Fankwa 19 ,2022 mu na hɔn a wɔtow nsa frɛ hɔn wɔ wiadze n’afanan nyina kehyiaa mu wɔ Westminister Abbey London dze kataa Ɔhemaa Elizabeth II n’ekyir koraa.
Nyimpa mpemmpem a wɔwɔ wiadze afanan nyinaa no, dodow ara hwɛɛ eyiyɛ yi wɔ tɛlɛbihyɛn do ɔnye abɛɛfo ntsentan do, wɔ ber a wiadze dze no bu a otwa tow maa ɔhembaa Elizabeth II a odzii adze mfe eduoson.
Sɛ wɔanntow nsa ammfrɛ wo wɔ dɛm ahenyi yi ase a, nnkotum akɔ bi. Vladimir Putin a ɔyɛ Russia manpanyin mpo no wɔanntow nsa ammfrɛ no . Emerson Mnangagwa a ɔyɛ Zimbabwe manpanyin so dɛmara.
Ghanafo a wɔtoow nsa frɛ hɔn wɔ Ngyresi hembaa n’eyi yi ase yɛ nyimpa baanan. Iyinom nye ɔmanpayin Nana Addo na no ho kafo Rebecca Akufo -Addo. Wonyaa hɔn ntonsafrɛ no fir Ghana “high commission “a ɔwɔ United Kingdom. Harriet Thompson a ɔyɛ UK hɔn high commissioner wɔ Ghana ha na osii dɛm nhyehyɛɛ yi do dua.
Nyia otsia ebiasa no nye Owura Kwasi Kwarteng. Wɔwoo Owura yi wɔ UK man mu na mbom n’asefo fir Ghana. Owura Kwarteng nyaa dzibew dɛ sika nhwɛdofo “Finance Minister” maa UK man no, adapɛn ebien ntamu ara na ɔhembaa Elizabeth II nyaa ne Nyame frɛ.
Nyia otsia anan no nye, Lieutenant colonel Nana Kofi Twumasi-Ankarah. Owura yi dze, wɔwoo no wɔ Ghana ha ara na mbom ɔyɛ sodarnyi panyin wɔ UK asodarfo mu. Owura Ankrah ka asodarfo a nna wɔ rotow ɔhembaa n’emu no santsen no ho. Afe 2017 mu, na colonel Ankarah bɛyɛɛ Ngyeresi hembaa Elizabeth II n’abambɔfo no mu kor. Na ɔno nye bibinyi a odzii kan nyaa dɛm dzibew yi.
Aber a ɔhenba Phillip kɔɔ ahomgye wɔ aban edwuma yɛ mu no, Owura Ankrah nye nyia na ɔboa ɔhembaa no wɔ bagua mu.
