Yɛka intanɛte so korɔnobɔ a, ɛne sɛ obi bɛfa kwatikwan bi so adaadaa afoforɔ agye wɔn nsam sika anaa wɔn agyapadeɛ. Ɛtɔ da a, deɛ saa nnipa yi yɛ ne sɛ, wɔboapa tɔn nnoɔma binom a ɛnyɛ papa ma afoforɔ, wɔde obi mfonin anaa ne sini daadaa afoforɔ anaasɛ wɔka nnaadaasɛm bi gu wɔn asom sɛdeɛ ɛbɛyɛ a wɔbɛtumi abu wɔn agye wɔn nsam sika.
Ɛwom sɛ saa korɔnobɔ yi kɔɔ so akyɛ pa ara yie deɛ, nanso saa berɛ yi a nnipa renya nkɔanim wɔ abɛɛfo kwan so no, saa berɛ yi pa ara nso na korɔnobɔ no atu atese. Ɛnnɛ, mmɔfra, mpanimfoɔ, ne nnipa nyinaa de wɔn ho agye saa subammɔne yi mu.
Sika ne ahonya deɛ, onipa biara nni hɔ a ɔkyiri ɛfiri sɛ, mpanimfoɔ se, “Obiara nni hɔ a ɛwoɔ sɔ gu n’anom a ɔmpɛ.” Nanso, sɛ yɛma sikaniberɛ didi yɛn tirim a, ɛbɛtumi ama yɛde yɛn ti akɔhyɛ baabi a yɛmpɛ. Ɛbɛtumi ama yɛafa abrabɔ mu nkasɛɛ bi de awowɔ yɛn ho, ɛbɛtumi asɛe yɛn anigyeɛ ne yɛn asomdwoeɛ, na ɛbɛtumi nso ama yɛasopa yɛn ho wɔ nnipa nyinaa anim.
Adeɛ baako a ɛyɛ awerɛho pa ara ne sɛ, ɛnnɛ, mmabunu pa ara na wɔde wɔn ho ahyɛ saa korɔnobɔ yi mu reyɛ no kɛse. Deɛ nti a ɛte saa ne sɛ, wɔn mu dodoɔ no ara abrabɔ asɛe, wɔnni hwɛfoɔ papa biara, wɔmfa nnamfo pa, na wɔmpɛ sɛ wɔde wɔn nsa bɛyɛ adwuma biara nso.
Ɛwom sɛ nnwuma ho ayɛna, na nnwuma binom nso nna fam deɛ nanso, sɛ woma w’ani da hɔ na wobere wo mogya ani a, wobɛtumi anya wo so ne wo deɛ ama wo ho ahehan wo wɔ asetenam. Wode bɛdi odwan ama yɛadwan wo ho deɛ, fa firi mfifire na yɛmfa mfiri wo. Dwanam a twɛdeɛ da ho deɛ, fa we w’awurafua ma w’asom nnwo wo. Deɛ saaa mpaninsɛm yinom nyinaa kyerɛ ne sɛ, ɛsɛ sɛ mmabunu sua sɛ wɔbɛyɛ adwumaden de apɛ sika ato wɔn ho sene sɛ wɔbɛfa kwatikwan bi so asisi nkurɔfoɔ agye wɔn nsam sika.
Ɛyɛ afɛresɛm ne animguaseɛ kɛseɛ pa ara sɛ, wobɛbɔ obi korɔno wɔ intanɛte so ama w’anim agu ase nnipa nyinaa anim. Yɛn nananom hunuu yei nti na wɔkaa sɛ, “Animguaseɛ mfata ɔkani ba” no. Suban a wɔde tetee yɛn no yɛ osuro, obuo, nokorɛdie, ahobrɛaseɛ, ɔdɔ, ne deɛ ɛkeka ho. Yeinom nyinaa yɛ suban pa a sɛ woma ɛdi w’anim a wobɛtumi adi yie wɔ abrabɔ mu.
Ɛnnɛ, ɛsiane suatra ne ayɔnkogorɔ bɔne nti, ama suban binom a ɛnhyɛ abrabɔ pa ho nkuran abɛpue yɛn mu. Saa suban yi mu baako ne intanɛte so korɔnobɔ no. Ɔman biara amammara mu no, intanɛte so korɔnobɔ yɛ nea etia nnipa yiedie ne ne nkɔsoɔ. Ɛno nti, wɔbu obiara a ɔyɛ saa adeɛ yi bi sɛ obi a ɔfata asotweɛ. Ɛyɛ papa sɛ, wobɛtwe wo ho afiri saa suban yi ho anim anim yi ara ansa na aka akyi dodo.
Mpanimfoɔ se, “Yɛtu fo na yɛntu hyɛberɛ.” Menim sɛ aso pa nkyɛre asɛm tie yi deɛ, wode deɛ ato nnipa binom a wɔde wɔn ho hyɛɛ intanɛte so korɔnobɔ mu no bɛyɛ asuadeɛ.
