Egya reba o, egya reba o, afei na egya enya ebodu. France Bɔɔlbɔ Abawdobɔdze a wɔsan frɛ no Ballon D’or a afe biara ɔkɔ do no, afe 2022 dze no so aba n’ewiei na woananom nyaa abawdobɔdze soronko yi bi?
Afe 2022 Ballon D’or abawdobɔdze yi kɔr do wɔ Frɛnkye aborokyir man mu wɔ Dwowda ewimber, Ɔbɛsɛ 17, 2022. Dɛ mbrɛ afe biara ɔkɔ do no, abawdobɔdze no ka bɔɔlbɔ abawdobɔdze kɛse a enyimnyamhyɛ wɔ mu no ho bi. Sɛ iyi Wiadze Bɔɔlbɔ Baatan (FIFA) n’abawdobɔdze a wɔdze ma bɔɔlbɔfo na bɔɔlbɔkuw a wɔbɔ hɔnho mbɔdzen bɔɔlbɔ afe bi mu no fi hɔ a, ekyingye biara nnyi ho dɛ Frɛnkye Bɔɔlbɔ Abawdobɔdze a wɔfrɛ no Ballon D’or no so yɛ bɔɔlbɔ abawdobɔdze a wiadze n’afɛndzanan nyinara enyi dzi ekyir papaapa. Abawdobɔdze yi kɔ do ma wiadze bɔɔlbɔfo na bɔɔlbɔkuw a wɔbɔ hɔnho mbɔdzen papaapa bɔɔlbɔ afe pɔkyee bi mu; mbaa na mbanyin bɔɔlbɔfo na bɔɔlbɔkuw nyinara ka ho.
Afe yi dze no, nna ɔyɛ soronko koraa osiandɛ, nna ɔyɛ afe a bɔɔlbɔfo a wɔagye abawdobɔdze no kɛse papaapa a wɔfrɛ hɔn Lionel Messi na Cristiano Ronaldo mmbɛn ho koraa. Cristiano Ronaldo tɔɔ do eduonu (20th) na Lionel Messi dze, mpanyimfo annkan no annka ho koraa. Hɔn beenu no nyinara etum agye abawdobɔdze no nkorkor duebien (12). Bio, abawdobɔdze no dze abawdobɔdze ekuwekuw ahorow bi aka afe yi dze no ho. Iyi bi nye Socrates abawdobɔdze no a wɔdze ma bɔɔlbɔnyi a ɔbɔ no ho mbɔdzen papaapa wɔ ɔman bi no mpontui mu no.
Afe 2022 Ballon D’or no, nna biribiara kyerɛ dɛ Real Madrid na Frɛnkye bɔɔlbɔnyi Karim Benzema na ɔbɛgye ɔnam no mbɔdzembɔ wɔ bɔɔlbɔ afe 2021-2022 mu no ntsi. Nokwar, aberantsɛ yi tumii dze kɔtɔ yɛɛ nkwan. Karim Mustapha Benzema yɛɛ bɔɔlbɔnyi a ne mfe wɔ enyim a ɔtɔ do ebien a oetum agye abawdobɔdze yi. Oedzi mfe eduasa anan (34). Ngyiresi bɔɔlbɔnyi Stanley Mathews nye sahen wɔ mpanyimfo a oetum agye abawdobɔdze no bi. Ber no, nna oedzi mfe eduanan kor (41). Afe 1956 na Stanley Mathews gyee dɛm abawdobɔdze no.
Mbaa afamu no, Barcelona Mbaa Bɔɔlbɔkuw na Spain bɔɔlbɔnyi Alexia Putellas sanee kyerɛɛw ne dzin wɔ abakɔsɛm buukuu mu bio. Afe 2021 mu no, mbaa afamu no, ɔno na otumii gyee sii ne nan do. Afe 2022 mu no so, Putellas asan agye abawdobɔdze yi esi ne nan do na ɔabɛyɛ ɔbaa a odzi kan a oetum agye abawdobɔdze no esi ne nan do atoa do mpɛn ebien (afe 2021 na 2022).
