Sε yεwura apᴐmuden wiase mu a, nneεma a εboa kanyan nna mu nkitahodie mu ahoᴐden no bi yε nnuane, anonneε, ne nneεma anaa nnuro binom a εboa ma obi akᴐnnᴐ a ᴐwᴐ wᴐ mpa so agodie mu no ano yε den. Deε atwerε yi kasa fa ho kεse yε nnuro ahodoᴐ a wᴐnom anaa wᴐde sra, de kanyan nna mu nkitahodie mu ahoᴐden ne akᴐnnᴐ. Sa nnuro yi nnyε na koraa, na sε obi bᴐ wira nnutᴐnbea papa biara mu a, ᴐbεtumi anya saa nnuro yi bi atᴐ de adi ne dwuma.
Mmom, deε nnipa pii nnim, na wᴐn a wᴐnim nso abu wᴐn ani agu so ne sε, εbεtumi de obi akᴐ adamena mu ntεm so. Yεreka wei, εsiane sε εbi atoto ebinom ama wᴐafa mu atoa nananom wᴐ nseεdo. Momma yεnhwε deε animdefoᴐ ne atwotwowuro binom aka afa wei ho, ne nsusuanso bᴐne a εwᴐ wᴐ apᴐmuden so a εbεtumi agye obi nkwa afiri ne nsam.
- Ԑtumi sε Brεboᴐ ne Saa
Saa nneεma mmienu yi yε akwaa a nnipa nkwa gyina so titire no mu bi, enti sε εmu bi sεe a, onipa tumi nam so hwere ne nkwa. Adwumakuo a εhwε nnuane ne nnuro adwuma so wᴐ Alataman mu de too dwa mmerε bi a atwam sε, nnubᴐne bi a ano yε hye na εho yε hu ma nipadua no akwaa no bi te sε berεboᴐ ne saa apᴐmuden wᴐ saa nniro yinom mu. Sε εnam saa nnuro yi so na akwaa yinom bi sεe a, εbεyε den pa ara sε wᴐbεtumi asa saa yareε no. Sε εba no saa a, owuo ne adeε a εdi akyire.
Nsunsuanso bᴐne binom a εtumi de ba bi ne sε wo hwene bᴐn bεsisi, tipaeε, yafunukeka, sε wo yam reyε kusuu, abofono, ayamtuo, awerεfire anaa akaakaeε mu haw, sε worete yaw wᴐ w’akyi, sε wonhunu nsonsonoeε a εda ahosuo bibire ne ahahan mono ntam, asosie, sε adeε gyegye anaa woso a wonte no w’aso mu, ne mmerεwyε.
- Ahoᴐden a mogya de di aforosianeε wᴐ wo honam akwaa nkaeε no ho mu no so tumi te hwi. Nnuro a wᴐnom de kanyan nna mu nkitahodie no ma nna mu nkitahodie mu yε hye, na εyε den pa ara, na εma nna mu nkitahodie dwumadie no kyεre nso. Wei firi sε, mogya a εdi aforosianeε kᴐ “agyapadeε” no mu no dᴐᴐso, na ano nso yε den. Ԑno tumi ma mogya a εdi aforosianeε wᴐ nipadua no mu no so te koraa. Nnuyεfoᴐ ne ayaresafoᴐ kyerε sε, sε mogya no ahoᴐden a εde di aforosianeε no so te a, εyε hu sene mogyaborosoᴐ mpo, εfiri sε sε εso te saa a, εhia mmerε ne nneεma pii ansa na atumi asi ne dadam.
- Ԑtumi de nnwodwoeε ne boninyε ba, anaa εtumi ma ᴐbarima ho nsuo gyene. Wei kyerε sε ᴐbarima no ntumi nhyε nyinsεn. Animdefoᴐ bᴐ kᴐkᴐ kyerε wᴐn a wᴐtaa de nnuro a εkanyan nna mu nkitahodie no sε εtumi de nyarewa bi a εka nipa to hᴐ te sε nnwodwoeε, kisikuro, ne deε εkeka ho brε onipa. Nsunsuanso bᴐne a εnne no nam no bi ne sε, εtumi ma mogya so te pa ara, na εnam so de tipaeε a ano yε den, ne mmerεwyε ba, na εtumi ma onipa twa hwe. Ԑma ᴐbarima dwonsᴐtwaa mu bae, na εma dwonsᴐ yε den pa ara.
- Adeε baako a εha adwene wᴐ saa nnuro yi ho ne sε, εnyε deε εsε sε εyε no, na mmom εyε deε εnne no bᴐ abira. Weinom bi ne sε, εma wohwere w’akᴐnnᴐ. Afei εmma barima no barima no ara nsᴐre sεdeε εsε sε anka εsᴐre, afei sε wode di dwuma toatoa so kyεre a, εnne wo ho fa, na mmerε bi mu no, εnyε adwuma bio sε wonom a. Saa berε no na nnipa pere nom no dodo sεdeε εbεyε adwuma, na wei na εtumi de nnipa kᴐ owuo mu no.
Wei ne nsunsuanso bᴐne pii a εkeka ho na εde ba, momma yεnhwε yεn ho so yie. Akᴐnnᴐ ho hia deε nanso nkwa ho hia sene no.
