Ɔtsɛmbuafo Samuel Asiedu dze too gua dɛ ɔwɔ dɛ woyi okumfɔ fi ɔman no ne mbra nwoma na asɛndzi nyinara mu. Ɔdze asɛm yi too gua Ɔbɛsɛ 19, 2022 mu wɔ ber a okehyiaa Mbrahyɛbaguamu Mpawee Anototofo Kuw a wɔrototo atsɛmbuafo afofor Ɔmampanyin apaw hɔn dɛ wɔnnkɔsom wɔ ɔman no n’asɛndzibeapɔn no mu dɛ atsɛmbuafo no ano no.
Ayɛwoho wɔ afe yi mu na Ɔmampanyin no dze atsɛmbuafo baanan edzin bɔtoo gua ama wɔaapaw hɔn dɛ atsɛmbuafo wɔ ɔman no n’asɛndzibeapɔn no mu. Nna tserɛ ekehia dɛ Mpawee Anototofo Kuw a ɔwɔ Mbrahyɛbaguamu toto atsɛmbuafo yi ano hu mbrɛ hɔn ahoɔdzen na nyimdzee du dwumadzi wɔpɛ dɛ wɔdze hyɛ hɔn nsa no. Atsɛmbuafo baanan no nye Ɔtsɛmbuafo Samuel Asiedu, Ɔtsɛmbuafo Barbara Frances Ackah-yensu, Ɔtsɛmbuafo George Kingsley Koomson na Ɔtsɛmbuafo Ernest Yao Gaewu.
Anototo yi mu na odur Ɔtsɛmbuafo Asiedu do no, Onyimnyamfo Francis-Xavier Sosu a ɔyɛ Mbranyimnyi na ɔsan yɛ Mbrahyɛbaguanyi ma Madina Mansin no, na ɔka Anototofo Kuw no ho no bisaa n’adwen wɔ okum afɔbu a wɔdze ma nkorɔfo binom a wɔdze kegyina asɛndzii no ho.
N’anoyi mu na ɔdze too gua dɛ, “Nkwa yɛ adzehiadze kɛse, nkwa yɛ ɔdomankoma koraa, na dɛ mbrɛ adasa nntum nnyɛ nkwa no, dɛmara na yennyi ho tum dɛ yɛgye nkwa. Nkwa yɛ adze a yeny gye pɛr, yenntum nnsan mmfa nnhyɛ n’anan mu.”.
Ɔkɔr do kyerɛɛ mu dɛ, “Mfom tum ba wɔ asɛndzi mu. Wotum bu obi fɔ ber a nna mfom a wɔdze ato no do no nnyi mu dɛm. Iyi kɛba dɛ wobu no okumfɔ ma woku no na ekyir no ɔbɛda edzi dɛ onndzi fɔ wɔ asɛm no ho a, yennkotum ama nyimpa no aba nkwa mu bio. Dɛm ntsi, onntwar dɛ wokum obiara, anaa mpo dɛ woyi okum afɔbu fi hɛn mbra nwoma koraa.
Ɔtsɛmbuafo Asiedu kae kaa ho kyerɛɛ mu dɛ, “Mbra no wɔ hɛn mbra nwoma mu nkotsee dze a, ɔtsɛmbuafo no nnyi biribiara yɛ dɛ ɔbɛkyerɛkyerɛ mu na ɔdze bɛyɛ edwuma dɛ mbrɛ ɔsɛ. Ntsi, yɛnnkɛfa ayɛ edwuma dze a, nna ɔwɔ dɛ yeyi no hɛn mbra nwoma koraa.”
