Akwaa ahodoɔ na ɛwɔ nipadua no mu. Ɛmu biara nso di dwumadie soronko bi de boa nipadua no kankɔ. Ɛnnɛ, yɛbɛhwɛ nipadua akwaa no mu baako a ɛho hia pa ara. Ɛno ne saa.
Saa yɛ nipadua mu akwaa a ɛsom bo na ɛdi dwuma kɛseɛ de boa nipadua no. Adɔkotafoɔ kyerɛ sɛ onipa biara wɔ saa mmienu. Ɛba nipadua no mu a, saa no yɔbea te sɛ adua a ɛhyɛ yɛn sisi akyi no soro kakra wɔ sisie no fa ne ne fa. Nhwehwɛmu kyerɛ sɛ saa yɛ akwaa bi a ɛno ankasa tumi siesie ne ho berɛ a ɛrekɔ mmerɛyɛ mu no.
Saa wɔ dwuma titire a ɛdi ma nipadua no. Deɛ ɛdi kan ne sɛ, ɛboa sɔne mogya a ɛdi aforosianeɛ wɔ nipadua no mu no yi ɛfi ne ɛborɔ firi mu. Afei nso, ɛkyi nsuo ahodoɔ bi a ebi boa ma mogya ba wɔ nipadua no mu, na ebi nso hwɛ sɛ ahoɔden a akoma no de bɔ mogya kɔ ntini no mu mmoro so. Deɛ ɛtwa toɔ koraa no, saa no sane hwɛ sɛ nipadua no bɛnya nsuo ne ahoɔdennuro binom dodoɔ a ɛhia mma no mmoro so.
Deɛ ɛtumi de saa mu yadeɛ ba anaa nneyɛeɛ ɛtumi kɔfa saa mu yadeɛ ba.
1. Mogyaborosoɔ yɛ yadeɛ baako a ɛtumi bɔ kwan ma obi tumi nya saa mu yadeɛ. Adɔkotafoɔ kyerɛ sɛ ɛrekame ayɛ sɛ, wofa wɔn a wɔwɔ mogyaborosoɔ a, wɔn mu ɔha mu nkyekyɛmu aduonum tumi nya saa mu haw.
2. Asikyire yadeɛ nso yɛ ɔhaw titire pa ara a ɛtumi ma obi nya saa mu yadeɛ.
3. Deɛ ɛdi hɔ bio yɛ sɛ obi ntaa nnom nsu dodoɔ. Ɛnam sɛ ɛyɛ saa no asɛdeɛ sɛ ɛyi efi ne borɔ firi mogya no mu nti, ehia nsuo pii na atumi adi saa dwuma no. Sɛ nipadua no annya nsu dodoɔ a ehia sɛ ɛde di ne dwuma a, ɛma saa no berɛ wɔ n’adwumayɛ mu ɛma no tumi gye ne ho.
4. Kɛseyɛ mmorosoɔ
5. Tawanom ne nsanom bebree.
6. Nkyenedie bebree, namono ne sradeɛ nnuanedie bebree.
7. Nnuro a obi kɔtɔ nom berɛ a dɔkota ntwerɛ mmaa no.
8. Anonneɛ ahodoɔ a obi kɔtɔ nom de pɛ ahoɔden nom bebree.
9. Yɛtaa de nnuhuam mfrafraeɛ ahodoɔ a yɛde noa nnuane ma no tu hua renoa nnuane adi.
Nsɛnkyerɛnneɛ a ɛda adi wɔ saa mu yadeɛ ho.
1. Ɛtumi ma nipa a ɔwɔ saa haw yi no bo taa fono no anaasɛ ɔfefe.
2. Afei, ɛtumi nso ma ne nan ase pagyapagya ma ɔde ne nsatea Mia ne nan no ase mpo a ɛtɔ mu.
3. Ɔtaa nya ahoɔmmerɛ ne yea wɔ ne wedeɛ mu.
4. Nsesaeɛ tumi ba ne dwonsɔ dodoɔ mu, ɛno ne sɛ, ɔtumi dwonsɔ bebree, ɛnna dwonsɔ no ani nso tumi sesa.
5. Honam ani ahoɔhene tumi te si nipa no so.
6. Ne homee ntaa nsisi so.
7. Ne wedeɛ mu tumi yɛ no hodwoo.
Hyɛ no nso sɛ, wohunu saa nsɛnkyerɛnneɛ yi mu biara wɔ wo nipadua mu a, na ɛno nkyerɛ sɛ ɛyɛ saa mu haw anaa ɛnyɛ mu bia. Mmom deɛ ehia pa ara ne sɛ wobɛkɔ ayaresabea akɔhwɛ nipadua no mu na woahunu wo haw.
Kwan a yɛbɛfa so asi ano.
1. Deɛ ehia pa ara baako ne sɛ wobɛtaa akɔ ayaresabea na woakɔhwɛ wo saa no gyinabea.
2. Ɛnni sɛ yɛde yɛn pɛ kɔtotɔ nnuro biara a dɔkota ntwerɛ mmaa yɛn anaasɛ ɛnni sɛ yɛnom nnuro boro dodoɔ dɔkota atwerɛ ama yɛn sɛ yɛnnom so.
3. Ɛsɛ sɛ yɛhwɛ yɛn nkyenedie so yie. Ɛnni sɛ yɛdi no bebree.
4. Yɛnhwɛ sɛ yɛbɛnom nsuo bebree.
5. Nsanom ne tawanom mmoa saa no ahoɔden, ɛno nti ɛtwa sɛ yɛtwe yɛn ho firi ho.
6. Yɛnni nnuane pa a ahoɔden wɔ mu te sɛ ankaa abusua, adua abusua, gyeene, anwoo, atosodeɛ ahodoɔ no nyinaa ne nnuaba ahodoɔ a ɛbɛboa saa no apɔmuden.
Yɛ ahwɛyie wɔ wo saa ho, twe wo ho firi nneyɛeɛ a ɛbɛtumi akɔfa ɔsɛeɛ abrɛ wo saa no ho, na di nnuane pa. Pere papa seesei, na woankɔda nnuro so daakye. Bɔ mmɔden sɛ wobɛkyɛ ama afoforɔ nso akenkan bi.
