Nkwa na ɛyɛ, nanso yɛnhwehwɛ nkwa a yadeɛ ayɛ mu ma. Berɛ biara no yɛbɔ mmɔden sɛ yɛbɛnya nkwa a ahoɔden wɔ mu. W’apɔmuden nti, kenkan pii na tie pii fa nkyerɛkyerɛ a ɛfa ho ho. Da biara ne yadeɛ a ɛde nipa kɔ wɔn kra akyi. Wonim sɛ wo mogya so te na woampɛ ho asɛm anka a ɛtumi nya nsunsuansoɔ bɔne wɔ wo so? Ebia na wonnim, ɛnneɛ bɔ mmɔden kenkan na tie no yie ɛ.
Yɛka sɛ obi mogya so ate anaasɛ ne mogya wɔ fam a, na ɛkyerɛ sɛ nipadua no mogya nkwammoa a ɛdi aforosianeɛ ma honam akwaa no nyinaa nya ahoɔden no so ate. Ɛkɔba no saa a ɛde nipadua no kɔ mmerɛyɛ mu.
Ansa na mogya bɛtumi aba wɔ nipadua no mu no, ɛhia sɛ nneɛma ahodoɔ bi tumi keka bɔ mu wɔ nipadua no mu ansa. Saa nneɛma yi bi ne prɔten bi a yɛfrɛ no hɛmogulobin a ɛno di ntintimman yie pa ara berɛ a mogya reba nipadua no mu no. Ɛno nso da nkyɛn a, nnuanennuro bi te sɛ vaetamin B12 ne B9 nso ho hia. Ɛkɔba sɛ saa nnuanennuro yi mu biara so te a, ɛtumi ma mogya dodoɔ a ɛwɔ nipadua no mu nso so te.
Yɛwɔ mogya dodoɔ a ɛtwa sɛ ɛdi aforosianeɛ wɔ nipadua no mu. Momma yɛnhyɛ no nso sɛ mogya dodoɔ a ɛwɔ mmaa mu no ne mmarima deɛ nyɛ pɛ. Adɔkotafoɔ kyerɛ sɛ, yɛsusu hɛmogulobin dodoɔ a ɛwɔ ɔbaa mogya mu a, ne papa mu no ɛsɛ sɛ ɛboro 12.0g/ml. Saa ara nso na yɛsusu hɛmogulobin dodoɔ a ɛwɔ ɔbarima mogya mu a, ne papa mu no ɛsɛ sɛ ɛboro 13.0g/ml.
Ɛbɛyɛ dɛn na obi ahunu sɛ ne mogya so ate?
Nsɛnkyerɛnneɛ ahodoɔ a ɛbɛda adi ama obi ahunu sɛ ne mogya so ate bi na ɛdidi soɔ yi.
1. Deɛ ɛdi kan pa ara a ɛtaa da adi ne sɛ nipa no ani ase taa yɛ hoyaa.
2. Bio, nipa no ani so taa kyin no kakra, na ne honam nso taa yɛ ne mmerɛ.
3. Afei ne ti taa pae no.
4. Ebinom wɔ hɔ nso a wɔn home ntaa nsisi so yie.
5. Bio, nipa no adwene mmɔdemmɔ tumi ba fam.
6. Ebinom nso tumi te nka sɛ wɔn akoma bɔ ntɛntɛm so.
7. Deɛ ɛyɛ hu baako wɔ mu ne sɛ, nipa no tumi twa hwe, ne ti anyɛ yie koraa a ɔtumi nam so hwere ne nkwa.
8. Afei nipa no ani kosua ne ne wedeɛ ani no tumi yɛ sɛ akokɔsradeɛ.
Deɛn koraa na ɛma obi mogya so tumi te?
1. Sɛ obi hwere mogya pa ara firi nkwanhyia anaa nsabuo mu a, ɛtumi ma ne mogya so te.
2. Adidie mu no, obi annya nnuanennuro bi te sɛ ayɔn, vaetamin B12 ne B9 a, ɛtumi ma ne mogya so te ɛnam sɛ nipadua no hia weinom nyinaa ansa na atumi ayɛ mogya wɔ nipadua no mu.
3. Korɔankorɔ yadeɛ bi te sɛ saa mu yadeɛ, kokoram ne brɛboɔ mu yadeɛ tumi ma no yɛ den sɛ nipadua no bɛyɛ mogya.
4. Afei, nyinsɛn nso tumi ma obi mogya so te ɛfiri sɛ, ayɔn ne vaetamin B9 taa kɔ fam ɛnam nsuo bi a ɛsesa wɔ ɔbaa no nyinsɛn mu nti.
5. Deɛ ɛtwa toɔ koraa no, nsadennom nso tumi si nipadua no kwan ma ɛntumi nyɛ mogya dodoɔ.
Kwan a obi bɛtumi afa so asɔ ne mogya a ɛso ate no ano.
Obi mogya so te a, ɛho hia pa ara sɛ ɔhwehwɛ nnuane a ayɔn, vaetamen B12 ne B9 wɔ mu, ɛfiri sɛ saa nnuane yi na mogya nkwammoa no hia kɛse sɛ ɛde di dwuma ma mogya ba nipadua no mu. Nipa no bɛtumi asane ahwehwɛ nnuro ahodoɔ a saa nnuanennuro yi bi ahyɛ mu ma nso. Nnuane ahodoɔ a yɛbɛtumi anya nnuanennuro yi bi wɔ mu na ɛdidi soɔ yi.
Ayɔn – Borɔdeɛ ne n’ahaban, aborɔdwoma, atosodeɛ ahodoɔ a n’ahosoɔ yɛ ahabanmono, adua abusua no nyina ne deɛ ɛkeka ho.
Vaetamen B12 – Kosua, alo vɛra, lɛtuse, soya adua ne pii a ɛkeka ho.
Vaetamen B9 – Atosodeɛ ahodoɔ a n’ahosoɔ yɛ ahabanmono, nkontomire, nsusua ne deɛ ɛkeka ho.
Mfa deɛ woakenkan na woatie yi mu biara nyɛ akwadworɔ. Wobɛtumi akɔ ayaresabea akɔhwɛ wo gyinaberɛ wɔ ho, na sɛ ɛwɔ fam mpo a, anka watumi atu ho anammɔn ntɛm. Bɔ mmɔden nso sɛ wobɛka ho asɛm, na woakyɛ ama afoforɔ nso atumi akenkan bi.
