Sohyial midia yɛ abaɛfordze bi a abɛka hɛn daa daa asetsena ho a yennkotum eyi no akwa. Ɔyɛ prama bi a ama wiadze ebue na afei aka wiadze mu nyimpa nyinara abɔ mu wɔ faakor tse dɛ gyama hɛn nyinara yɛtse kurow kor bi mu. Dza ɔyɛ nwanwa wɔ ho nye dɛ, daa na daa nyinara no, enyimdzefo bɔ mbɔdzen dze sohyial midia prama fofor bɔbɔ adze ma nkorɔfo kɔ mu kenya mu enyigye.
Ɔnnkyɛree biara na Elon Musk, South Africa dehye a ɔyɛ sohyial midia prama kɛse Twitter wura dze nhyehyɛɛ a ɔfa dwumadzi ahorow a ɔkɔ do wɔ Twitter do no bɔbɔɔ adze. Ɔdze nhyehyɛɛ no bɔbɔɔ adze no, dodowara na wɔkasae tsiaa no, eso ɔyɛɛ noho dɛ hwee mmfa noho. Ɔnam do ma nkorɔfo a wodzi hɔn dwuma ahorow wɔ Twitter do hun dɛ hɔn dwumadzi wɔ prama no do no nnkɛyɛ enyigye bio ntsi, wɔhyɛɛ ase hwehwɛɛ sohyial midia prama fofor a obosuo hɔn fe mu efi Twitter nsamu. Annkyɛr biara na “Truth Social” sohyial midia prama no baa mfonyin no mu bi. “Truth Social” yɛ sohyial midia prama a nkan no Amereka mampanyin Donald Trump dze bɔbɔɔ adze.
Dza mpɛn pii no ɔyɛ enyika wɔ sohyial midia ho no nye dɛ, edzikamfo a wodzii kan dze sohyial midia prama bɔbɔɔ adze no hɔn prama no etsintsim. Dɛm ntsi ɔyɛ dzen papaapa dɛ sohyial midia prama fofor bi bɔbɔ ewura mu dɛmara abɛgye dzin egya hɔn dze no. Dɛm edzikanfo yinom hɔn sohyial midia prama no, bi nye Facebook, Twitter, YouTube na dza ɔkeka ho. Dza ɔtse nye dɛ, dɛm prama yinom ekyir no, mprama nketsenketse bi hyehyɛ ekyir a wɔrohwɛ kwan dɛ edzikamfo yinom hɔn sohyial midia mprama a etsintsim no ho bɛba asɛm ama hɔn so wɔaabɔ ewura mu bi. Dɛm sohyial midia mprama yi, binom nye “Sky Blue”, “Truth Social” na “Threads” a merebɛka ho asɛm yi.
“Threads” yɛ sohyial prama bi a Facebookwura Mark Zuckerberg dze bɔbɔɔ adze afe 2023 mu. Dwumadzifo a woenya kwan edzi do dwuma no kyerɛ a, no do dwumadzi tse dɛ mbrɛ Twitter tse no ara pɛr. Binom mpo kyerɛ a, Twitter edwumayɛfo a Owura Elon Musk yii hɔn edzi ber a ɔtɔɔ Twitter no na Owura Zuckerberg afa hɔn edwuma mu nye hɔn ridzi dwuma no, nna tserɛ, ɔbɛyɛ dzen papaapa dɛ kɔtɔ bɔwoo anoma ma ayɛ yie.
Mbrɛ “Threads” sohyial midia prama no tse no, osiandɛ ɔyɛ Facebook, WhatsApp na Instagram wura Mark Zuckerberg dze no ntsi, ɔaka ne nyinara abɔ mu a ɔma ho kwan ma asɛm a edze bɔto Facebook, WhatsApp anaa Instagram no, itum wɔw do dze to Threads do pɛpɛɛpɛ a ahokyer biara nnyi mu. Sɛ ewɔ do a, nsɛm a wo nsa bɛka no fi hɔn a afa hɔn nyɛnko no na nsɛm a sohyial midia prama no akamfo fi hɔn a afei na iribehyia hɔn no hɔ.
Sɛ edze akyerɛw bi roto do a, ibotum dze akyerɛwamba kor kesi ahaenum akyerɛw a biribiara nnkesi ho kwan. Ibotum dze lenke bi afora w’akyerɛw no so. Edze mfonyin so to do a ɔyɛ yie. Sɛ edze sen roto do a, sen a ne mber dodow pem enum nko na ibotum dze ato do. Hɔn a wɔagye dzin wɔ wiadze yi mu tse dɛ ndwontowfo, aban mu mpanyimfo, bɔɔlbɔfo na etistir wɔ ahyɛnsewdze soronko a ɔda hɔn nsew wɔ prama no do tse dɛ mbrɛ mprama ahorow no tse pɛpɛɛpɛ.
Itum tow nkorɔfo nkra wɔ prama no do so. Nkratow no tum yɛ mfonyin, sen na akyerɛwsɛm so. Sɛ enenam do na ihu obi n’asɛm bi na sɛ w’enyi gye ho a, itum pɛ onyia no n’asɛm no. Sɛ epɛ dɛ ekyɛ a, itum kyɛ ma afofor anaa ipia to wo dwumadzifie ma afofor hu dza akyɛ no anaa edze ato do no. Sɛ epɛ dɛ isiw obi kwan wɔ wo dwumadzifie do a, akwanya wɔ hɔ a ibotum ayɛ. Mbrɛ prama no tse no tum ma itum dendan no mbrɛ woara epɛ biara na iyi ma no do dwumadzi yɛ enyika ankasankasa.
Dɛ mbrɛ ne dzin tse no, no su tse dɛ ahoma anaa nyansapɔw bi a irisian pɛpɛɛpɛ. Dɛ mbrɛ afei na aba ma nkorɔfo ahyɛ ase reper kɔ do no kyerɛ akansi a ɔkɔ do wɔ sohyial midia mprama ahorow a yɛwɔ no ntamu. Twitter, Truth Social, Blue Skies, Instagram, TickTok, Threads, hendze na edze woho ato do? Kyerɛ w’adwen wɔ hɛn sohyial midia prama ahorow no do.