Nkaa no mbrahyɛbeguanyi a nna ɔhwɛ Tamale abatow mpesua do, Owura Inusah Fuseini dze nkrato ama Ghana manpanyin Nana Addo Dankwa Akuffo dɛ ɔmbɔ mbɔdzen ara ntsie Ghanafo na ɔmpam Soafo a ɔhwɛ ɔman no ne sikasɛm do, Owura Ken Ofori Atta. Ber a mbrahyɛbeguanyi dadaw yi rekasa no, ɔkyerɛ dɛ ɔmanpanyin n’adwen a ɔafa dɛ onnkotu soafo a ɔhwɛ sikasɛm do no wɔ aber mpo a onnyi gyedzi biara wɔ no mu dɛ obotum edzi dwuma dɛ mbrɛ dɔmkuw kɛse no reka no yɛ adze a ohu no dɛ ɔyɛ nwanwa.
Ɔkyerɛɛ wɔ ne kasaa mu dɛ, mbrahyɛbeguafo bɛyɛ eduokrɔn (90) a wɔwɔ dɔmkuw no mu agye ato mu dɛ, sɛ manpanyim anngye annto mu ammpam soafo a ɔhwɛ ɔman no ne sikasɛm do enyimenyim yi ara a, wɔnnkɛgye ɔman no ne sikasɛm ho nsɛm a ɔdze bɔto gua na no dwumadzi biara ho nsɛm ato mu. Ne nsɛm mu no, mbrahyɛbeguafo a nna hɔn dodow yɛ eduowɔtwe (80) a wɔreper dɛ manpanyin mmpam soafo a ɔhwɛ ɔman no ne sikasɛm do na Owura Adu Boahen no hɔn dodow akɔ sor. Owura Adu Boahen dze, manpanyin apam no ɔnam ntsee a onnyae dɛ Owura yi dze no ho akɔfɔrfɔr katasehyɛ na prɔyee mu.
Afei dɔm kumaa a wɔwɔ mbrahyɛbeguafie so reper dɛ manpanyin bɛpam Owura Ken Ofori Atta.
Mpɛmpɛmdo yi dze, mpanyim apaw abeguafokuw efi dɔm kumaa a wɔwɔ mbrahyɛbeguafie dɛ wɔnhwehwɛ nsɛm mu nhwɛ dɛ nsɛm a wɔreka fa Ken Ofori Atta ho no tse dɛn. Owura Inusah Fuseni dze too gua wɔ ne kasaa mu dɛ, manpanyin ada suban a ɔnnyɛ edzi dɛ ɔanngye noara ne mbrahyɛbeguafo na Ghanafo nsɛm annto mu ammpam soafo a ɔhwɛ ɔman no ne sikasɛm do.
Iyi ma ɔdwen dɛ, mber aso dɛ manpanyin tsie dza Ghanafo reka no osiandɛ, ɔman no ne mbrapɔn no mpo aka no pefee dɛ, ɔwɔ dɛ manpanyin no tum dzi dwuma dze boa no manfo wɔ hɔn asetsena mu na nnyɛ dɛ ɔdze bɔhwɛ n’ebusuafo esetsena mu.
