Sɛdeɛ yɛnya berɛ siesie yɛn nipadua ma yɛn ho yɛ fɛ no, saa ara nso na ɛho hia pa ara sɛ yɛbɔ yɛn adwene no ho ban wɔ akwan binom so. Yɛbɛtumi anya abrabɔ a anigyeɛ ne abotɔyam wɔ mu a, ɛbɛgyina sɛdeɛ yɛn adwene no bɛtumi ayɛ adwuma yie no so ɛfiri sɛ, sɛ yɛammɔ yɛn adwene ho ban a, ɛbɛtumi ama adwennwene ahyɛ yɛ so anaa yɛanya adwenem haw mpo. Adesua yi mu no, yɛrebɛhwɛ nneɛma num binom a, yɛbɛtumi ayɛ de abɔ yɛn adwene ho ban.
Sua sɛ wobɛdwene nneɛma ho yie.
Adeɛ baako a wobɛtumi ayɛ de abɔ w’adwene ho ban ne sɛ, wode w’adwene bɛsi nneɛma pɔtee binom so asusu ho yie ansa na woatu ho anammɔn. Ma w’ani nkɔ wo nsusuiɛ, w’atenka, ne nneɛma a atwa wo ho ahyia no so yie pa ara. Ɛsɛ sɛ woyɛ yei berɛ a woremma no ntwetwe w’adwene mfiri nneɛma a ɛho hia pa ara woresusu ho no so. Wotumi dwene nneɛma ho yie a, ɛbɛboa ama woasisi gyinaeɛ a nyansa wɔm, adwennwene renhyɛ so, na wobɛtumi nso akwati adwenem haw biara.
Teetee w’apɔ mu daa
Sɛdeɛ apɔmuteetee boa ma nipadua no nya ahoɔden no, saa ara na ɛboa ma adwene no nso tumi yɛ adwuma yie. Wotaa teetee w’apɔ mu a, ɛbɛboa wo ama w’anigyeɛ asi pi, nsɛm anaa adwennwene rentumi nhyɛ wo so, na ɛbɛma woanya wo ho mu ahotɔsoɔ a ɛdi mu nso. Bio, apɔmuteetee boa ma wotumi da yie, na ɛma wotumi nso dwene yie. Deɛ mabobɔ so yinom nyinaa da nkyɛn a, apɔmuteetee so wɔ mfasoɔ bebree pa ara.
Nya berɛ da yie na gye w’ahome
Ɛba apɔmuden pa a, nna di mu akotene yie pa ara. Woantumi anna yie anaasɛ woanya berɛ annye w’ahome sɛdeɛ ɛsɛ a, ɛbɛtumi ama w’anigyeɛ so ate, worentumi nnwene nneɛma ho yie na worentumi nkae nneɛma sɛdeɛ ɛsɛ. Anyɛ yie koraa no, ɛsɛ sɛ wode yɛ wo botaeɛ sɛ wobɛda nnɔnhwere nson kɔsi nkron anadwo biara. Afei nso, ɛsɛ sɛ woyɛ nhyehyɛeɛ pa a ɛbɛboa wo ama woatumi ada ntɛm na woada yie. Nneɛma a wobɛtumi ayɛ ama woatumi ada ntɛm na woada yie no bi ne akenkan, ne deɛ ɛkeka ho.
Di nnuane pa
Sɛdeɛ nipadua no hia nnuane a ahoɔdennuro wɔ mu ansa na atumi ayɛ adwuma yie no, saa ara na adwene no nso hia nnuane a ahoɔden wɔ mu. Wotumi hwɛ w’adidie mu yie na wodi nnuane pa a, ɛbɛboa ama w’adwene no ayɛ adwuma yie ɛfiri sɛ, wobɛtumi asusu nneɛma ho yie na wobɛtumi nso akae nneɛma ntɛm. Nnuane a wobɛtumi adi no binom ne nnuaba, atosodeɛ ahodoɔ, ɛnam, ne ade. Woredi saa nnuane yinom no, ɛsɛ sɛ wotumi twe wo firi nnuane ahodoɔ binom a asikyire ahyɛ no ma ho anaa wote ne die so koraa.
Wo ne nkurɔfoɔ mmɔ
Adeɛ baako a wobɛtumi ayɛ de abɔ w’adwene ho ban ne sɛ wo ne afoforɔ bɛbɔ. Wo ne nkurɔfoɔ bɔ a, ɛbɛtumi ama woanya mmoa, anigyeɛ ne ahotɔsoɔ nso. Yei nti, fa yɛ wo botaeɛ sɛ wo ne w’abusua anaa wo yɔnkonom bɛbɔ. Ɛbɛyɛ yie a, fa wo ho dɔm kuo bi a wonim wɔn yie na wonim sɛ wɔbɛtumi aboa wo ama woaduru wo botaeɛ ahodoɔ ho. Wopɛ nso a, wobɛtumi atu wo ho ama akɔboa wo mpɔtam hɔfoɔ ama wɔayɛ kwasafodwuma bi. Woyɛ yeinom a, ɛbɛma woate nka sɛ wowɔ nnipa binom a wɔdwene wo ho, na ɛno mma adwennwene renhyɛ wo so, na w’akoma nso bɛtɔ wo yam.
Tɔfabɔ mu no, yɛahunu sɛ, sɛ yɛbɛtumi abɔ yɛn adwene ho ban yie a, ɛsɛ sɛ yɛsua sɛ yɛbɛdwene nneɛma ho yie, yɛbɛteetee yɛn apɔ mu daa, yɛbɛnya berɛ ada yie na yɛagye yɛn ahome, yɛbɛdi nnuane pa, na afei nso yɛne nkurɔfoɔ abɔ.
