Onyimnyamfo Osei Kyei-Mensah-Bonsu, mbrahyɛbaguanyi ma Suame Mansin no na mbrahyɛbaguamu dɔmkɛse no hɔn baanodzinyi, dze n’anodzisɛm roto gua wɔ mbrahyɛbaguafie no na ɔdaa no edzi dɛ ɔbɛyɛ dzen dɛ Soɛfo a ɔhwɛ Sikasɛm do no botum dze 2023 Sikasɛm Nhyehyɛɛ aba mbrahyɛbaguamu Ɔberɛfɛw 15 dɛ mbrɛ ɔman no ne Sikasɛm Ntotoe Mbra tse no.
Nkyɛ Mbrapɔn no ma ho kwan kɛpem Ɔberɛfɛw 30 wɔ afe biara mu dɛ Soɛfo a ɔhwɛ Sikasɛm do no dze afe a ɔwɔ enyim no ne Sikasɛm Nhyehyɛɛ bɛba mbrahyɛbaguamu ma wɔaapɛnsapɛnsa mu na wɔagye ato mu dɛ wɔmfa nyɛ edwuma. Na sesei dze, mbrahyɛbagua no atwe aba enyim adapɛn ebien abɛhyɛ Ɔberɛfɛw 15 wɔ afe biara mu. Iyi na Owura Kyei-Mensah-Bonsu kyerɛ dɛ ɔnam ɔman no ne nkitahodzi a ɔnye IMF Sikafotow no gu do rinya no ntsi, ɔnngye nndzi dɛ afe yi dze botum aba no dɛm.
Ɔdze too gua dɛ afe fofor mu Sikasɛm Nhyehyɛɛ no yɛ mbrahyɛbagua no n’ehiadze tsitsir ɔnam dɛ ɔno nye dwumadzi kɛse papaapa a aban biara dze ba mbrahyɛbaguafie mu hɔ. Ɔkyerɛɛ mu dɛ ohia dɛ mbrahyɛbaguafie no nya ber hwɛ sikasɛm nhyehyɛɛ no mu yie. Ɔdze kaa ho dɛ, “Menngye nndzi sesei a metsena ha yi dɛ ɔwɔ dɛ menye Soɛfo a ɔhwɛ Sikasɛm do no nya nkitahodzi ansaana mehu ber a obotum dze nkrataa no abrɛ hɛn.”.
Ɔkaa dɛ Aban Sikasɛm Ntotoe Mbra kyerɛ dɛ ɔwɔ dɛ Nkrataa no ba mbrahyɛbaguafie Ɔberɛfɛw 15, na IMF nkitahodzi no yɛ adze a obedzi ber kakra. “Ntseasee a menya nye dɛ nkitahodzi no bedzidzi akɔ bosoom (Ɔberɛfɛw) no ne da ɔtɔ do du. Sɛ dɛmara dze a, nna otwar dɛ hom tweɔn no nsunsuando no na wɔdze no mu nsɛm no ka nkrataa no ho.” Owura Kyei-Mensah-Bonsu da iyi edzi. Ɔdze kaa ho dɛ, “Sɛ wotum wie no dɛm a, ɔnam dɛ ɔyɛ Aban no ne sikasɛm nhyehyɛɛ no ntsi, ɔwɔ dɛ ɔkɔ aban mpanyinbagua no enyim ma wɔyɛ mu mpɛnsampɛnsamu ansaana ebowie wɔ mbrahyɛbagua no mu.”.
N’asɛm nye dɛ ohu dɛ sɛ wɔpɛ dɛ wɔyɛ edwuma a no ho tsew a, wobehia ber kakra wɔ hɔn dwumadzi no mu. Ɔse, “Hɛn nyina yenyim dɛ yennyi mbergyan biara mu kɛkɛ. Dɛm ntsi sɛ ereyɛ nhyehyɛɛ a ɔbɛsesa ɔman ne gyinabew a, onnyi dɛ eyɛ biribi a ekyir no onnkotum edzi dwuma a ɔwɔ odzi. Yɛpɛ dɛ yenya dza odzi mu a obeyi ɔman yi efi mbrɛ yɛwɔ yi.”
Ɔkyerɛ dɛ sɛ wɔper dɛ wɔdze nkrataa no bɛba mbrahyɛbaguafie Ɔberɛfɛw 15 no a, ahokyer beberee bɛba. Dɛm ntsi ɔkɛba no dɛ da no pa ho ansaana nkrataa no aba a, wonsuo mu dɛmara ɔnam mbra no ma ho kwan dɛm dɛ da a otwa tun koraa dɛ mbrahyɛbaguafie no nsa bɛka nkrataa no nye Ɔberɛfɛw 30.
