Ɔman Ghana yɛ yɛn ara yɛn man, yɛnni baabiara kɔ. Ɛha ne yɛn fie, nanso ɛfie tumi dane fie wɔ berɛ a anigyeɛ biara nni mu? Megye di sɛ yɛbɛnya mmuaeɛ ahodoɔ mmienu wɔ ha. Nnipa pii firi ɔman yi mu kɔ aman ahodoɔ so ɛsiane sɛ wɔsusu sɛ wɔbɛnya nnwuma, asomdwoeɛ, anigyeɛ ne sika wɔ hɔ. Dodoɔ no ara nso da so te ɔman yi mu, nanso ɛrekame ayɛ sɛ yɛrebue kwan sɛ obiara mfiri ɔman yi mu nkɔ foforɔ so a wɔntua sika biara a anka adeɛ renkye obiara wɔ ɔman yi mu. Adɛn ntira? Dodoɔ no ara susu sɛ anigyeɛ nni ɔman yi mu.
Ɛfiri mfeɛ bɛyɛ du nie, afe biara aman nkabomkuo gyina nneɛma ahodoɔ bi so yɛ nhwehwɛmu wɔ wiase aman ahodoɔ 150 mu kyerɛ aman no mu deɛ ɛmu nnipa ani gye yie pa ara nnidisoɔ nnidisoɔ. Ɛno mu na afe 2022 a atwa mu no nhwehwɛmu a abɛtɔ dwa afe yi ara mu de ato dwa sɛ, Ghana ne ɔman a ɛtɔ so 111 a ɛmu nnipa ani gye yie pa ara. Afe 2021 mu no, na Ghana tɔ so aduokron nnum, wei kyerɛ sɛ anigyeɛ a ɔman mma wɔ no aba fam koraa. Nneɛma ahodoɔ a wɔgyina so de yɛ saa nhwehwɛmu yi bi ne fawohodie a ɔman mma wɔ, kɛtɛasehyɛ a ɛnni ɔman no mu, ayamyɛ a ɔmamfoɔ wɔ, apɔmuden pa, nhehyeɛ a ɔman no ayɛ ne mmoa a ɔmamfoɔ de boa wɔn a wɔn ho kyere wɔn ne ɔman no sikasɛm a ɛfa mfasoɔ a wɔnya wɔ adwadie mu, na ɛno nti ɛmma ɔmamfoɔ ho nkyere wɔn wɔ asetena mu. Wei kyerɛ sɛ ɛba weinom nyinaa mu a ɔman Ghana mmɔdemmɔ wɔ fam yie.
Nhwehwɛmu no mu no, Finland ne ɔman a adi kan wɔ mu atoa so wɔ mfeɛ nsia mu. Denmark tɔɔ so mmienu, Iceland tɔɔ so mmieɛnsa. Switzerland tɔɔ so nnan, Netherlands tɔɔ so nnum, Luxembourg tɔɔ so nsia, Sweden ne Norway tɔɔ so nson ne nnwɔtwe, ɛnna Israel ne New Zealand tɔɔ so nkron ne du. Abibiman ahodoɔ ne nyinaa mu biara nni hɔ a wɔn din puee mu wɔ aman ahodoɔ aduonum a ɛdi kan no mu.
Abibiman ahodoɔ a wɔn din puee mu ne baabi a wɔdiiɛ wɔ nhwehwɛmu no mu na ɛdidi soɔ yi.
- Mauritius (aduonum mmienu)
- Libya (aduowɔtwe nsia)
- Cote d’Ivoire (aduowɔtwe nnwɔtwe)
- South Africa (aduokron baako)
- Gambia (aduokron mmiɛnsa)
- Algeria (aduokron nsia)
- Liberia (aduokron nson)
- Congo Brazzaville (aduokron nkron)
- Morocco (ɔha)
- Mozambique (ɔha ne baako)
- Cameroon (ɔha ne mmienu)
- Senegal (ɔha ne mmiɛnsa)
- Niger (ɔha ne nnan)
- Gabon (ɔha ne nsia)
- Guinea (ɔha ne nkron)
- Ghana (ɔha ne du baako)
- Burkina Faso (ɔha ne du mmiɛnsa)
- Benin (ɔha ne du nnum)
- Comoros (ɔha ne du nsia)
- Uganda (ɔha ne du nson)
Wei kyerɛ baabi a ɔman Ghana da wɔ ɛmu nnipa anigyeɛ mu. Ɔman yi de nhyehyɛeɛ pa regu akwan mu, kɛtɛasehyɛ ne prɔeɛ refiri hɔ, na yɛde ayamyɛ, nokorɛdie ne pɛpɛɛpɛyɛ redi dwuma a, anka ɔman ba biara bɛnya anigyeɛ, wɔn ho bɛtɔ wɔn wɔ asetena mu, na wɔbɛhunu no sɛ wɔn fie koro pɛ a wɔnni baabiara kɔ.
