Odepua yɛ nsane yadeɛ a yareɛ mmoa de ba. Saa yadeɛ yi taa ha mmaa titiri pa ara wɔ wɔn baa mu anaa wɔn akosua kumaa no mu. Ɛrekame ayɛ sɛ, sɛ wofa nyarewa ahodoɔ mmiɛnsa biara a ɛtaa ha mmaa si hɔ a, wobɛhunu saa yadeɛ yi bi wɔ mu. Nhwehwɛmu kyerɛ sɛ, sɛ wofa mmaa nnan a, wobɛtumi anya mu mmiɛnsa a wɔanya saa yadeɛ yi bi pɛn anaa wɔanya atoatoa so pɛn. Mmaa a wɔtaa nya saa yadeɛ yi pa ara yɛ mmaa a wɔyɛ mmabunu.
Kae sɛ, saa yadeɛ a yɛreka ho asɛm yi nka nyarewa a yɛnya firi nna mu nkitahodie mu, ɛfiri sɛ ɔbaa bi bɛtumi anya yadeɛ yi wɔ berɛ a ɔne barima biara nhyiaa wɔ nna mu da. Nanso wei nkyerɛ sɛ ɔbaa bi rentumi nnya mfiri nna mu.
Nsɛnkyerɛnneɛ a ɛda adi
1. Deɛ ɛtaa da adi pa ara baako ne sɛ, wobɛtaa ahunu sɛ nsuo fitaa bi firi wo baa mu reba. Mmaa binom kyerɛ sɛ, saa nsuo yi adeban te sɛ ‘fanmilk’ a nka biara nni mu. Ɛtɔ da nso a saa nsuo yi tumi yɛ yurobii anaasɛ emu yɛ ha sɛ nsuo ankasa.
2. Wo baa mu anaa ɛho taa yɛ wo hene pa ara, na emu nso tumi hyehye wo.
3. Ebinom tumi te yea wɔ berɛ a wɔne ɔbarima bi renya nna mu nhyiamudie anaasɛ berɛ a wɔredwonsɔ.
4. Tebea a ɛyɛ hu pa ara mu no, ɛtumi ma wo baa no honhono yɛ kɔɔ.
Hyɛ no nso sɛ, saa nsɛnkyerɛnneɛ a yɛabobɔ so yi no sesa firi dodoɔ a ɛda adi wɔ ankorɛankorɛ biara ho. Ɛmu mmienu pɛ bɛtumi ada adi wɔ obi ho, saa ara na ne nyinaa nso bɛtumi ada adi wɔ ɔfoforɔ ho.
Ɛdeɛn koraa na ɛkɔfa saa yadeɛ yi ba?
Sɛ mmoa a ɛwɔ mmaa ase a wɔbɔ mmaa ase ho ban firi yadeɛ ho no dodoɔ boro sɛdeɛ ɛsɛ sɛ anka wɔn ano si no so a, wɔn ankasa hyɛ aseɛ ko tia wɔn ho. Wei ma no bɛda adi sɛ odeepua. Ɛte saa deɛ a ɛnneɛ na yɛrebisa sɛ, ɛdeɛn na ɔbaa bi taa yɛ a ɛkɔfa wei ba?
1. Wɔn a wɔtaa de wɔn pɛ totɔ nnuro (antibiotics) nom de kum yadeɛ mmoa wɔ nipadua no mu.
2. Wɔn nso a wɔtaa de wɔn pɛ nom nnuro ahodoɔ de bɔ wɔn ho ban firi nyinsɛn ho.
3. Nnuro binom ne nyarewa binom te sɛ babaso nso tumi berɛ yɛn nkwammoa ase ma no kɔfa saa yadeɛ yi ba.
4. Adidie basabasa bi te sɛ asikyire anaa adɔkɔdɔkɔ nnuanedie bebree nso tumi kɔfa saa yadeɛ yi ba.
5. Kɛseyɛ mmorosoɔ.
6. Wɔn a wɔwɔ asikyire yadeɛ na wɔnhwɛ so nnom wɔn nnuro nso tumi kɔfa ba.
7. Wɔn a wɔtaa de nnuro ne nnuhwam ahodoɔ bi hohoro anaa hyehyɛ wɔn ase, a wɔn botaeɛ ne sɛ wɔde resiesie hɔ no nso tumi kɔfa yadeɛ yi ba.
8. Worehyɛ amoaseɛ a ɛkyekyere wo pa ara, na ɛnsane nyɛ deɛ wɔde asaawa ayɛ no nso tumi kɔfa yadeɛ yi ba.
Kwan ahodoɔ a yɛbɛtumi afa so asi ano
Wopɛ sɛ wosi odeepua ano anaa? Ɛnneɛ bɔ mmɔden sɛ wobɛtwe wo ho afiri deɛ yɛadi kan aka sɛ ɛtumi de odeepua ba no nyinaa ho. Ɛwom, ebinom wɔ hɔ a wonni so tumi biara te sɛ deɛ ɛnam yadeɛ so ba no. Mmom, deɛ ɛfa amoaseɛ pa ne kwan pa a ɛsɛ sɛ wohyɛ no, nnuro a ɛnni kwan sɛ wo ara wofiri wo pɛ mu nom, kɛseyɛ mmorosoɔ a ɛsɛ sɛ wosi ano kwan, adidie basabasa ne nnuro ahodoɔ a w’ankasa wode kɔ w’ase a wobɛtumi asi ano kwan deɛ, wotumi hwɛ wo ho so yie yɛ no saa ara a wobɛde wo ho afiri odeepua ho.
Hyɛ no nso, na kyɛ ma afoforɔ nso nkan bi. Afei wobɛtumi aka ho asɛm nso.
