Wiase mu nnipa dodoɔ no ara ani gye nnwom ho, sɛ ɛyɛ ne tie anaasɛ ne toɔ. Obiara wɔ botaeɛ pɔtee bi nti a ɔtie dwom bi. Obi ani gye dwom pɔtee bi ho ɛnam sɛ ɛkaekae no mmerɛ pa bi a atwam, anaa baabi pɔtee bi a ɔdii kan tee saa dwom no. Obi nso tumi pɛ dwom bi ɛnam ɔdɔ a ɔwɔ ma ɔdwomtoni anaa dwomtwerɛfoɔ no. Botaeɛ no gugu mu ahodoɔ ma obiara, mmom adeɛ a yɛn adwene ntaa nkɔ so kɛse yɛ tumi anaa nsunsuansoɔ a saa dwom no tumi nya wɔ yɛn nsusuiɛ ne yɛn atenka so.
Ɛnam dwom so, nipa tumi si agyinaeɛ. Dwom tumi kanyan abufuo, anigyeɛ, awerɛhoɔ, nnuho, adwaman, asomdwoeɛ, bɔnefakyɛ, basabasayɛ, abrabɔ mu nhyehyɛeɛ pa, ɔdɔ ne afoforɔ pii.
Sɛdeɛ yɛwɔ berɛ ne beaeɛ pɔtee a yɛhyɛ atadeɛ bi no, saa ara na ɛteɛ wɔ dwomtie ne dwomtoɔ mu. Ɛwom sɛ mmara biara nni hɔ ma berɛ bi a ɛsɛ sɛ obi tie dwom deɛ, nanso sɛdeɛ ɛbɛyɛ a ɛrennya nsunsuansoɔ bɔne wɔ wo so na ɛmma wo ntu agyinaeɛ bɔne bi nti, anka ɛyɛ sɛ wobɛhwɛ berɛ a wode tie dwom bi yie.
Wo susu sɛ berɛ bɛn na ɛyɛ sɛ obi tie awerɛhoɔ dwom? So yɛwɔ berɛ pɔtee bi a yɛde tie saa dwom yi anaa? Obi wɔ anigyeɛ mu anaasɛ biribiara nyɛɛ no a, ɛyɛ a na dwom a ɛyɛ awerɛhoɔ no ntaa nnya nsunsuansoɔ biara wɔ ne so, gye sɛ saa dwom no kaekae no mmerɛ bɔne bi a atwam. Yɛtaa te sɛ, hwee nha wo a wode dwom no dɛ na ɛsa kɛkɛ, mmom wowɔ awerɛhoɔ mu dada na wosane tie dwom a ɛte saa a, ɛhɔ na wohyɛ emu nsɛm no nso sane nya mu nteaseɛ yie pa ara. Ɛno nti, berɛ a wowɔ awerɛhoɔ mu dada no, ɛbɛyɛ sɛ anka wobɛtie dwom a w’ani gye ho a ɛbɛma wo anigyeɛ ne awerɛkyekyerɛ, na atwe w’adwene afiri deɛ ɛhaw no so sene sɛ wobɛkɔ so ara atie awerɛhoɔ dwom a ɛma w’awerɛhoɔ yɛ kɛse no.
Bio, dwom a ɛmu nsɛm kyerɛ sɛ anidasoɔ biara nni asase yi so, na ɛsane kyerɛ nipa sɛ ɔhaw biara nni ho anosie no ma wɔn a wɔtie no anidasoɔ nso sa ampa ara. Ɛma nnipa susu sɛ wɔwu a na asa, ɛno nti obi kɔ ahohiahia mu na ɔtaa tie nnwom a ɛmu nsɛm no tete sei a ɛmfa nkuranhyɛsɛm biara mmrɛ no a, ɔtumi gye ɔno ankasa ne kra firi ne nsam ɛsiane sɛ ɔsusu sɛ ɔnya wu a, na ne haw nyinaa to atwa.
Nnwom tumi de nkabom ne asomdwoeɛ ba. Yɛte afutuo pii firi mpanimfoɔ nkyɛn wɔ wɔn kasa mu deɛ, nanso nnwom mu nsɛm tumi tɔ obi akoma so kɛse ma ɔde mu nsɛm yɛ adwuma sene deɛ ɔte no kasa mu mpo. Ampa ara, dwom a ɛkasa fa asomdwoeɛ ne nkabom ho no tumi ma atiefoɔ no nso nya saa akoma korɔ no ara. Yɛwɔ nnwom ahodoɔ a ɛkyerɛ sɛ yɛn nyinaa yɛ nnipa baako, ɛmfa ho ne sɛ woyɛ Fanteni, Frafrani, Asanteni, Anwonani anaa Bononi, ɛma yɛhunu sɛ yɛn nyinaa yɛyɛ Ghanafoɔ.
Dwom tumi kanyan obi abufuo, na ɛhyɛ no ma ɔtɔ bɔne a obi de ayɛ no no so werɛ. Nnwom no bi kasa tia bɔnefakyɛ, ɛno nti mpɛn dodoɔ a ɔtiefoɔ no retie dwom bi a ɛte saa no, ɔfa suban a dwom no mu nsɛm da no adi no ara. Na ɔhyɛ aseɛ dwene kwan a ɔbɛfa so atua afoforɔ ka wɔ deɛ wɔayɛ no mmerɛ ho.
Bio, nnwom tumi ma nnipa bɔ adwaman mpo wɔ berɛ a na wɔnhyɛɛ da nnwenee ho. Wei tumi si saa ɛnam sɛ dwom a ɛtete saa no mu nsɛm yɛ deɛ ɛkanyan akɔnnɔ, na mpɛn dodoɔ a nipa no retie na ɔretwa ho mfoni wɔ ne tirim no, mpɛn dodoɔ no ara nso na na ɔrenya ɔpɛ no sɛ ɔsɔ ahwɛ.
Nnwom sane tumi boa ma nnipa yɛ nhyehyɛeɛ pa wɔ wɔn abrabɔ. Nnwom no bi tu fo yie fa kwan pa a ɛsɛ sɛ onipa fa so bɔ bra, ɛma anidahɔ, ɛhyɛ nkuran, na ɛkyerɛkyerɛ kwan pa a nipa bɛtumi afa so adi yie wɔ abrabɔ mu, ɛkasa fa ntotoeɛ pa ho. Obi taa teɛ nnwom ahodoɔ bi te sɛ yei a, ɔyɛ ne nhyehyɛeɛ yie wɔ abrabɔ mu, ɔma n’ani da hɔ wɔ ne nneyɛeɛ nyinaa mu na ɔbɔ ne ho mmɔden nso sɛ ɔbɛduru ne botaeɛ ho.
Atenka ne nsusuiɛ ahodoɔ a nnwom tumi de ba deɛ ɛyɛ bebree. Mmom, hwɛ nnwom a wotie no yie, susu ho hwɛ sɛ ɛpira wo anaa ɛboa wo. Hwɛ hunu sɛ ɛma wo si agyinaeɛ pa anaa bɔne. Bɔ mmɔden sɛ daa wobɛtie nnwom a ɛtu fo pa, ɛma wo anigyeɛ, ɛhyɛ wo nkuran na ɛmmu w’abam.
