔn dwɛ mpo. Mmabunu a wɔwɔ hɔ ɛnnɛ atoto wɔ ani awe ɛfiri sɛ, amammerɛ ne amanneɛ a na ɛkyekyere wɔn kane no nyinaa nni hɔ bio.
Yei ama nkyirimma a wɔwɔ hɔ ɛnnɛ no abrabɔ asɛe na ama ɔbra bɔne atu atese wɔ ɔman yi mu. Ɛnnɛ, mperewanyinsɛn, nnubɔnenom, korɔnobɔ, tuutuusie, kyakyatoɔ, ne nneyɛɛ binom a ɛmfata Ɔkani ba nko ara na mmabunu reyɛ! Asane nso de ɔhaw abɛto ɔman no nyinaa so ɛfiri sɛ, ama mmabunu dodoɔ no ara ntumi nkɔ sukuu nnuru akyiri, na ebinom nso anya yarebɔne binom afa mu ahwere wɔn nkwa.
Yɛbɛtumi asi saa ɔhaw yi ano a, ɛsɛ sɛ awofoɔ kyerɛkyerɛ wɔn mma Akanfoɔ amammerɛ binom a ɛfa abrabɔ pa ho, ne afei asiane ahodoɔ a ɛwɔ ɔbra bɔne mu. Afei nso, ɛsɛ sɛ mmaayewa sukuukorɔ bɛyɛ adeɛ titire baako a ɛsɛ sɛ ɔman no ani ku ho pa ara. Ɛbɛyɛ yie mpo a, ɛsɛ sɛ wɔkyerɛkyerɛ yɛn amammerɛ binom a ɛfa abrabɔ pa ho no nyinaa wɔ sukuu ahodoɔ mu, yɛn kurom, yɛn mpɔtam, tɛlɛbihyin so, radio so, ne yɛn afie mu nyinaa sɛdeɛ ɛbɛma mmabunu ahunu deɛ ɛsɛ sɛ wɔde wɔn abrabɔ yɛ.
Afei nso, ɛsɛ sɛ yɛtumi buebue sukuu bebree a ɛkyerɛkyerɛ nsaadwuma ahodoɔ no nyinaa bi wɔ ɔman yi mu sɛdeɛ ɛbɛboa ama mmabunu, titire ne mmaa asua nsaanodwuma ahodoɔ binom. Ɛno bɛboa ama wɔatumi de wɔ mmerɛ ayɛ nneɛma binom a ɛso bɛba wɔn mfasoɔ ɛnnɛ ne daakye.
Menim sɛ yɛmfiti prɛkopɛ mpɔ yɛn se, nanso sɛ yɛfiri aseɛ yɛ no nkakrankakra a, yɛbɛduru hɔ. Adeɛ yi, sɛ ɔkwan no ware sɛ deɛn mpo a, ɛbɛwie wɔ aboboano.