Bɔɔlkyekye afamu no, Real Madrid na Belgium bɔɔlkyekyenyi Thibaut Courtois gyee sii ne nan do. Dɛm abawdobɔdze a wɔdze ma bɔɔlbɔkyefo a wɔfrɛ no Lev Yashin abawdobɔdze no, aberantsɛ yi bɔɔ mbɔdzen gyee ber a ɔnye no bɔɔlbɔkuw Real Madrid gyee UEFA Champions League afe 2021-2022 dze no.
Bɔɔlbɔnyi aberantsɛ a onyim bɔɔl bɔ a ne mfe hyɛ mfe eduonu (20) ase no, Barcelona na Spain bɔɔlbɔnyi aberantsɛ Gavi na otumii gyee abawdobɔdze no. Afe 2021 mu no, ne nyɛnko brɛbo Pedri na ɔgyee abawdobɔdze yi sii ne nan do.
Bɔɔlbɔnyi a otumii toow atsena pii abawdobɔdze a wɔfrɛ no Gerd Muller Abawdobɔdze no, Poland na Barcelona bɔɔlbɔnyi Robert Lewandowski gyee sii ne nan do ɔnam no mbɔdzembɔ wɔ atsenatow ho bɔɔlbɔ afe 2021-2022 mu no.
Bɔɔlbɔkuw a no mbɔdzembɔ sɔ enyi papaapa abawdobɔdze no, nna obiara nyim dɛ bɔɔlbɔkuw Real Madrid na wɔbɛgye ɔnam UEFA Champions League a wɔgyee no ntsi, naaso ammba no dɛm. Ngyiresi bɔɔlbɔkuw Manchester City na wɔgyee dɛm abawdobɔdze no.
Ebibifo afamu no, Senegal na Bayern Munich bɔɔlbɔnyi Sadio Mane gyee Socrates abawdobɔdze no sii ne nan do. Socrates abawdobɔdze no yɛ abawdobɔdze a wɔdze ma bɔɔlbɔnyi a ɔbɔ no ho mbɔdzen som ne man na ɔsan boa ma mpontu kɔ do. Ekyingye biara nnyi Sadio Mane n’abawdobɔdze yi ho dɛ mbrɛ ɔaboa no kurow a ofi mu no wɔ mpontu mu no. Yeyi Socrates abawdobɔdze a aberantsɛ Sadio Mane gyee yi si nkyɛn a, ɔsanee tɔɔ do ebien wɔ bɔɔlbɔnyi a no mbɔdzembɔ kɔ kan no mu. Yetum ka dɛ, sɛ iyi Karim Mustapha Benzema si nkyɛn a, Senegal bɔɔlbɔ aberantsɛ Sadio Mane na onyim bɔɔl bɔ kyɛn obiara a ɔwɔ wiadze n’afɛndzanan nyinara bɔɔlbɔ afe 2021-2022 mu. Sadio Mane abɛyɛ Ebibir mu bɔɔlbɔnyi a ɔtɔ do ebien a oetum abɛn Ballon D’or abawdobɔdze no papaapa.
Onyia odzi kan no nye Liberia manpanyin George “Oppong” Weah a osii n’akan maa AC Milan na Chelsea na bɔɔlbɔkuw binom a wɔkeka ho. Otumii gyee abawdobɔdze no sii ne nan do afe 1995 mu. Didier Drogba, Mohammed Salah na Samuel Eto’o nyinara abɔ hɔnho mbɔdzen naaso George Oppong Weah na Sadio Mane hɔn dze no kyɛn hɔn dze no nyinara.
Abawdobɔdze nkaa aka no bi na hɔn a wɔgyee:
-Kelvin De Bruyne (Belgium na Manchester City) – ɔtɔɔ do ebiasa
– Robert Lewandowski (Poland, Bayern Munich na Barcelona- ɔtɔɔ do anan
– Mohammed Salah (Egypt na Liverpool) – ɔtɔɔ do enum
– Kyllian Mbappe (Frɛnkye na PSG) – ɔtɔɔ do esia
– Thibaut Courtois (Belgium na Real Madrid) – ɔtɔɔ do esuon
– Vinicious Jnr (Brasil na Real Madrid) – ɔtɔɔ do awɔtwe
-Luca Modric (Croatia na Real Madrid) – ɔtɔɔ do akron
– Erling Haalaand (Norway, Dortmund na Manchester City)- ɔtɔɔ do du
Akannews.com ma bɔɔlbɔfo na bɔɔlbɔkuw a wotumii gyee biribi no ayekoo!!!
