Ɛduru nsɔtɔ berɛm a, ɛsiane sɛdeɛ ewiem tebea tumi yɛ nti, ɛho hia pa ara sɛ yɛyɛ ahwɛyie berɛ biara. Nsuframa tumi sisi, ayerɛmoo tete ma agradaa dwidwa. Ɛtɔ da a, mframa gyampanturudu tumi tutu nnua ase, sane bubu adan. Baabi mpo deɛ, agradaa no tumi te si nnua ne nneɛma afoforɔ mu ma no hye.
Ɛsiane akwanhyia ahodoɔ yinom a ɛtumi sisi nsutɔ berɛm nti, mfasoɔ wɔ so pa ara sɛ yɛhunu akwan binom a yɛbɛtumi afa so abɔ yɛn ho ban wɔ saa berɛ no mu. Yei nti, adesua yi mu no, yɛrebɛhwɛ nneɛma nson binom a yɛbɛtumi ayɛ de abɔ yɛn ho ban afiri asiane ahodoɔ ho berɛ a yɛreka kaa wɔ nsutɔ berɛm.
1. Berɛ biara a woretwi kaa na nsuo retɔ no, ɛsɛ sɛ wosɔ kaa no kanea si so berɛ a wonam kwan so no. Yei bɛboa ama nnipa afoforɔ a wɔnam kwan no so te sɛ adrɔbafoɔ ne wɔn a wɔnam fam nyinaa ahunu wo kaa no ntɛm, na atumi abɔ wo ne wɔn nyinaa ho ban afiri akwanhyia ho. Afei nso, sɛ wosɔ wo kaa kanea berɛ a nsuo retɔ a, ɛtumi boa wo ma wohunu kwan mu yie ɛfiri sɛ, nsuo retɔ a ɛkwan mu taa yɛ wisiwisi.
2. Ansa na wobɛtu kaa wɔ nsutɔ berɛm no, ɛsɛ sɛ wohwɛ hunu sɛ adeɛ a ɛbɔ wo kaa no anim a ɛpopa nsuo ma wotumi hunu kwan mu yie no reyɛ adwuma sɛdeɛ ɛsɛ.
3. Ɛsɛ sɛ wotɔ kɔba a ɛnam wɔ ho sɛdeɛ ɛbɛyɛ a sɛ nsuo tɔ ma ɛkwan mu yɛ toro a, ɛrempa wo kaa no mfiri wo kwan mu mma no nkɔfa akwanhyia biara mma. Bio nso, hwɛ hunu sɛ wo breeki reyɛ adwuma sɛdeɛ ɛsɛ.
4. Woretwi kaa berɛ a nsuo retɔ a, ɛsɛ sɛ wote w’ammirika so. Yei bɛboa na sɛ asiane bi si prɛko pɛ a, woatumi atwitwa agye wo ho ne afoforɔ. Yei kyerɛ sɛ, nsutɔ berɛm deɛ, mmirika ntɛntɛ ho nhia koraa.
5. Nsuo a agugu kwan no so no pa wo kaa no ma kaa no ani firi aseɛ toto wo a, ɛnsɛ sɛ woma wo ho pere wo, wo yam hyehye wo anaasɛ wobɔ breeki prɛkopɛ. Mmom, ɛsɛ sɛ woto wo bo ase na wotenetene kaa no ara kɔpem sɛ mmirika no ano bɛdwodwo ama woanya baabi papa agyina.
6. Berɛ biara, ansa na wobɛtu wo kaa afiri fie no, ɛsɛ sɛ wobɔ mmɔden hunu sɛ kaa no ho baabiara te apɔ. Woanhwehwɛ kaa no ho saa na sɛ ɛho baabi atɔ kyima a, ɛbɛtumi akɔgyae wo asi akwantimfi ama w’ani atutu agu wo nsam. Ɛkɔyɛ baabi a nnipa mmɛn hɔ nso a, ɛbɛtumi ama nnipabɔnefoɔ binom mpo abɛto ahyɛ wo so adi wo awu a obiara nte ho asɛm.
7. Ɛnsɛ sɛ wotwi kaa fa baabi a nsuo ayiri afa hɔ ama wonhunu fam. Wote kaa mu na nsuo ayiri afa baabi a ɛnyɛ papa sɛ wode kaa no bɛfa nsuo no mu ɛfiri sɛ, ɛbɛyɛ den pa ara sɛ wobɛtumi ahunu nsuo mu tenten ne ano den. Nanso, sɛ ɛsɛ sɛ wofa nsuo no mu ansa na woatumi akɔ nso a, nneɛ, yɛ ahwɛyie pa ara na kɔ nkakrankakra. Mmom, sɛ wote si nsuo no mu na wohunu sɛ nsuo no deda kaa no pono so ase a, ɛbɛyɛ papa sɛ wobɛtu wo ho fo atwɛn ama nsuo no atwe kakra ansa na woafa mu akɔ.
Tɔfabɔ
Wobɛtumi abɔ wo ho ban berɛ a woretwi kaa wɔ nsutɔ berɛm a, ɛho hia pa ara sɛ wode akwankyerɛ yinom yɛ adwuma na woyɛ ahwɛyie nso. Ɛyɛ papa sɛ worennuru fie ntɛm sene sɛ worennuru fie koraa. Wo nkwa ho hia nti, ma w’ani nna hɔ.
