Berɛ nhyehyɛeɛ yɛ sɛ woretoto wo mmerɛ yie na woahunu mmerɛ dodoɔ a wobɛdi wo dwumadie pɔtee bi mu. Berɛ nhyehyɛeɛ ma ankorɛankorɛ wie wɔn dwumadie bi mmerɛ tiawa bi mu a wɔmfa ateetee biara nso mu.
Ma yɛnhwɛ akwan ahodoɔ a wobɛtumi afa so de ahyehyɛ anaa atoto wo berɛ yie.
1. Fa botaeɛ ahodoɔ bi si w’ani so.
2. Hyehyɛ saa dwumadie anaa botaeɛ ahodoɔ no nnidisoɔ nnidisoɔ firi ɛmu deɛ ɛho hia pa ara so kɔsi deɛ ɛho nhia kɛse so. Wobɛtumi agyina wei so de akyekyɛ wo dwumadie no mu:
a) Dwumadie no mu deɛ ɛho hia a ɛsɛ sɛ woyɛ no amonom hɔ ara: Fa w’adwene kɔ ɛno so kane na yɛ no saa berɛ no ara.
b) Dwumadie no mu deɛ ɛho hia nanso ɛnhia sɛ wɔyɛ no amonom hɔ ara: Dwene ho na pɛ berɛ a wobɛdi ɛno ho dwuma.
d) Deɛ ɛsɛ sɛ wodi ho dwuma amonom hɔ ara nanso ɛho nhia: Ɛbɛtumi a kyekyɛ saa dwumadie yi mu nkakrankakra ma afoforɔ bi a wonim sɛ wɔbɛtumi aboa wo.
d) Deɛ ɛho nhia na ɛnsane nso nhwehwɛ sɛ wobɛdi ho dwuma amonom hɔ ara: Fa ɛno to nkyɛn koraa na di ho dwuma akyire.
3. Hyɛ berɛ pɔtee bi ma dwumadie biara. Hwɛ sɛ dwuma a wode bɛsi w’ani so no yɛ deɛ wobɛtumi ayɛ no wɔ mmerɛ dodoɔ a woahyɛ ama noɔ no mu. Ɛnsesa nneɛma bebree mfoa so wɔ berɛ a worentumi nwie ne nyinaa prɛko pɛ. Afei hwɛ dwuma a ɛda w’anim no kɛseɛ so na hyɛ mmerɛ ma no. Sɛ saa dwumadie no bɛhia mmerɛ pii a, nhyehyɛ berɛ kumaa bi mma no na amma woankɔpepere wo ho. Wodi kan dwene berɛ a ɛsɛ sɛ wode yɛ dwuma bi a, ɛtumi ma wohunu ɔhaw a wobɛtumi ahyia. Sɛ ebia, ɛsɛ sɛ wosiesie dwumadie ahodoɔ bi na wokɔkyerɛ mu wɔ mu dwumadie kɛseɛ bi ase, nanso wodi kan hunu no kane sɛ worentumi mfa mmerɛ a ɛda w’anim no nwie ansa na dwumadie no berɛ aso a, ntɛm pa ara no wobɛtumi de bi ama ɔfoforɔ ahyɛaseɛ no ara ama no aboa wo ama woawie ntɛm sene sɛ ɛnam sɛ woanni kan amfa berɛ anto ho no nti, wonhunu sɛ worentumi nwie na ama nneɛma akɔbobɔ wo so.
4. Hwɛ sɛ wode ahomegyeɛ bɛhyɛ wo nhyehyɛeɛ no mu. Woyɛ nneɛma ahodoɔ pii toatoa so a ahomegyeɛ biara mma mu a, ɛma w’adwene no berɛ, na ɛntumi nni dwuma no ntɛm so sɛdeɛ ɛsɛ sɛ ɛyɛ no. Wei ma w’ani tumi ha adwuma no ho mpo. Hwɛ sɛ wo berɛ nhyehyɛeɛ mu no wode ahomegyeɛ nso bɛhyɛ mu bi. Wobɛtumi de saa berɛ no ada kakra, wobɛtumi de akɔnantenante kakra anaa wobɛtumi nso de ayɛ biribiara a wonim sɛ w’ani gye ho a ɛbɛtumi ama w’adwene no agye n’ahome.
5. Dwene ho hunu nna a ɛsɛ sɛ wodi di dwuma pɔtee bi. Woyɛ osuani a wo sɔhwɛ hyɛ Dwoada a, worentumi mfa wo dwumadie bi nkɔhyɛ saa da no wɔ saa berɛ korɔ no ara mu.
6. Yɛ nhyehyɛeɛ ma da biara. Hwɛ sɛ ansa na wobɛhyɛ da biara ase no, na woahunu nnwuma ahodoɔ a ɛsɛ sɛ wodi no wɔ saa da no. Fa yɛ wo daa daa dwumadie. Bɔ mmɔden sɛ wode da biara mu dwumadie ba n’awieeɛ a, wobɛgyɛ berɛ ayɛ nhyehyɛeɛ ama dwumadie foforɔ a ɛda w’anim adekyeeɛ no.
Berɛ yɛ sika, ɛno nti hyɛ no nso sɛ berɛ a wode wo mmerɛ bɛdi agorɔ biara no na sika na woregoro ho no. Ma w’ani nkɔ wo berɛ ho na fa di dwuma yie.
