Ɛnnɛ, ahoɔden a nnipa wɔ no nt sɛ kane no. Ɛwom sɛ nimdeɛ akɔ anim ama anibue aba deɛ, nanso nnuane a yɛdi no da so ara yɛ adeɛ baako a ɛma yɛn apɔmuden ho ba asɛm.
Tete no, na yɛn nananom di nhabamma, nom dudo, we mmire, kɔtɔ, nwa, ne deɛ ɛkeka ho. Ɛsiane sɛ na wɔdi saa nnoɔma yinom nti, na ɛyɛ den pa ara sɛ wɔbɛyare basabasa anaasɛ yareɛ bi a ɛyɛ hu bɛbɔ wɔn ɛfiri sɛ, na nnuane a wɔdi no akɔyɛ te sɛ nnuro binom a ɛsa wɔn yareɛ ma wɔnya akwahosan pa.
Ɛnnɛ deɛ, ɛnte sɛ kane no koraa ɛfiri sɛ, nnipa di adɔkɔdɔkɔdeɛ ne afenemfenemdeɛ kyɛn kane no. Afei nso, wɔde nneɛma binom fra nnuane a yɛdi no ma no yɛ te sɛ deɛ wɔde asikyire agu mu. Yeinom nyinaa tumi ma nnipa nya nyarewa binom a wɔnhwɛ kwan.
Sɛdeɛ mpanimfoɔ ka no, menya wo a mɛyɛ wo deɛ, ɛne mada me ho so na ɛnam. Yei nti, ɛnnɛ, yɛrebɛhwɛ nnuane ahodoɔ binom a ɛboa ma yɛn nipadua no akwaa biara tumi nya ahoɔden a ɛhia na ayɛ adwuma sɛdeɛ ɛfata. Yeinom na ɛdidi soɔ yi:
- Ani – aburoo, karɔto, nkosua, adua, mako, saamɔn, aborɔdwomaa.
- Nwii – nhabammono, adua, saamɔn, yogɔto, guava, akokɔnam, aborɔdwomaa, sinamɔn, nkosua.
- Adwene – Saamɔn, nkosua, nkatemmɔre, ootu, adua, ntoosi, aborɔdwomaa, karɔto, meleke, yogɔto.
- Akoma – aborɔdwomaa, ntoosi, nhabammono, adua tuntum, saamɔn, tuna, ankaa, ootu, yogɔto.
- Ntini – kwadu, mogyanam, nkosua, aburoo, ootu, akokɔnam, nhabammono, nkateɛ ne nkatemmɔre, nsuo.
- Honam – saamɔn, karɔto, pɛɛ, aborɔdwomaa, mako, ntoosi.
- Ahrawa – mako, aprɛ, ntoosi, kabegyi kɔkɔɔ, yogɔto, kɔfe, kookoo.
- Nsono – yogɔto, akekaduro, pɛɛ, kwadubunu, nsuo.
- Nnompe – meleke, ankaa, nhabammono, tuna, nsuomnam, nkosua.
- Berɛboɔ – kɔfe, grape, nsuonam, adua, nkateɛ, ootu, galeke, pɛɛ, kwadu, karɔto, anamuna, akaatwadeɛ.
Mpanimfoɔ se, “Abaa nna hɔ mma ɔkraman nka onipa.” Yei nti, woahunu nnuane a wo nipadua no hia yi deɛ, ntena hɔ mma no nyɛ ansa. Fa nnuane yɛ nnuro sa wo ho yareɛ na woatumi anyini akyɛ.
